Timote Pahnihnak 3:1-17
3 Ni hmanung bik caan cu a har tukmi caan a si lai ti kha hngal u.
2 Zeicahtiah mi cu amahle amah lawng aa dawmi, tangka a duh tukmi, aa porhlawmi, a lung a puammi, thangchiat a hmangmi, nulepa bia a ngai lomi, lawmh a hngal lomi, zumhawk a tlak lomi,
3 mi a tlaihchan lomi, midang he hnatlaknak a ngei kho lomi, mi congawih a hmangmi, mahle mah aa uk kho lomi, a puarhrangmi, ṭhatnak a huami,
4 mi rawi a hmangmi, a lung a khongmi, a ruam a kaimi, Pathian kha dawt loin nuamhnak lawng a duhmi,
5 Pathian lei aa zuammi bantuk in aa umter nain a nunnak ah a langhter lomi an si lai; cu bantuk mi kha hrial hna.
6 Cu hna lakin mi hlen a hmangmi pa pawl an hung chuak lai. Annih cu sualnak nih a nenhmi, hlen a fawimi le an lung duhnak a phunphun a zulmi nu hna inn ah a thli tein an lut i an lem khawh hna.
7 Cu nu hna cu an cawng zungzal ko nain biatak kong a hmaanmi hngalhnak an ngei kho lo.
8 Jannes le Jambres nih Moses an rak ralchanh bantuk in cu pa hna zong nih biatak kha an ralchanh. An lungthin cu a rawkral dih cikcek i zumhnak ning in an nun lo caah Pathian mithmai ṭha an hmu lo.
9 Asinain Jannes le Jambres bantuk in an hruhnak cu zapi hmaiah langhter a si lai caah hmaiah an fong kho lai lo.
10 Nang tu cu ka cawnpiaknak, ka nunning, kaa tinhnak, ka zumhnak, ka lungsaunak, ka dawtnak le ka inkhawhnak hna kha naih tein na zulh.
11 Antiok, Ikonium le Listra khua ah ka inmi hremnak le harnak hna kha na hngalh. Mah hremnak hna kha ka in i cu vialte chung in Bawipa nih a ka khamh.
12 A tak ti ahcun zumhawktlak tein Pathian biak a duhmi, Khrih Jesuh zultu vialte cu hremnak an tong lai.
13 Miṭhalo le mi hlen hmangmi hna cu an ṭhalo chin lengmang lai i midang kha an hlen hna leng ah anmah zong hlen an si lai.
14 Nang tu cu na cawnmi kong le na zumhmi kong hna kha zul peng ko. Zeicahtiah mah kong hna cu aho sinin dah na cawn ti kha na hngalh ko.
15 Na ngakchiat lio tein* cathiang kha na rak hngalh cang, cathiang nih cun Khrih Jesuh zumhnak thawng in khamhnak aan hmuhter khotu fimnak kha aan pek khawh.
16 Cathiang hi a dihlak in Pathian thiang thlarau lamhruainak thawng in ṭialmi a si caah cawnpiaknak, palhnak langhternak, palhmi remhnak le ding tein nun ding chimhhrinhnak caah a ṭhahnemmi a si.
17 Mah nih Pathian mi kha rian ṭha phun kip ṭuan awkah sining a tlinh taktakmi le timhcia tein a ummi a siter khawh.
Footnotes
^ Hika ah hmanmi Greek biafang nih a chuakkami kha a chim duhmi a si.
