Filipi 4:1-23
4 Dawtmi unau hna, nannih cu ka dawtmi le ka ngaih tukmi, kaa lawmhnak le ka bawiluchin nan si. Bawipa zultu in cuticun fek tein dir ko u.
2 Euodia le Sintekhe kha Bawipa rianṭuannak ah lungthin khat tein um awkah ka forh hna.
3 Ka rianṭuanṭi hawi taktak* a simi nangmah zong nawl kaan duhmi cu mah nu pahnih kha rak bawm peng ko hna. Annih cu keimah le Klement lawng si loin nunnak cauk ah an min ṭialmi a dang ka rianṭuanṭi hawi hna he thawngṭha chimnak ah fakpi in rian a ṭuanṭimi an si.
4 Bawipa ah i lawm zungzal ko u. Ka chim rih lai, I Lawm ko u!
5 A tlarimi nan si kha mizapi nih hngal hna seh. Bawipa cu nan pawngte ah a um.
6 Zei kong hmanh ah lungrethei in um hlah u, hal nan duhmi paoh kha thlacamnak in Pathian cu hngalhter u. Lungtak tein nawl u law lawmhnak bia chim u.
7 Cu tikah minung hngalhnak a lonh dihtu Pathian daihnak nih Khrih Jesuh thawng in nan lungthin le nan ruahnak cu a kilven lai.
8 A donghnak ah unau hna, a hmaanmi thil, a biapi ah chiah dingmi thil, a dingmi thil, a thiangmi thil, duh a nungmi thil, upat awk a tlakmi thil, a ṭhami thil le thangṭhat awk a tlakmi thil hna kha ruat peng ko u.
9 Ka sinin nan cawnmi le nan cohlanmi, nan hmuhmi le nan theihmi kha zul hna u. Cuticun daihnak Pathian cu nan sinah a um lai.
10 Atu ah ka cung ah zawnruahnak nan langhter ṭhan caah Bawipa zultu pakhat in kaa lawm tuk. Ka cung ah zawnruahnak nan ngei zungzal ko nain langhternak caanṭha tu cu nan rak ngei lo.
11 Ka herhbaumi a um ruang ah ka chimmi a si lo. Zei bantuk thil sining paoh ah lungsinak ngeih awkah ka cawn cang.
12 Bawmhnak tlawmte ka hmuh ah siseh, tampi ka hmuh ah siseh um zia ka thiam cang. Ka paw a khim ah siseh, a ṭam ah siseh, thil tampi ka ngeih ah siseh, ka ngeih lo ah siseh, zeizong kip ah, thil sining kip ah lungsi hnangam tein um khawh ning biathli kha ka cawn cang.
13 Zeicahtiah ṭhawnnak a ka petu Pathian thawng in zei thil paoh ka tuah khawh.
14 Harnak ka ton tikah nan ka bawmhmi cu thilṭha nan tuah a si.
15 Filipi khuami hna, a voikhatnak thawngṭha nan theih hnu Masidonia in ka chuah tikah kaan pekmi hna bawmhnak ruangah nanmah dah ti lo cun zei Khrihfabu hmanh nih bawmh ve an ka duh lo* ti kha nan hngalh ko.
16 Thesalonika khua i ka um lioah ka herhmi kha voikhat lawng si loin voihnih tiang nan ka kuat.
17 Nan sinin laksawng kaa ruahchanmi a si lo. A miak tam deuh a hmuhtermi thilṭha tu tuahter kaan duh hna.
18 Asinain atu cu ka herhmi vialte ka ngei dih, a hlei hmanh in ka ngei. Epafroditas sinin nan ka kuatmi laksawng kha ka hmuh caah zeihmanh ka bau lo. Nan laksawng cu rimhmui, Pathian duhmi le cohlanmi raithawinak bantuk a si.
19 Sunparnak in a khatmi Pathian zong nih nan herhmi vialte kha Khrih Jesuh thawng in tling tein aan pek hna lai.
20 Kan Pa Pathian cu zungzal in zungzal tiang sunparnak hmu ko seh. Amen.
21 Khrih Jesuh he lungthin khat tein a ummi mithiang mi vialte kha an kut ka tlaihpiak hna u. Ka sin i a ummi unau hna zong nih nan kut an in tlaih hna.
22 Mithiang mi vialte, a hleiin Sizar* innchungkhar nih nan kut an in tlaih hna.
23 Ziaza ṭha nan langhter caah Bawipa Jesuh Khrih vel cu nan cung ah um ko seh.
Footnotes
^ A hrampi, “Ka hngawngkual khinhṭi hawi taktak.”
^ A hrampi, “peknak le hmuhnak ah an ka hrawm lo.”
^ Asiloah “Rom Siangpahrang.”
