Korin Pahnihnak 13:1-14
13 Atu hi nan sin rat awkah timhcia ka sinak a voithumnak a si cang. “Zei kongkau hmanh ah tehte pahnih asiloah pathum nih chim lawng ah fehter a si.”
2 Keimah theng cu nan sinah ka um lo nain nan sinah a voihnihnak a rak phanmi bantuk in ka bia hi cohlang u. Ka rak phanh tikah sualnak a rak tuahmi le a taangmi nan dihlak in kaan dinhdorh hna lai lo tiah a hlankan in ralrin kaan pek hna.
3 Cuticun Khrih nih ka sinin bia a chim taktak kha ka langhter lai. Khrih nih aan pehtlaih hna tikah derthawmnak kha a langhter lo, ṭhawnnak tu a langhter.
4 Khrih cu derthawmnak ruang ah tung cung ah thah a si nain Pathian ṭhawnnak ruang ah a nung ṭhan. Khrih a rak derthawm bantuk in kannih zong kan derthawm ve. Asinain nan cung ah rian a ṭuanmi Pathian ṭhawnnak ruang ah amah he kan nung ve lai.
5 Nan zumhnak a fek maw, fek lo ti kha i hneksak peng u. Zei bantuk mi dah nan si ti kha i dothlat peng u. Nannih cu Jesuh Khrih he lungthin khat tein a ummi nan si kha nan hngal lo maw? Cutin nan um lo ahcun Pathian mithmai ṭha nan hmu lai lo.
6 Kannih cu Pathian mithmai ṭha a hmumi kan si kha nan hngalh lai tiah kaa ruahchan.
7 Palhnak zeihmanh nan tuah nakhnga lo Pathian sinah thla kan cam. Mah cu mithmai ṭha a hmumi kan lawh nakhnga caah a si lo. Mithmai ṭha a hmu lomi kan lawh hmanh ah a hmaanmi thil nan tuah khawh nakhnga caah a si.
8 Biatak a ralchanhmi zei thil hmanh kan tuah kho lo, biatak ca lawng ah rian kan ṭuan.
9 Kannih cu kan derthawm hmanh ah nannih cu nan ṭhawn ahcun kan i lawm ko. A herh ning in thlennak nan tuah khawh nakhnga thla kan in campiak hna.
10 Nan sin ka phanh tikah Bawipa nih a ka pekmi nawlngeihnak kha fak tuk in hman a herh nakhnga lo a langhlat in mah ca hi ka rak ṭialmi a si. Cu nawlngeihnak cu nan zumhnak hrawhnak caah si loin fehternak caah a si.
11 A donghnak ah unau hna, forh kaan duhmi hna cu lunglawm tein um peng u, a herh ning in thlennak tuah u, hnemhnak kha cohlang u, lungthin khat tein um u, rem tein um u law dawtnak le daihnak Pathian nih aan umpi hna lai.
12 A thiangmi hnamhnak in pakhat le pakhat i biachawn u.
13 Mithiang mi dihlak nih nan kut an in tlaih hna.
14 Bawipa Jesuh Khrih vel le Pathian dawtnak le kan dihlak in kan hmuhmi thiang thlarau cu nan cung ah um ko seh.
