Korin Pahnihnak 4:1-18
4 Kan cung ah langhtermi zaangfahnak thawng in mah rian hi kan ṭuan khawhmi a si caah kan lung a dong bal lo.
2 Ningzah awk a simi, a thlithup in tuahmi thil kha kan hlawt hna. Zertian in kan nung lo, Pathian bia zong kha kan merh lo. Asinain biatak kha kan langhternak thawng in Pathian hmaiah mi vialte caah* zohchunh awk ṭha kan hung si.
3 Kan chimmi thawngṭha cu khuh a si ahcun hrawh a si hngami hna ca lawng ah khuh a si lai.
4 Hi vawlei* pathian nih zumlotu hna kha an lungthin mit a cawtter. Cucaah Pathian muisam kengtu Khrih he aa tlaimi, sunparnak in a khatmi thawngṭha i a ceunak kha an hmu kho lo.
5 Kan chimmi cu kanmah kong si loin Jesuh Khrih cu Bawipa a si timi le kannih cu Jesuh caah nan sal kan si timi kong kha a si.
6 “Muihnak chung in ceunak ceu seh” tiah a titu cu Pathian a si i kan lungthin chung ah ceunak a ceuter. Mah ceunak cu Khrih hmai ah a langmi sunparnak in a khatmi Pathian kong hngalhnak kha a si.
7 Tlak um bantuk a simi kannih nih mah rothil hi kan ngei. Cucaah a hleikhunmi ṭhawnnak cu kanmah sinin si loin Pathian sinin kan hmuhmi a si ti cu a fiang.
8 A lam kip in nam chih kan si nain cawl kho lo tiang cu kan si lo; lungawṭawm in kan um nain chuahnak lam ngei lo tiang cu kan si lo;*
9 hrem kan si nain hlawt kan si lo; tlu lakin tuk kan si nain hrawh kan si lo.
10 Kannih cu Jesuh bantuk in kan nunnak caah ṭih a nungmi thil kan tong zungzal. Cuticun Jesuh nih harnak a in bantuk in kan ing ve ti a lang.
11 Kannih cu kan nung ko nain Jesuh ruang ah thihnak kan tong deng lengmang. Cuticun Jesuh nih harnak a in bantuk in kan ing ve ti a lang.
12 Kannih cu thihnak kan tong deng lengmang nain mah nih nanmah kha nunnak aan pek hna.
13 “Ka zumh caah ka chim” tiah cathiang ah aa ṭialmi zumhnak phun kha kan ngei. Kannih zong kan zumh caah kan chim ve.
14 Jesuh kha thihnak in a thawhtertu nih kanmah zong Jesuh he a kan thawhter ve lai i nanmah he Jesuh hmaiah a kan chuahpi lai ti kha kan hngalh.
15 Pathian velngeihnak a tam chinchin nakhnga mah vialte cu nanmah ṭhatnak caah a si. Zeicahtiah mi tam chin lengmang nih Pathian sinah lawmhnak bia an chim caah Pathian cu sunparnak a hmu.
16 Cucaah kan lung a dong lo, kan lenglei minung cu rawk cuahmah ko hmanh seh law kan chunglei minung cu nikhat hnu nikhat tharchuah lengmang a si.
17 Caan tawite lawng kan inmi harnak hmete nih a let tampi in a ngan deuhmi le zungzal in a hmunmi sunparnak kha a kan hmuhter.
18 Kan i zohchihmi cu hmuh khawhmi thil si loin hmuh khawh lomi thil kha a si. Hmuh khawhmi thil cu chikkhat lawng a nguh, asinain hmuh khawh lomi thil cu zungzal in a hmun.
Footnotes
^ A hrampi, “mi vialte chiaṭha thleidannak lungthin caah.”
^ Asiloah “hi chan.” Biafang Fianternak ah zoh.
^ Asiloah “hnabei dong in kan um lo” ti zong a si kho.
