Korin Pahnihnak 11:1-33
11 Khuaruahnak a ngei lomi ka lawh hmanh ah rak ka ing hram ko u. A in zong nan ka in taktak ko.
2 Pathian nih aan siaherh hna bantuk in* kei zong nih kaan siaherh* hna. Zeicahtiah va a simi Khrih sinah nannih kha ngaknu thiang in pekchanh awk le ṭhitumter awkah bia kaa kam.
3 Rul nih a zernak in Evi kha a rak hlen bantuk in Khrih nan pek awk a simi, lungtak tein le lungthiang tein umnak kha pakhatkhat nih a rawhter sual lai ti ka phang.
4 Nan sinah pakhatkhat ra in kan chimmi Jesuh kong si loin midang kong a chim ahcun, nan pom cangmi ruahnak si loin a dang ruahnak kong a chim ahcun, nan cohlan cangmi thawngṭha si loin a dang thawngṭha kong a chim ahcun fawi tein nan rak cohlan ko hnga.
5 A hleikhunmi lamkaltu tiah nan timi hna nakin tlawmte hmanh ka niam deuh lo tiah kaa ruat.
6 Phungchim cu thiam hmanh hlah ning law hngalhnak cu ka ngei tuk ko. Cutin a si kha thil sining kip ah lam a phunphun in kan rak langhter.
7 Hlorh nan si nakhnga keimahle keimah kaa niamtermi, Pathian kong thawngṭha kha man loin lunglawm tein kaan chimhmi hna cu sualnak ka tuah a si maw?
8 Nan ca i rianṭuan awkah a dang Khrihfabu sinin bawmhnak ka lakmi cu an thil ka chuhmi hna bantuk a si.
9 Nan sin i ka um lioah ka herhbaumi a um hmanh ah thilrit kaan khinh hna lo. Masidonia in a rami unau pawl nih ka herhmi paoh kha tlamtling tein an ka pek. Nan caah thilrit ka si nakhnga lo a lam kip in kaa ralring i hmailei zong ah kaa ralring peng lai.
10 Khrih zultu ka si chung paoh cu Akhaia ram dihlak ah mah kong kaa porhlawtnak hi zeihmanh nih a ka kham kho lai lo.
11 Zeicah thilrit kaan khinh hna lo? Kaan dawt hna lo caah maw? Kaan dawt hna ti cu Pathian nih a hngalh ko.
12 Kanmah bantuk in lamkaltu kan si ve tiah aa ti i aa porhlawmi cheukhat an um. Cucaah porhlawt awk a ruang zeihmanh an ngeih nakhnga lo atu ka tuahmi hi ka tuah zungzal ko lai.
13 Annih cu lamkaltu deu, mihlen hmang le Khrih lamkaltu bantuk in aa titermi an si.
14 Mah cu khuaruahhar awk a si lo. Zeicahtiah Satan hmanh nih pei ceunak vancungmi bantuk in aa titer kha.
15 Cucaah Satan rianṭuantu zong nih dinnak ca i rianṭuantu bantuk in an i titermi cu khuaruahhar awk a si lo. Asinain an donghnak cu an rian ṭuan ning in a si te ko lai.
16 Ka chim ṭhan rih lai: Ahohmanh nih khuaruahnak a ngei lomi in rak ka ruat hlah u. Asinain nan ka ruah hmanh ah khuaruahnak a ngei lomi in rak ka cohlang ko u, cuticun tlawmte tal i porhlawt awk ka ngei lai.
17 Cutin ka chimmi cu Bawipa kaa zohchunhmi a si lo. Khuaruahnak a ngei lomi bantuk in mahle mah i zumh tuk in kaa porhlawtmi a si.
18 Mi tampi cu vawlei lei thil ah an i porhlawt caah kei zong kaa porhlaw ve lai.
19 Nannih cu “khuaruahnak a ngei” tukmi nan si caah khuaruahnak a ngei lomi kha lunglawm tein nan in hna.
20 Sal ah aan sermi hna, aan eihmuarmi hna, nan ngeihmi aan chutmi hna, nan lu cung a kaimi hna le nan hmai aan bengmi hna hmanh kha nan in ko hna.
21 Cutin chim cu kan caah ningzak a si, zeicahtiah mah nih a derthawmmi a kan lawhter.
Asinain khuaruahnak a ngei lomi bantuk in ka chim rih lai—Midang nih ralṭha tein an tuah ahcun kei zong ralṭha tein ka tuah ve lai.
22 Annih cu Hebru mi an si maw? Kei zong ka si ve. Israel mi an si maw? Kei zong ka si ve. Abraham tefa an si maw? Kei zong ka si ve.
23 Khrih rianṭuantu an si maw? Mihrut bantuk in chim ko ning law, kei cu anmah nakin ka si deuh, anmah nakin rian tam deuh ka ṭuan, voi tam deuh thong thlak ka si, atu le atu tuknak ka ing, voi tampi ka thi dengmang.
24 Judah mi hna kut in voi 39 tuknak kha voi 5 tiang ka ing.
25 Fung in tuknak voi 3, lung in chehnak voi 1, tilawng rawhnak voi 3 ka tong, nikhat le zankhat chung rili ti ah ka rak taang.
26 Voi tampi khual ka tlawng, tiva ah harnak tampi ka tong, damiah sinin harnak ka tong, ka miphun sinin le miphun dang sinin harnak ka tong, khuachung ah, ramlak ah le rili ah thil ṭihnung ka tong, unau deu sinin harnak ka tong.
27 Har ngai in rian ka ṭuan, zan tampi hngilh loin ka um, rawlṭam tihal in le ei awk ngei loin ka um, khuasik ka ing i hnipuan ngei loin ka um.
28 Mah thil vialte leng ah Khrihfabu dihlak caah nifate lungrethei ngai in ka um.
29 Pakhatkhat a derthawm ahcun kei zong ka derthawm ve lo maw? Pakhatkhat a tlukrilh ahcun ka thin a lin tuk lo maw?
30 Kaa porhlawt awk a si ahcun ka derthawmnak a langhtermi thil kong ah kaa porhlaw lai.
31 Bawipa Jesuh i a Pa le a Pathian, zungzal in thangṭhat awk a simi nih lih ka chim lo ti kha a hngalh ko.
32 Damaskas khua ka um lioah Aretas siangpahrang kut tang i uktu bawi nih keimah tlaih awkah khua kutka kha a cawnghter hna.
33 Asinain unau pawl nih bawm chung ah an ka khumh i khua kulhnak vanpang thlalang awng in an ka ṭhumh caah a kut in ka luat.
