Korin Pahnihnak 9:1-15
9 A tak ti ahcun mithiang mi hna bawmhnak* kong he aa tlaiin nan sinah caṭial a herh lem lo.
2 Zeicahtiah bawmh nan duh hna ti kha ka hngalh. Akhaia mi cu nanmah bawmh awkah timhcia an sinak kumkhat a si cang tiah Masidonia mi hna sinah kaa chawr. Nan lungthawhnak nih mi tampi kha an lung a thawhter ve hna.
3 Nan kong he aa tlaiin kan i chawrnak cu a lak a si nakhnga lo le ka chim ning in timhcia nan si khawh nakhnga mah unau pawl hi ka rak thlah hna.
4 Masidonia mi hna he kan rat tikah timhcia nan si lomi kha kan hmuh ahcun nanmah cu chim lo, kanmah hmanh kan ning a zak tuk lai. Zeicahtiah kan in zumh tuk fawn hna.
5 Cucaah siang ngai in pek awkah bia nan i kammi laksawng kha rak kholh chung ding in mah unau pawl hi thlah hmasa a herh tiah ka ruah. Cuticun kan rak phanh tikah laksawng cu timhcia in a um lai i hnekchom in si loin siang ngai in nan pekmi a si kha a lang lai.
6 Ka chim duhmi cu tlawmte lawng a tuhmi nih cun tlawmte lawng a zun ve lai i tampi a tuhmi nih cun tampi in a zun ve lai.
7 Ahopaoh nih a lung chung i bia a khiah ning tein pe ko seh. Sian lo buin le hnekchom buin pe hlah seh, zeicahtiah lunglawm tein a pemi kha Pathian nih a dawt hna.
8 Mah leng ah Pathian nih a vel kha tampi in aan pek khawh hna. Cucaah nan herhbaumi zeihmanh a um lai lo. Thilṭha a phunphun tuah khawh awkah a herhmi vialte kha tampi in nan ngei lai.
9 (“Siang ngai in a phawt hna; misifak kha a pek hna. A dinnak cu zungzal in a hmun” tiah cathiang ah aa ṭial bang khan a si.
10 Thlaici tuhtu kha thlaici a pe i ei awk tampi a petu Pathian nih nannih zong tuh awkah thlaici aan pek hna lai i a karhter lai. Nan dinnak theipar kha tampi in aan zunter hna lai.)
11 Zeizong kip ah siannak nan langhter khawh nakhnga Pathian nih a lam kip in thluachuah aan pek hna. Cuticun kanmah thawng in mi nih Pathian kha an lawmh lai.
12 Mipi ṭhatnak caah ṭuanmi mah rian nih mithiang mi hna herhmi kha a tlam a tlinter leng ah mi tampi kha Pathian sinah lawmhnak bia zong a chimter hna.
13 Har tongmi bawmhnak rian nih zei bantuk mi dah nan si ti kha a langhter. Nan chimmi Khrih kong thawngṭha ning in nan nun caah le an sinah siseh, mi vialte sinah siseh siannak nan langhter caah annih nih Pathian kha an thangṭhat.
14 Pathian nih nan cung ah a hleiin velngeihnak a langhter caah an in dawt tuk hna i thla an in campiak hna.
15 Bia in chim khawh lomi, a ṭha tukmi laksawng ruang ah Pathian cu lawm u sih.
Footnotes
^ A hrampi, “Mithiang mi hna ca i rianṭuannak.”
