Korin Pahnihnak 2:1-17
2 Nan sin ka rat ṭhan tikah nan ngaihchiatter lo ding in bia ka khiah.
2 Nan ngaih kaan chiatter hna ahcun aho nih dah a ka lawmhter ti lai? Nanmah lawng pei a ka lawmhtertu nan si cu.
3 Cucaah mah ca kha nan sinah ka rak ṭialmi a si. Mah cu ka rat tikah ka lung a ka lawmhtertu ding nih ka ngaih nan ka chiatter nakhnga lo caah a si. A ka lawmhtertu thil nih nan dihlak in aan lawmhter ve hna lai ti kha ka zumh.
4 Lungthin fak ngai le lungrethei ngai le mitthli tla thluahmah in ka rak ṭial. Mah cu nan ngaihchiatter awkah si loin zeitluk in dah kaan dawt hna ti kha hngalhter awkah a si.
5 Pakhatkhat nih ngaihchiatnak a chuahter ahcun keimah lawng si loin nan dihlak in zeimaw tiang cu nan ngaih a chia dih ko. Asinain mah kong ah hin bia fak tuk in chim ka duh lo.
6 Mi tam deuh nih nan chimhhrinhmi cu mah pa caah a za cang ko.
7 Atu cu mah pa kha lungtak tein nan ngaihthiam awk le nan hnemh awk a si. Cutin a si lo ahcun a ngaih a chia tuk lai i a lung a dong sual lai.
8 Cucaah amah nan dawt taktak kha a hngalh nakhnga va langhter u tiah kaan forh hna.
9 Nannih cu zeizong kip ah nawl a ngaimi nan si maw, si lo ti fiang tein hngalh ka duh ca zong ah ca ka rak ṭialmi a si.
10 Nanmah nih nan ngaihthiammi hna kha kei zong nih ka ngaihthiam ve hna. Ngaihthiam awk thil pakhatkhat a um i ka ngaihthiam hna ahcun mah cu nanmah ṭhatnak caah a si i Khrih cu ka tehte a si.
11 Satan nih a kan tei nakhnga lo* cutin ngaihthiam cu a biapi. Zeicahtiah Satan khuakhannak kha a hngal lomi kan si lo.
12 Khrih kong thawngṭha chim awkah Troas khua ka phanh tikah Bawipa rian ṭuan ding in ka caah kutka aa hung.
13 Asinain ka unau Titas kha ka hmuh lo caah ka lungre a thei. Cucaah cuka khua i zultu hna kha an kut ka tlaih hna i Masidonia ah ka lan.
14 Khrih he teinak puai lamzawhnak ah a kan hruai zungzaltu Pathian cu lawm u sih. Pathian he aa tlaimi hngalhnak kong rimhmui cu kanmah thawng in khuazakip ah a karh.
15 Khrih kong a chimmi kannih cu Pathian caah rimhmui bantuk kan si. Mah rimhmui cu khamh a si hngami le hrawh a si hngami hna lakah aa zel.
16 Hrawh a si hngami hna caah thihnak ah a hruaimi thihnak rim a si. Khamh a si hngami hna caah nunnak ah a hruaimi nunnak rimhmui a si. Cu bantuk rian caah ahodah sining a tlinh?
17 Kanmah nih kan tlinh. Zeicahtiah kannih cu midang bantuk in Pathian bia kha khuazakip ah vak in a zuarmi kan si lo, Pathian hmaiah Khrih zultu in le Pathian thlahmi in lungtak tein a chimmi kan si.
Footnotes
^ Asiloah “kan sinin caanṭha aa lak nakhnga lo.”
