Efesa 4:1-32
4 Bawipa ruang ah thong a tlami keimah nih auh nan sinak he aa tlakmi nunning in nung u tiah kaan nawl hna.
2 Toidor tein le lungnem tein um zungzal u. Lungsaunak ngei u law pakhat le pakhat dawtnak in i ing u.
3 Pakhat le pakhat rem tein um u. Thiang thlarau thawng in nan hmuhmi lungrualnak kha kilven awkah fakpi in i zuam u.
4 Auh nan simi cu ruahchannak pakhat caah a si bantuk in pum pakhat lawng a um i thlarau pakhat lawng a um;
5 Bawipa pakhat, zumhnak pakhat, tipil innak pakhat lawng a um;
6 mi vialte Pa a simi Pathian cu pakhat lawng a um, amah cu mi vialte cung ah a um i mi vialte thawng in mi vialte sinah rian a ṭuan.
7 Khrih nih laksawng a kan pek ning cio in kan dihlak in Pathian vel kha kan hmuh.
8 Cathiang ah “Cunglei a kai tikah tlaihmi sal hna kha aa kaipi hna; mah mi hna kha laksawng ah a pek ṭhan hna” tiah aa ṭial.
9 “A kai” ti tikah zeidah a chim duhmi a si? Tanglei vawlei ah a rak ṭum tinak a si.
10 Vawlei ah a rak ṭummi pa cu zeizong vialte tlinter awkah van vialte* nakin a san deuhnak ah a kaimi pa kha a si.
11 Amah nih a cheu kha lamkaltu, a cheu kha profet, a cheu kha thawngṭha chimtu, a cheu kha tuukhal le cawnpiaktu in a pek hna.
12 Mah cu mithiang mi hna kha lam ding ah chiah awk,* Khrihfabu rian ṭuan awk le Khrih pum* kha ṭhanter awkah a si.
13 Cuticun kan dihlak in zumhnak le Pathian Fapa kong hmaan tein hngalhnak thawng in lungrual tein kan um lai i nutling, patling kan hung si lai. Khrih bantuk in nutling, patling sinak taktak kha kan phan lai.
14 Cucaah ngakchia bantuk kan si awk a si ti lo, zeicahtiah hlen hmangmi hna le a fimzermi hna i a hmaan lomi cawnpiaknak a zulmi cu thlitu le tilet nih khatlei, khatlei ah a choihmi tilawng bantuk an si.
15 Kannih tu cu a hmaanmi bia kha chim in dawtnak kan langhter awk a si. Cuticun lu a simi Khrih kha i zohchunh in zeizong vialte ah nutling, patling kan hung si kho lai.
16 Khrih thawng in pum cu a ningpi in ningcang tein aa pehtonh dih. Pum nih a herhmi kha pek awkah hliah le caang vialte cu hmunkhat ah rian an ṭuanṭi. Pum ṭengnge vialte zong nih anmahle an rian cio an ṭuan tikah pum cu a ningpi in dawtnak in a ṭhang.
17 Miphun dang hna bantuk in nung ti hlah u tiah Bawipa min in kaan forh hna, zeicahtiah an ruahnak cu pakpalawng lawng te a si.
18 An lungthin cu a molmok i zeihmanh an hngalh lo caah an lung mit a caw i Pathian pekmi nunnak he an i hlat.
19 Ziazalei phunglam kha an hngal ti lo i zah hngal loin thil an tuah,* a thiang lomi thil a phunphun kha hakkau ngai in an tuah.
20 Asinain Khrih cu, cu bantuk mi a si lo ti kha nan cawn i nan hngalh cang.
21 A tak ti ahcun Jesuh cawnpiakmi biatak ning in nan rak theih i nan rak cawn cang.
22 Hlen hmangmi duhnak ṭhalo ruang ah a rawk chin lengmangmi nan ziaza hlun, mihlun kha i phoih awkah nan rak cawn cang.
23 Cucaah nan ruahnak le nan lungput* kha tharchuah lengmang u.
24 Dinnak taktak le zumhawktlak sinak he Pathian duhnak ning in sermi mithar kha i hruk u.
25 Cucaah i hleng ti hlah u law pakhat le pakhat a hmaanmi bia lawng i chim u. Zeicahtiah kannih cu pakhat le pakhat aa pehtlai dihmi pum ṭengnge kan si.
26 Nan thin a hun hmanh ah sualnak tuah hlah u; nan thin a hun buin ni tlakter hlah u.
27 Satan kha caanṭha pe hlah u.
28 Fir a hmangmi cu fir ti hlah seh; mah canah a herhbaumi hna kha a pekṭhenh khawh hna nakhnga a kut in rian ṭha kha fakpi in ṭuan seh.
29 Nan kaa in bia ṭhalo* kaakhat hmanh chuahter hlah u. A ngaitu caah ṭhatnak a pemi a si khawh nakhnga a caan kha zoh in thazaang a pemi bia ṭha lawng kha chim ko u.
30 Pathian thiang thlarau kha a ngaihchiatter hlah u. Tlanhnak man thawng in nan hmuh laimi luatnak ni caah thiang thlarau in hmelchunhnak khenh nan si.
31 Lungthli in i uamnak, thinhunnak, thinlinhnak, aukhuannak, volhpamhnak le ṭhatlonak vialte kha hlaw dih hna u.
32 Pakhat le pakhat i zaangfah u, nan zawn i ruat u. Pathian nih Khrih thawng in lungtak tein aan ngaihthiam hna bantuk in nannih zong pakhat le pakhat lungtak tein i ngaithiam u.
Footnotes
^ Van ah a ummi thlarau pum hna kha a chim duhmi a si.
^ Asiloah “cawnpiak awk.”
^ A sullam, “Khrihfabu.”
^ Biafang Fianternak ah zoh.
^ Asiloah “nan lungput a forhtu ṭhawnnak.”
^ A hrampi, “a thumi bia.”
