Korin Pahnihnak 6:1-18
6 Pathian rianṭuanṭi hawi in Pathian vel kha nan hmuh hnuah mah kha pakpalawng i canter lo ding in kan in forh hna.
2 Zeicahtiah “Mithmai ṭha pek caan ah na bia kha ka theih. Khamhnak ni ah kaan rak bawmh” tiah Pathian nih a ti. Zoh hmanh! Atu hi a hleiin mithmai ṭha peknak caan a si. Zoh hmanh! Atu hi khamhnak ni a si.
3 Kan rianṭuannak ah mi nih sual an kan phawt nakhnga lo tlukrilhter khotu zei thil hmanh kan tuah lo.
4 Pathian rianṭuantu kan si kha lam a phunphun in kan langhter, hneksaknak a phunphun kan in, sifah harnak, herhbaunak le buaibainak hna kan in.
5 Tukvelhnak, thongthlaknak, mibu nih buai hnawhnak kan tong. Har ngai in rian kan ṭuan, hngilh lo le rawl loin kan um;
6 a thiangmi nunning in kan nung, hngalhnak ning in kan nung, lungsaunak le zaangfahnak kan langhter, thiang thlarau lamhruainak kan zulh, i titernak a um lomi dawtnak kan langhter.
7 Biatak kan chim, Pathian ṭhawnnak kha kan i bochan i kan orhlei kut* le kan kehlei kut* in dinnak hriamnam kha kan i tlaih.
8 Hlorh kan si caan a um i thangchiat kan si caan zong a um, thangṭhat kan si caan a um i sualphawt kan si caan zong a um, bia dik kan chim nain hlengtu ah an kan ruah.
9 Pathian nih a kan hngalh nain mi nih hngalh lomi in, kan nung ko nain thih awkah aa tlakmi in, thihdan pek kan si lo nain dantatmi in an kan ruah.
10 Kan i nuam zungzal nain a ngaih a chiami in, mi tampi kha kan rumter hna nain a si a fakmi in, zeizong vialte kan ngei nain zeihmanh a ngei lomi in an kan ruah.
11 Korin khuami hna, nan sinah hlangfang tein bia kan chim i kan lungthin kha kaupi in kan in hunpiak hna.
12 Kan in tlaihchan hnanak cu ri a ngei lo, asinain nannih nih nan kan tlaihchannak tu ah cun ri a ngei.
13 Cucaah ka fale sin bia chim bantuk in ka chim lai—kan in pehtlaih hna ning in kan pehtlaih ve u—nan lungthin kha kaupi in hung u.
14 Zumlotu hna he aa ruang lomi hngawngkual kha i khinhṭi hlah u. Dinnak le sualnak cu zeitindah an i hawikomh khawh lai? Ceunak le muihnak cu zeitindah an i fonh khawh lai?
15 Khrih le Belial* cu zeitindah an lung aa khah khawh lai? Asiloah zumtu le zumlotu cu zeidah an i hrawm khawh lai?
16 Pathian biakinn ah siasal cu zeitindah an um khawh lai? Zeicahtiah kannih cu a nungmi Pathian biakinn kan si. Pathian nih “An lakah ka um lai i an sinah ka um lai. Kei cu an Pathian ka si lai i annih cu ka miphun an si lai” tiah a ti bantuk khan a si.
17 “‘Cucaah an sinin chuak u law a dang tein um u. A thiang lomi thil kha tawng ti hlah u’ tiah Jehovah* nih a ti.” “Cun kaan cohlan hna lai.”
18 “‘Kei cu nan pa ka si lai, nannih cu ka fapale le ka fanule nan si lai’ tiah Lianngan Bik Jehovah* nih a ti.”
Footnotes
^ Dohnak caah a si kho men.
^ Runvennak caah a si kho men.
^ “Santlai Lomi” tiah sullam a ngeimi Hebru biafang in a rami a si. Satan kha a chim duhmi a si.
^ Biafang Fianternak ah zoh.
^ Biafang Fianternak ah zoh.
