Efesa 5:1-33
5 Nannih cu Pathian dawtmi fale nan si caah Pathian kha i zohchunh u.
2 Khrih nih a kan* dawt i kan* caah rimhmui pekchanhnak le raithawinak in a nunnak kha Pathian sinah a pek bantuk in dawtnak langhter peng u.
3 Nupa sualnak,* thurhnawmhnak a phunphun le hakkauhnak hna kha a chim hmanh chim hlah u. Mah cu mithiang mi hna caah aa tlak lo.
4 Aa tlak lomi thil—ningzak a simi ziaza, hruh bia le a thurhnawmmi capo hna kha chim hlah u. Mah canah Pathian sinah lawmhnak bia tu chim u.
5 Nupa sualnak* a tuahmi, a thurhnawmmi le a hak a kaumi ahohmanh Khrih Pennak le Pathian Pennak an co lai lo ti kha fiang tein nan hngalh ko. Zeicahtiah hakkauhnak cu siasal biaknak phunkhat a si.
6 Ahohmanh pakpalawng bia in i hlenter hna hlah u. Zeicahtiah cu bantuk thil hna ruang ah Pathian thinhunnak cu nawlngai lomi hna cung ah a tlung lai.
7 Cucaah anmah he i pehtlai hlah u.
8 Nannih cu muihnak chung ah nan rak um nain atu cu Bawipa he nan i pehtlaihnak thawng in ceunak chung ah nan um cang. Cucaah ceunak fale bantuk in nung u.
9 Zeicahtiah ceunak nih a chuahtermi cu ṭhatnak a phunphun, dinnak le biatak kha an si.
10 Bawipa nih a cohlanmi thil kha hngalh awkah i zuam peng u.
11 Muihnak he aa tlaimi santlai lomi thil kha tuah ti hlah u; mah thil hna an hmaan lonak tu kha langhter deuh u.
12 Zeicahtiah a thli tein an tuahmi thil hna cu chim ding hmanh ah ningzak a si.
13 Phuan a simi thil vialte cu ceunak thawng in langhter an si. Zeizong vialte a langhtertu cu ceunak a si.
14 Cucaah Cathiang nih “Aa hngilhmi, i hlau tuah, thihnak in tho tuah. Khrih nih ceunak aan pek lai” tiah a ti.
15 Cucaah nan nunning kha ṭha tein i zoh u. Mihrut bantuk si loin mifim bantuk in um u.
16 Caan chia ah kan nun caah a caan kha a ṭha bik in hmang u.*
17 Khuaruahnak a ngei lomi bantuk si ti hlah u. Jehovah* duhnak tu kha hngalh i zuam peng u.
18 Zu ri hlah u, zeicahtiah mah nih thil ṭhalo a phunphun a tuahter.* Thiang thlarau tu in khat deuh u.
19 Salm hla, Pathian thangṭhatnak hla le thlaraulei hla in pakhat le pakhat* thazaang i pe u. Lungthin tak tein Jehovah* sinah thangṭhatnak hla sa u.
20 Zeizong vialte caah kan Bawipa Jesuh Khrih min in kan Pathian le kan Pa sinah lunglawmhnak bia chim zungzal u.
21 Khrih ṭihzah upatnak in pakhat le pakhat tang ah i dor u.
22 Nupile hna, Bawipa tang ah nan i dor bantuk in nan vale tang ah i dor u.
23 Khrih cu Khrihfabu lu a si bantuk in vale cu nupile lu an si. Khrih nih a pum a simi Khrihfabu kha a khamh.
24 Khrihfabu cu Khrih tang ah aa dor bantuk in nupile cu zeizong kip ah an vale tang ah an i dor awk a si.
25 Vale hna, Khrih nih Khrihfabu kha a dawt i a nunnak a pek bantuk in nan nupile kha daw peng hna u.
26 Khrih nih Khrihfabu kha Pathian bia a simi ti in a ṭawl i a thianter.
27 Mah cu a mithmuh ah Khrihfabu cu dotlaklonak le sawngkornak ti bantuk zeihmanh um loin thianghlim tein le soi awk um loin aa dawh nakhnga caah a si.
28 Cu bantuk in vale nih an pum an i dawt bantuk in an nupile kha an dawt hna awk a si. A nupi a dawmi cu amahle amah aa dawt a si ko.
29 Ahohmanh nih amah pum cu a hua bal lo. A pum kha a cawm i a dawt. Khrih zong nih Khrihfabu kha a cawm i a dawt ve.
30 Zeicahtiah kannih cu a pum ṭengnge kan si.
31 “Cucaah pa nih a nu le a pa kha a kaltak hna lai i a nupi he an i fon lai. Cu hna pahnih cu pumkhat an si lai.”
32 Mah a thiangmi biathli cu a biapi tuk. Khrih le Khrihfabu kong ka chimmi a si.
33 Asinain nannih zong nanmah nan i dawt bantuk in nan nupile kha nan dawt hna awk a si. Nupile zong nih nan vale kha nan upat tuk hna awk a si.
Footnotes
^ “Aan” ti zong a si kho.
^ “Nan” ti zong a si kho.
^ Greek, por·nei′a. Biafang Fianternak ah zoh.
^ Biafang Fianternak ah zoh.
^ A hrampi, “a caan caw u.”
^ Biafang Fianternak ah zoh.
^ Asiloah “uk khawh lomi a siter.”
^ “Nanmahle nanmah” ti zong a si kho.
^ Biafang Fianternak ah zoh.
