Filemon 1:1-25
1 Khrih Jesuh ruang ah thong a tlami keimah Paul le kan unau Timote nih kan dawtmi kan rianṭuan hawi Filemon,
2 unaunu Afia, kan ralkap hawi Arkhipas le Filemon inn ah aa pummi Khrihfabu sinah ca kan in kuat hna:
3 Pa Pathian le Bawipa Jesuh Khrih vel le daihnak cu nan cung ah um ko seh.
4 Unaupa Filemon, na ca i thla ka cam fatin Pathian kha ka lawmh zungzal.
5 Na zumhnak kong le Bawipa Jesuh le mithiang mi vialte na dawt hnanak kong kha ka theih lengmang caah a si.
6 Nangmah he, kanmah he kan ngeihmi zumhnak nih Khrih thawng in kan hmuhmi thilṭha vialte kha hngalh awkah in forh ko seh tiah thla ka cam.
7 Na dawtnak kong ka theihmi nih a ka lawmhter ngaingai i hnemhnak a ka hmuhter. Zeicahtiah mithiang mi hna lungthin kha hrimhnak na hmuhter.
8 Cucaah zeidah na tuah awk a si ti kha Khrih lamkaltu in zalong tein chimnak nawl* ka ngei ko nain,
9 na langhtermi dawtnak ruang ah a nawl tu in kaan nawl ko lai. Zeicahtiah keimah Paul cu Khrih Jesuh ruang ah thong a tlami tarpa ka si.
10 Ka fa Onesimas caah nawl kaan duh, kei cu thong ka tlak lioah a pa bantuk ka hung si.
11 A hlanah cun na caah santlai lomi a rak si nain atu cu nangmah ca he, keimah ca he santlaimi a si cang.
12 Ka dawt tukmi Onesimas kha na sinah ka rak thlah ṭhan.
13 Thawngṭha ruang i thong ka tlak chung ah nangmah canah a ka bultawltu ding in amah hi ka sinah umter ka duh.
14 Asinain nangmah hnatlaknak um lo cun zei thil hmanh tuah ka duh lo. Thilṭha na tuahmi cu hnekchom buin si loin nangmah lungtho tein si seh ti ka duh.
15 Caan tlawmpal chung aan zamtakmi cu zungzal in na cohlan ṭhan nakhnga ca tu ah a si kho men.
16 Sal pakhat bantuk men si ti loin mah nakin a sunglawi deuhmi unau pakhat a si cang. Keimah hmanh nih ka dawt ahcun nangmah nih cun na sal he, Khrihfa unau he a simi anih cu na dawt chinchin ko lai.
17 Cucaah na hawi in na ka ruah ahcun keimah na ka cohlan lai bantuk in lungtak tein rak cohlang ve.
18 Na cung ah palhnak a tuahmi le lei aan batmi a um ahcun keimah nih kaan cham te lai.
19 A leiba kha ka cham lai tiah keimah Paul nih ka kut hrimhrim in ka ṭial. A tak ti ah cun nangmah zong na nunnak he aa tlaiin ka cung ah leiba na ngei ti kha na hngalh ko.
20 Kan pahnih in Bawipa zultu kan si caah bawmhnak kaan halmi cu rak ka tuahpiak ko. Khrih zultu in ka lungthin hi hrimhnak hmuhter ko.
21 Kaan fialmi cu na tuah lai tiah ka zumh. Ka chimmi nak tam deuh hmanh in na tuah lai ti kha ka hngalh caah na sinah ca ka rak ṭial.
22 Ka umnak ding hmun zong rak ka timhpiak. Zeicahtiah nan thlacamnak thawng in ka luat lai i nan sinah ka rak phan lai tiah kaa ruahchan.
23 Khrih Jesuh ruang ah thong a tla vemi Epafras nih na kut aan tlaih.
24 Ka rianṭuan hawi Marka, Aristarkas, Demas le Luka zong nih na kut an in tlaih.
25 Ziaza ṭha nan langhter caah Bawipa Jesuh Khrih vel cu nan cung ah um ko seh.
Footnotes
^ Biafang Fianternak ah zoh.
