Timote Pakhatnak 6:1-21
6 Sal hngawngkual khinh a simi hna nih an bawile kha upat awk a tlak tukmi in hmu zungzal hna seh. Cuticun Pathian min le a cawnpiaknak cu thangchiat a si lai lo.
2 Cun an bawile cu zumtu an si ahcun kan unau an si tiin upat loin um hna hlah seh. Rian an ṭuanpiakmi hna cu zumtu le dawtmi unau an si caah lungtho chinchin in an ṭuan awk a si.
Mah kong hna hi cawnpiak peng hna law forh peng hna.
3 Pakhatkhat nih a hmaan lomi zumhnak kong kha mi a cawnpiak i Bawipa Jesuh Khrih sinin a rami man a ngeimi cawnpiaknak le Pathian lei i pekchanh awkah a forhmi cawnpiaknak kha a cohlan lo ahcun,
4 aa porhlawmi le zeihmanh a hngal lomi a si. I sik le biafang tete kong ah bia al a duh ngaimi a si. Cu nih cun nahchuahnak, i sik i velhnak, thangchiatnak, lunghrinhnak le,
5 a biapi lomi kongkau ah bia i al lengmangnak a chuahter. Mah cu a lungthin a ṭha lomi le biatak a ngei ti lomi hna nih an chuahtermi a si. Annih nih Pathian lei i pekchanhnak kha a miak hmuhnak ah an ruah.
6 Kan ngeihmi thil te ah lungsi hnangamnak kan ngeih ahcun Pathian lei i pekchanhnak nih a miak tampi a hmuhter ti cu a hmaan ko.
7 Zeicahtiah hi vawlei ah hin zeihmanh kan rak i chuahpi lo i zeihmanh zong kan i kalpi kho fawn lai lo.
8 Cucaah ei awk le hruk awk* kan ngeih ahcun cucu kan i lungsi awk a si ko.
9 Rum awkah biakhiahnak a tuahmi hna cu tukforhnak ah an tla i rap ah an i foih tawn. Hruhnak a si i ṭih a nungmi duhnak chung ah an pil i an rawk dih cikcek tawn.
10 Zeicahtiah tangka duhnak cu ṭhatlonak vialte hrampi a si. Mi cheukhat cu tangka an duh tuk ruang ah zumhnak in an pial i ngaihchiatnak tampi he anmahle anmah fahnak an i pe.
11 Asinain Pathian mi, nang cu mah thil hna kha hrial hna. Dinnak, Pathian lei i pekchanhnak, zumhnak, dawtnak, inkhawhnak le nemnak kha ngeih awkah i zuam peng.
12 Khrihfa zumhnak caah a ṭhami raldohnak kha do peng. Zungzal nunnak kha fek tein i tlaih peng. Zeicahtiah nang cu zungzal nunnak hmuh awkah thim na si i mah nunnak kong kha mi tampi hmaiah ṭha tein tehte na khaan.
13 Zeizong vialte a nuntertu Pathian hmaiah le Pontius Pilat sinah ṭha tein tehte a khangtu Khrih Jesuh hmaiah hitin nawl kaan pek:
14 Bawipa Jesuh Khrih a langh tiang dotlak lonak um loin le soisel awk um loin nawlbia kha rak zul peng.
15 Aa nuammi le pakhat lawng a simi Uktu Jesuh Khrih cu rikhiahmi caan a phanh tikah a lang te lai. Anih cu siangpahrang vialte Siangpahrang le bawi vialte Bawi a si.
16 Amah lawnglawng hi a thi kho lomi, a naih in naih khawh lomi ceunak chung ah a ummi a si. Ahohmanh nih an hmu bal lo i a hmuh zong an hmu kho lo. Anih cu upatnak hmu ko seh law a ṭhawnnak cu zungzal in hmun ko seh. Amen.
17 Atu chan* i a rummi hna kha i porhlawt lo awkah le a hmun lomi rumnak kha i bochan loin kan hmuhmi zeizong vialte siang ngai in a kan petu Pathian tu i bochan awkah cawnpiak hna.*
18 Ṭhatnak tuah awk, rian ṭha tampi ṭuan awk, a siangmi si awk, pekṭhenhnak ah timhcia si awkah chim hna.
19 Cutin an tuah cu Pathian sinin a rami rumnak kha an khonmi a si. Mah cu nunnak taktak kha fek tein an i tlaih khawh peng nakhnga hmailei caah hram ṭha an dirhmi a si.
20 Ka dawtmi Timote, zumh ngai in pek na simi thil kha ṭha tein rak kilveng. A thiangmi thil a upat lomi pakpalawng a simi bia le hngalhnak ka ngei tiah aa ruatmi hna sinin a rami ruahnak hna kha rak ngai hlah. An “hngalhnak” cu a hmaanmi thil he aa ralkahmi a si.
21 Cu bantuk hngalhnak a ngeimi bantuk in aa umtermi mi cheukhat cu zumhnak in an pial cang.
Pathian vel cu na cung ah um ko seh.
