Korin Pahnihnak 7:1-16
7 Cucaah ka dawtle hna, mah biakamnak hna hi kan ngeih caah kan pum le kan lungthin a thurtertu paohpaoh in i thianh hna u sih. Pathian ṭih buin thiang chinchin in nung hna u sih.
2 Nan lungthin chung ah hmun rak kan chiahpiak u. Aho cung hmanh ah palhnak kan tuah lo, ahohmanh kan in hrawk hna lo, ahohmanh kanmah ṭhatnak caah kan in hleng hna lo.
3 Cutin ka chimmi cu sual kaan phawtmi hna a si lo. Ka chim cang bantuk in kan thih ah siseh, kan nun ah siseh kan lungthin chung ah nan um.
4 Nan kong he aa tlaiin zalong tein biachimnak nawl ka ngei. Nan cung ah kaa uangthlar tuk. Hnemhnak tampi ka hmu; harnak tampi kan tong nain lunglawmhnak in ka khat.
5 Masidonia kan phanh tikah hnangam tein kan um kho lo. A kenkip in harnak kan tong peng rih. Lenglei in ralchanhnak kan tong, chunglei in ṭihphannak kan ngei.
6 Asinain lungdongmi a hnemtu Pathian nih Titas a rak phanhnak thawng in a kan hnemh;
7 amah a phanh ruang lawng ah si loin nan rak hnemh ruang zong ah a si. Zeitluk in dah hmuh nan ka duh i nan ngaih a chiat ti le ka caah zeitluk in dah nan lungre a theih ti kha a kan chimh tikah kaa lawm chinchin.
8 Ka cakuat nih nan ngaih aan chiatter hna hmanh ah kaa ngaichih lo. (Ka cakuat nih chikkhat cu nan ngaih aan chiatter hna ti ka hngalh caah) a hmasa ah cun kaa ngaichih.
9 Asinain atu cu ka lung aa lawm. Nan ngaih a chiat caah si loin mah nih i ngaihchih ding in aan forh hna caah a si. Zeicahtiah nan ngaihchiatnak cu Pathian duhnak ning in a si. Kanmah ruang ah nan sunghmi zeihmanh a um lo.
10 Pathian duhnak ning in ngaihchiatnak nih i ngaihchihnak a chuahter i khamhnak a hmuhter, cucaah i ngaihchih awk zeihmanh a um lo. Asinain hi vawlei he aa tlaimi ngaihchiatnak nih thihnak a chuahter.
11 Pathian duhnak ning in ngaihchiatnak nih a hmaanmi thil tuah awkah nan lung a thawhter ti cu a fiang ko. Nan min nan thianter, sualnak ruang ah nan thin a hung, Pathian kha nan ṭih, i ngaihchih nan duh, Pathian kha lungtak tein nan biak, palhnak kha remh nan duh. Mah kongkau ah sualnak a ngei lomi nan si kha a lam kip in nan langhter.
12 Nan sinah cakuat ka rak ṭialmi cu palhnak a tuahtu caah a si lo i a ingtu ca zong ah a si lo. Kan bia ngaih nan duh taktak ti kha Pathian hmaiah nan langhter khawh nakhnga caah a si.
13 Cucaah kannih cu hnemhnak kan hmu.
Hnemhnak kan hmuh leng ah lawmhnak zong kan hmu. Zeicahtiah nan dihlak in Titas kha hrimhnak nan rak pek i aa lawmhmi kha kan hmuh caah a si.
14 Amah sinah nanmah kong he aa tlaiin kaa chawrmi cu ka ning a zak lo. Nan sinah kan chimmi vialte cu a hmaanmi a si bantuk in Titas sinah kan i chawrmi zong a hmaanmi a si.
15 Nawlngaihnak nan langhtermi le upatnak in nan rak cohlanmi kha a philh lo i aan tlaihchan hnanak cu a fek chin.
16 Zeizong kip ah zumh khawh nan si caah* ka lung aa lawm.
Footnotes
^ Asiloah “nanmah thawng in thazaang ka hmuh caah” ti zong a si kho.
