Korin Pahnihnak 5:1-21
5 Vawleicung kan inn, hi thlam hi ṭheh a si lai i minung kut in sak lomi, zungzal a hmunmi inn kha Pathian nih vancung ah a kan pek lai ti kha kan hngalh.
2 Hi vawlei inn i kan um lioah vancung inn kha hmuh lai kan i ngaih tuk caah kan hrum, kan ai. Vancung inn nih thilpuan bantuk in a kan khuh te lai.
3 Vancung inn kha thilpuan bantuk in kan i hruk tikah taklawng kan si ti lai lo.
4 Hi thlam i a ummi kannih cu lungrethei ngai in kan hrum-ai. Hi thlam hi thilpuan bantuk in phoih kan duh caah si loin vancung inn kha hruk kan duh caah a si. Cuticun a thi khomi kha nunnak nih a airolh khawh lai.
5 Hi thil caah a kan timhtuahtu cu Pathian a si. Pathian nih a ra laimi thil ca i aamah khaannak ah* thiang thlarau kha a kan pek.
6 Cucaah hnangam tein kan um zungzal. Hi pum in kan um chung paoh cu Bawipa he kan i hlat ti kha kan hngalh.
7 Zeicahtiah mithmuhnak in si loin zumhnak in a kalmi kan si.
8 Hnangam tein kan um ko nain hi pum in um nakin cun Bawipa he um kha kan duh deuh.
9 Bawipa he kan um ah siseh, kan i hlat ah siseh kan i tinhnak cu amah lungton kha a si.
10 Zeicahtiah Khrih biaceihnak ṭhutdan hmaiah kan dihlak in kan chuak te lai. Hi pum in kan nun lio i a ṭha siseh, a chia siseh kan tuah ning cio in biaceih kan si lai.
11 Bawipa cu ṭih ding a si ti kha kan hngalh caah kan cawnpiaknak kha mi nih an cohlan nakhnga kan i zuam. Zei bantuk mi dah kan si ti kha Pathian nih ṭha tein a hngalh. Nannih zong nih* ṭha tein nan hngalh lai tiah kaa ruahchan.
12 Kanmahle kanmah i thangṭhat awkah kan i zuam ṭhanmi a si lo. Kan kong he aa tlaiin nan i uanthlar khawh nakhnga kan chimmi a si. Cuticun lungthin zoh loin lenglang zoh in aa porhlawmi hna kha an bia nan leh khawh hna lai.
13 Mihrut bantuk in thil pakhatkhat kan tuah ahcun Pathian caah kan tuahmi a si. Mifim bantuk in kan tuahmi a si ahcun nanmah ṭhatnak caah a si.
14 Khrih dawtnak nih a kan forh, cucaah hitin kan chim khawh: mi pakhat cu mi vialte caah a thi; mi vialte cu a thimi an si cang caah mah cu a herhmi a si.
15 Mi vialte caah a thihnak chan cu minung nih anmah caah nung ti loin an caah a thi i a tho ṭhanmi pa caah an nun nakhnga a si.
16 Cucaah atu thawk in ahohmanh kha minung hmuhnak in kan hmu ti hna lo. A hlanah Khrih kha minung hmuhnak in kan rak hmuh nain atu ah cun cutin kan hmu ti lo.
17 Khrih he lungthin khat tein a ummi paoh cu ser tharmi an si; thil hlun cu an lo cang; zoh hmanh! thil thar cu an hung um cang.
18 Thil vialte cu Pathian sinin a rami a si. Pathian nih Khrih thawng in amah he a kan remter cang i remternak rian kha a kan pek.
19 Mah cu Khrih thawng in minung kha Pathian he remternak kha a si. Pathian nih an sualnak kha aa cinken ti lo. Mah remternak bia kha chim awkah rian a kan pek.
20 Cucaah kannih cu Khrih aiawh in lamkaltu kan si. Pathian nih kanmah hmang in mi pawl kha a nawlmi hna bantuk a si. Khrih aiawh in “Pathian he i rem ṭhan ko u” tiah kan nawl hna.
21 Khrih thawng in Pathian hmaiah miding kan si khawh nakhnga sualnak a tuah bal lomi pa kha Pathian nih kan caah sual raithawinak in a pek.
Footnotes
^ Asiloah “pek chungmi tangka caah.”
^ A hrampi, “Nan chiaṭha thleidannak lungthin zong in.”
