Timote Pahnihnak 4:1-22
4 Khrih Jesuh cu a langh tikah le Siangpahrang in a rat tikah a nungmi he, a thimi he bia a ceih hna lai. Amah Khrih Jesuh hmai le Pathian hmaiah fakpi in kaan nawl:
2 Pathian bia kha chim; a caan a rem ah siseh, a rem lo zong ah siseh a biapimi lungput he chim. Lungsau tein le cawnpiak thiamnak he chimhhrinh hna, fakpi in ralrin pe hna law forhfial hna.
3 Zeicahtiah man a ngeimi cawnpiaknak kha ngaih duh loin anmah duhnak kha an zulh lai i theih an duhmi kong a cawnpiaktu kha an kawl hna lai caan a phan lai.
4 Biatak kha an ngai ti lai lo i a hmaan lomi tuanbia tu kha an ngaih lai.
5 Nang tu cu zeizong kip ah fimhring tein um, harnak kha ing law thawngṭha kha chim peng. Cun Pathian pekmi rian kha tlamtling tein ṭuan.
6 Kei cu thlet thawinak bantuk in toih ka si cang i ka thih lainak caan* cu a nai cang.
7 A ṭhami raldohnak kha ka doh cang, tlikzuamnak ah a dongh tiang ka tli cang, zumhnak kha ṭha tein ka kilven cang.
8 Atu thawk in dinnak bawiluchin cu chiahpiak ka si cang. A dingmi biaceihtu Bawipa nih biaceihnak ni ah laksawng in a ka pek lai. Keimah lawng si loin a langh lainak caan aa ngaihmi vialte zong a pek hna lai.
9 A si khawh ahcun khulrang in ka sinah rak ra.
10 Demas cu hi vawlei thil* kha a tlaihchan caah a ka kaltak i Thesalonika khua ah a kal. Kresen cu Galati ram ah a kal i Titas cu Dalmatia ram ah a kal.
11 Luka lawng ka sinah a um. Marka kha rak i ratpi te. Zeicahtiah anih cu Pathian rianṭuannak ah ka caah bawmtu taktak a si.
12 Taikhikas tu cu Efesa khua ah ka thlah cang.
13 Na rat tikah Troas khua i Karpas inn ah ka chiahtakmi angki fual le cazual, a hleiin saphaw cazual hna kha rak ka phorh te.
14 Dar soser Alexander nih fahnak tampi a ka pek. Jehovah* nih a tuahmi ning in a cham te ko lai.
15 Nang zong amah kha rak i ralring, zeicahtiah kan chimmi bia kha fakpi in a doh.
16 A hmasa bik runvennak bia ka chim lioah ka sinah ahohmanh an um lo, an ka kaltak dih. An tuahsernak kha Pathian nih sual ah relpiak hram hna hlah seh.
17 Asinain keimah thawng in phungchim rian liim a si nakhnga le miphun vialte nih thawngṭha an theih khawh nakhnga Bawipa cu ka pawng ah a dir i ṭhawnnak a ka pek. Chiandeih kaa zong in a ka khamh.
18 Bawipa nih ṭhatlonak phun kip in a ka luatter lai, a ka khamh lai i vancung Pennak ah a ka luhpi lai. Bawipa cu zungzal in zungzal tiang sunparnak hmu kho seh. Amen.
19 Priska* le Akuila le Onesifaras te chungkhar kha an kut rak ka tlaihpiak te hna.
20 Erastas cu Korin khua ah a taangta. Trofimas cu a dam lo caah Melitas khua ah ka kaltak.
21 A si khawh ahcun khuasik a tlak hlanah phanh rak i zuam.
Zubulas, Pudens, Linas, Klaudia le unau dihlak nih na kut an in tlaih.
22 Ziaza ṭha na langhter caah Bawipa nih in umpi ko seh. A vel cu na cung ah um ko seh.
Footnotes
^ A hrampi, “ka luat lainak caan.”
^ Asiloah “hi chan.” Biafang Fianternak ah zoh.
^ Biafang Fianternak ah zoh.
^ Prisilla.
