Timote Pahnihnak 2:1-26
2 Cucaah ka fa, Khrih Jesuh langhtermi vel thawng in ṭhawng ngai in um awkah i zuam peng.
2 Ka sinin nangmah theng nih siseh, mi tampi nih siseh nan theihmi kong kha zumhawk a tlakmi pa pawl kha kenter hna. Cuticun annih zong midang cawnpiak awkah sining an tlinh ve lai.
3 Khrih Jesuh ralkap ṭha pakhat in sifah harnak in awkah timhcia si ko.
4 Ralkap a ṭuan liomi cu chawlehthalnak* ah aa tel lo. Zeicahtiah ralkap si awkah min a khumhtu lungton a duh caah a si.
5 Lentecelh aa zuammi zong zuamnak phung ning in aa zuam lo ahcun teinak luchin a hmu kho lai lo.
6 Teima tein rian a ṭuanmi lothlopa nih a lo theitlai kha a ei hmasa bik awk a si.
7 Ka chimmi hi ṭha tein ruat zungzal law Bawipa nih zeizong vialte hngalhthiam khawhnak* aan pek lai.
8 Ka chimmi thawngṭha ning in Jesuh Khrih cu thihnak in thawhter a si i David tefa a si ti kha philh hlah.
9 Mah thawngṭha ruang ah sifah harnak ka ing i misual pakhat in thongthlak ka si. Asinain Pathian bia tu cu hren khawh a si lo.
10 Pathian thimmi hna caah zeizong vialte ka inmi a si. Cuticun Khrih Jesuh thawng in khamhnak an hmu lai i zungzal sunparnak zong an hmu kho lai.
11 Hi bia hi a hmaanmi a si: Khrih he kan thihṭi cang ahcun Khrih he kan nungṭi lai;
12 kan inkhawh peng ahcun Khrih he siangpahrang in kan ukṭi lai; kan hlawt ahcun a kan hlawt ve lai;
13 zumhawktlak lo kan si hmanh ah Pathian tu cu zumhawk a tlak ko, zeicahtiah a phunglam ralchanh in thil a tuah kho lo.*
14 Hi kong hna hi theihter ṭhan lengmang hna, biafang kong ah bia i al lo awkah Pathian hmaiah cawnpiak hna.* Mah cu zeihmanh man a ngeih lo leng ah a ngaitu hna caah rawhralnak tu a chuahter.
15 Pathian cohlanmi in, a rian ah i zahpi awk a um lomi rianṭuantu in le Pathian Bia* thiam ngai in a cawnpiak khotu in nangmahle nangmah naa pekchanh khawh nakhnga na si khawh chung in i zuam.
16 A thiangmi thil a upat lomi pakpalawng bia kha hrial hna, zeicahtiah mah nih Pathian he a hlatter chinchin.
17 Mah bia cu titsa a tloltermi hmachia bantuk a si. Cu bantuk bia a chimmi lakah Himanias le Felitas zong an i tel.
18 Annih nih thawhṭhannak cu a um cang tiah an ti i anmah theng biatak in lam an pial leng ah mi cheukhat zumhnak zong an hrawh.
19 Asinain Pathian nih a dirhmi hram cu fek tein a dir ko. Mah hram cung ah “Jehovah* nih amah ta a simi kha a hngalh hna,” “Jehovah* min a aumi paoh nih dinlonak kha kaltak hna seh” tiah lungca ṭialmi bantuk in aa ṭial.
20 Inn nganpi chung ah sui um le ngun um lawng si loin thing um le vawlei um zong an um. Um cheukhat cu a sunglawi deuh in hmanmi an si i a cheu tu cu a sawhsawh in hmanmi an si.
21 A sawhsawh in hmanmi um he aa cawh lomi cu a dang tein chiahmi, a ngeitu caah san a tlaimi le rian ṭha phun kip caah timhcia a simi a si lai i a sunglawi deuh in hmanmi um a si lai.
22 Cucaah no lio pumsa duhnak kha zamtak hna. Lungthin thiang in Bawipa a aumi hna he dinnak, zumhnak, dawtnak le daihnak ngeih awkah i zuam.
23 Mah leng ah hruhnak men a si i sullam a ngei lomi bia alnak hna kha hrial, mah nih i siknak lawng a chuahter ti kha na hngalh ko.
24 Bawipa sal cu aa simi a si awk a si lo. Mi vialte cung ah a nun a nemmi,* cawnpiak awkah sining a tlinhmi, midang palhnak a ing khomi,
25 ralchanh a hmangmi kha nem tein a cawnpiak khomi a si lai. Annih cu an i ngaihchih* i biatak kong hmaan tein an hngalh nakhnga Pathian nih caanṭha a pekmi hna a si kho men.
26 Mah tikah Satan nih a duhnak tuahter awkah a nung in a kan tlaih ti kha an hun hngalh lai, an lung a hung fim lai i a rap in an luat lai.
Footnotes
^ Asiloah “nifatin rianṭuannak” ti zong a si kho.
^ Asiloah “thleidan khawhnak.”
^ Asiloah “amahle amah aa hlaw kho lo.”
^ A hrampi, “felfai tein tehte khang.”
^ A hrampi, “biatak bia.”
^ Biafang Fianternak ah zoh.
^ Biafang Fianternak ah zoh.
^ Asiloah “fimkhur tein a ummi.”
^ Asiloah “an lungput aa thleng.”
