Korin Pahnihnak 8:1-24
8 Unau hna, Masidonia ram i Khrihfabu hna nih Pathian vel an hmuhnak kong kha hngalhter kan in duh hna.
2 Fakpi in hneksaknak an tong i harnak an ing ko nain lunglawmhnak in an khat. An si a fak tuk ko nain an siang ngaingai.
3 An si khawh tawk in an pek i an si khawh leng tiang hmanh an pek tiah ka chim ngam.
4 Thawhlawm peknak tinvo sung hmuh awk le mithiang mi hna ca i har tongmi bawmhnak rian ah i tel ve awkah anmahlei in an kan nawl lengmang.
5 Kan i ruahchanmi leng in an tuah. Pathian duhnak ning in a hmasa bik ah Bawipa caah an i pe, cun kanmah ca zong ah an i pe.
6 Titas nih nan sinin thawhlawm kholhnak rian kha a thawk caah mah rian kha liim ding in kan forh.
7 Zei thil paoh kha a ṭha bik in nan tuah, nan zumhnak a fek, biachim nan thiam, hngalhnak tampi nan ngei, zei thil paoh kha teima tein nan tuah, kan in dawt hna bantuk in midang kha nan dawt hna. Cucaah atu thawhlawm peknak zong ah siang ngai in i tel ko u.
8 Cutin ka chimmi cu nawl kaan pekmi hna a si lo. Midang an lungthawhnak kha hngalhter awk le dawtnak taktak nan ngeih le ngeih lo hneksak awkah a si.
9 Kan Bawipa Jesuh Khrih vel cu nan hngalh ko. Anih cu a rak rum ko nain nan caah misifak a hung si, mah cu a sifahnak thawng in nan rum khawh nakhnga caah a si.
10 Hi kong ah hin ruahnak cheuh kaan duh hna: Hi rian nan ṭuanmi cu nanmah ṭhatnak caah a si. Kan hnu kum zong ah mah rian kha ṭuan nan duh lawng si loin nan rak thawk taktak.
11 Cucaah nan thawk cangmi rian kha rak liim u. Nan rak thawk lio bantuk in atu zong ah nan si khawh tawk in lungtho tein pe u.
12 Lungtho tein pekmi kha Pathian nih a cohlan. Ngeih lomi kha si loin ngeihmi tu kha pek awkah Pathian nih aa ruahchan.
13 Nan cung ah thilrit khinh in midang an thil zanter kha ka duh lo.
14 Asinain nan i ruan khawh nakhnga atu ah a hlei in nan ngeihmi kha midang an herhbaumi bawmhnak ah hmang u, annih zong nih a hlei in an ngeihmi kha nan herhbaumi bawmhnak ah an hman ve lai. Cuticun nan i ruang kho lai.
15 “Tampi a ngeimi nih a hleihluat in a ngei hlei lo, tlawmte lawng a ngeimi zong a chambau hlei lo” tiah cathiang ah aa ṭial bang khan a si.
16 Titas cu kanmah bantuk in nan cung ah zawnruahnak a ngeih caah Pathian kha kan lawmh.
17 Titas nih nan sinah rat ding in kan fialmi kha a cohlan. Amah theng zong nih rat a duh tuk caah amah lungtho tein a ra.
18 Thawngṭha chimnak ah Khrihfabu kip nih an thangṭhat ngaimi unaupa pakhat zong a sinah kan rak thlah ve.
19 Mah unaupa cu thawhlawm phawtzamhnak rian bawmh awkah kan khualtlawnnak ah zulh ding in Khrihfabu kip nih rian an pekmi zong a si. Mah rian nih Bawipa kha sunparnak a pek i midang bawmh awkah timhcia kan si zong a langhter.
20 Siang ngai in nan pekmi thawhlawm phawtzamhnak rian ah ahohmanh nih sual an kan phawt nakhnga lo kan i ralring.
21 ‘Jehovah* mithmuh lawng ah si loin minung mithmuh zong ah zeizong vialte kha dingfel tein kan tuah.’
22 Mah leng ah voi tampi kan hneksak i thil sining tampi ah a teima tiah kan hmuhmi unaupa pakhat zong anmah he kan rak thlah. A hmaanmi thil nan tuah lai ti kha a hngalh caah atu cu a teima chinchin.
23 Pakhatkhat nih Titas kong ah lunghrinnak a ngeih ahcun anih cu ka hawikom le nan ca ṭhatnak a duhmi ka rianṭuanṭi hawi a si ti kha va chim u. Unaupa hna kong ah lunghrinnak a ngeih ahcun annih cu Khrihfabu aiawhtu* le Khrih sunparnak an si ti kha va chim u.
24 Cucaah nan dawtnak kha an sinah langhter u, nan kong he aa tlaiin kan i uanthlarnak cu a lak a si lo ti kha Khrihfabu vialte sinah langhter u.
