Efesa 6:1-24
6 Fale hna, Bawipa duhnak ning in nan nu le nan pa kha an nawl ngai hna u. Mah cu Pathian mithmuh ah a dingmi a si.
2 “Na nu le na pa kha upat hna” timi nawlbia hi biakamnak he pekmi nawlbia pakhatnak a si.
3 Mah biakamnak cu “Cutin na tuah ahcun na caah a ṭha lai* i hi vawlei ah na nunkhua a sau lai” timi a si.
4 Pale hna, nan fale kha an thinhunter hna hlah u. Jehovah* lamhruainak ning in cawnpiak chimhhrinh hna u law ṭhanter hna u.
5 Salle hna, Khrih nawl nan ngaih bantuk in nan minung bawile kha upatnak le ṭihzahnak he lungthin tak tein an nawl ngai hna u.
6 Minung lungton awkah mi hmuhnak lawng ah si loin* Pathian duhnak kha lungthin dihlak in a tuahmi Khrih salle bantuk in nawlngaimi si u.
7 Minung caah si loin Jehovah* caah rian ṭuan bantuk in a hmaanmi lungput he ṭuan u.
8 Sal a si ah, miluat a si ah a tuahmi thilṭha ning tein Jehovah* nih laksawng a pek lai ti kha nan hngalh ko.
9 Bawile hna, nannih zong nan salle kha cu bantuk in pehtlai ve hna u. Tlerhkhonh hna hlah u. Zeicahtiah nanmah he, nan salle he vancung ah Bawi pakhat lawng nan ngei i cu Bawi cu thleidannak a ngei lo ti kha nan hngalh.
10 A donghnak ah, Bawipa nih a liannganmi a thazaang thawng in ṭhawnnak in pe ko hna seh.
11 Satan hlenthawinak kha doh in fek tein nan dir khawh nakhnga Pathian sinin hmuhmi ralthuam kha tling tein i hruk u.
12 Zeicahtiah thi le sa a simi minung he kan i dohmi a si lo.* Cozah, nawlngeitu, hi muihnak vawlei uktu hna le vancung i a ummi thlarau ṭhalo hna he kan i dohmi a si.
13 Cucaah Pathian sinin hmuhmi ralthuam kha tling tein i hruk u. Cuticun ni ṭhalo ni ah nan ral kha nan doh khawh lai. Zeizong vialte timhcia nan si dih hnuah fek tein nan dir kho lai.
14 Cucaah biatak taisawm kha i sawmh u, dinnak ṭangphaw kha i hruk u law fek tein dir u.
15 Daihnak thawngṭha chim awkah timhcia sinak timi phanat kha i danh u.
16 Cu thil vialte leng ah zumhnak phaw nganpi kha i ken u. Mah phaw cun miṭhalo pa kahmi mei cantiang vialte kha nan hmih khawh lai.
17 Cun khamhnak luchin kha i chinh u law Pathian bia a simi thlarau vainam kha i put u.
18 Thlarau lamhruainak ning in thlacamnak le nawlnak a phunphun in zeitik caan paoh ah thlacam u. Cutin tuah khawh awkah hliphlau tein um zungzal u. Mithiang mi dihlak caah Pathian kha nawl peng u.
19 Thawngṭha he aa tlaimi a thiangmi biathli kha ralṭha tein ka chim khawh nakhnga biachim thiamnak pek awkah Pathian sinah thla rak ka campiak ve u.
20 Cuticun ka chim awk a si bantuk in mah thawngṭha kha ralṭha tein ka chim khawh lai. Kei cu thawngṭha lamkaltu ka si caah thir cikcin in hren ka si.
21 Bawipa caah zumhfek tein rian a ṭuanmi, dawtmi unau Taikhikas nih ka kong le ka sining kha a dihlak in aan chimh hna lai.
22 Kan sining kha nan hngalh lai i nan lungthin aan hnemh hna lai timi tinhnak he nan sinah ka rak thlahmi a si.
23 Pa Pathian le Bawipa Jesuh Khrih sinin daihnak le zumhnak he aa tlaimi dawtnak cu unau hna nan cung ah um ko seh.
24 A ziam kho lomi dawtnak in Bawipa Jesuh Khrih a dawmi dihlak cung ah Pathian vel cu um ko seh.
Footnotes
^ Asiloah “na hlawh a tling lai.”
^ Biafang Fianternak ah zoh.
^ A hrampi, “Mi lungton a duhmi hna bantuk in mit hmuhnak lawng ah si loin.”
^ Biafang Fianternak ah zoh.
^ Biafang Fianternak ah zoh.
^ A hrampi, “kan i paihmi a si lo.”
