Timote Pahnihnak 1:1-18
1 Pathian duhnak ning in le Khrih Jesuh thawng in hmuh dingmi nunnak biakamnak ning in Khrih Jesuh lamkaltu a simi Paul nih,
2 ka dawtmi ka fa Timote, ca kaan kuat:
Pa Pathian le kan Bawipa Khrih Jesuh vel, zaangfahnak le daihnak cu na cung ah um ko seh.
3 Chun he, zan he lungtak tein thla ka cam tikah nangmah kha kaan philh bal lo i Pathian kha ka lawmh. Ka pupa hna bantuk in a thiangmi chiaṭha thleidannak lungthin he Pathian kha ka biak.
4 Na mitthli a tlakmi kha ka philh lo i lunglawmhnak in ka khah nakhnga nangmah kha hmuh kaan duh tuk.
5 I titernak a um lomi zumhnak na ngeih kha kaa cinken. Mah zumhnak cu na pi Lois le na nu Zunis nih an rak ngeih hmasa i nangmah zong na ngei ve lai tiah ka zumh.
6 Cucaah ralrin pek kaan duhmi cu na cung ah ka kut ka chuan tikah na hmuhmi Pathian laksawng kha mei bantuk in a alhmi lungthawhnak he hmang zungzal.
7 Zeicahtiah Pathian pekmi thiang thlarau nih miralchia ah a kan ser lo. Ṭhawnnak, dawtnak le thleidan thiamnak tu a kan pek.
8 Cucaah Bawipa kong tehte khaan awkah na ningzak hlah, Bawipa ruang ah thong a tlami keimah zong rak ka zahpi hlah. Pathian ṭhawnnak tu i bochan law thawngṭha caah sifah harnak in awkah timhcia si ko.
9 Pathian nih a kan khamh i mithiang mi si awkah a kan auh. Cucu kanmah rianṭuannak ruang ah si loin aa tinhnak le a vel ruang ah a si. Mah a vel cu Khrih Jesuh thawng in hlanliopi in a kan pekmi a si.
10 Atu ah kan Khamhtu Khrih Jesuh a langhnak thawng in a vel cu fiang tein langhter a si cang. Khrih nih thihnak kha a hloh i nunnak le a thi kho lomi sinak kha thawngṭha thawng in a phuan cang.
11 Mah thawngṭha thanh awkah phungchimtu, lamkaltu le cawnpiaktu in rian pek ka si.
12 Cucaah atu bantuk in sifah harnak ka inmi a si, asinain ka ning a zak lo. Zeicahtiah ka zumhmi Pathian kha ka hngalh i amah ka kentermi kha biaceihnak ni tiang a kilven khawh ti zong ka zumh.
13 Ka sinin na theihmi man a ngeimi bia i a phunglam* kha i tlaih peng. Khrih Jesuh he lungthin khat tein umnak thawng in hmuhmi zumhnak le dawtnak zong langhter zungzal.
14 Kan sinah a ummi thiang thlarau bawmhnak thawng in mah ro kha kilveng.
15 Figelas le Hermogenes i telin Asia peng i a ummi vialte nih an ka kaltak ti kha na hngalh ko.
16 Bawipa cu Onesifaras te chungkhar cung ah zaangfahnak ngei ko seh. Zeicahtiah tha a ka pek lengmang i thir cikcin in khih ka simi zong a ka zahpi lo.
17 Rom a phanh tikah a ka hmuh hlan lo a ka kawl.
18 Biaceihnak ni ah Bawipa Jehovah* nih zaangfah hram ko seh. Efesa khua ah zeitluk in dah a ka zohkhenh ti kha ṭha tein na hngalh ko.
