Korin Pahnihnak 3:1-18
3 Nan sinah kanmahle kanmah i hngalhter ṭhan a hau maw? Asiloah mi cheukhat bantuk in kan kong i chimthiamnak ca kha nan sinah pek asiloah nan sinin lak a hau maw?
2 Kan lungthin chung ah aa ṭialmi, mi vialte nih an hngalh i an relmi kan ca cu nanmah hi pei nan si cu.
3 Nannih cu Pathian rianṭuantu a simi kanmah nih kan ṭialmi, Khrih ca nan si ti cu a fiang ko. Mah ca cu cahang in ṭialmi a si lo, a nungmi Pathian thlarau in ṭialmi a si. Lungtlap cung ah ṭialmi si loin lungthin chung ah ṭialmi a si.
4 Khrih thawng in Pathian hmaiah cu bantuk zumhnak kan ngei.
5 Zei bantuk rian hmanh ṭuan awkah kanmah tein sining kan tlinh lo. Pathian thawng in sining kan tlinhmi a si.
6 Biakamnak thar i rianṭuantu in sining a kan tlinhtertu cu Pathian a si. Ṭialmi nawlbia tang ah si loin thiang thlarau lamhruainak tang ah a ṭuanmi kan si. Ṭialmi nawlbia nih thihnak a chuahpi i thlarau nih nunnak a chuahpi.
7 Thihnak a chuahpimi nawlbia, lung cung ah ṭialmi nawlbia kha Moses nih a pek hna lioah a hmai cu sunparnak in a ceu caah Israel mi nih an zoh kho lo. A lo zau dingmi hmanh mah tluk in sunparnak a ngeih ahcun,
8 thlarau nih a chuahpimi cu sunparnak a ngei chinchin lai lo maw?
9 Sualphawtnak a chuahpimi nawlbia hmanh sunparnak a ngeih ahcun miding si awkah a bawmmi rian cu zeitluk in dah sunparnak a ngeih chinchin lai!
10 Nawlbia i a sunparnak cu biakamnak thar i a sunparnak he tahchunh ahcun zeihmanh a si lo.
11 A lo hnga dingmi nawlbia hmanh sunparnak in pek a si ahcun a hmun dingmi biakamnak thar cu zeitluk in dah sunparnak a ngeih chinchin lai!
12 Mah bantuk ruahchannak kan ngeih caah zalong tein biachimnak nawl kha kan hman.
13 A lo hnga dingmi nawlbia a sunparnak kha Israel mi nih an zoh khawh nakhnga lo Moses nih a hmai a rak i khuh bantuk in kannih cu kan tuah lo.
14 Asinain an lungthin cu a molmok. Nihin ni tiang an lungthin cu hmaikhuh in khuhmi bantuk a si caah biakamnak hlun kha an hngalthiam lo. Zeicahtiah Khrih thawng lawng in mah hmaikhuh cu lak khawh a si.
15 Cun nihin ni tiang hmanh ah an lungthin cu khuh a si rih caah Moses nawlbia kha an hngalthiam kho lo.
16 Asinain mi pakhat cu Jehovah* lei ah aa mer tikah mah hmaikhuh cu lakpiak a si.
17 Jehovah* cu Thlarau a si, Jehovah* thlarau a umnak paoh ah zalonnak a um.
18 Hmaikhuh lakpiakmi kan dihlak in Jehovah* sunparnak kha thlalang bantuk in kan langhter. Thlarau a simi Jehovah* duhnak ning tein* Pathian he kan i lawh nakhnga le a sunparnak kan langhter chinchin khawh nakhnga thlen kan si.
Footnotes
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ Asiloah “Jehovah thlarau duhnak ning tein” ti zong a si kho.