Galati 2:1-21
2 Kum 14 hnuah Barnabas he Jerusalem khua ah kan kal ṭhan, Titas zong kaa kalpi.
2 Ka sinah phuanmi bia ruang ah ka kalmi a si. Cuka ah hmaizah ngaimi unaupa hna he lawng kan i tong i miphun dang sinah ka chimmi thawngṭha kong kha ka chimh hna. Mah cu ka ṭuan liomi rian siseh, ka rak ṭuanmi rian siseh pakpalawng a si nakhnga lo caah a si.
3 Ka sinah a kal vemi Titas cu Greek mi a si ko nain cuarpar tan awkah an hne lo.
4 Asinain mah kongkau a hung ummi cu unau deu hna ruang ah a si. Annih cu Khrih Jesuh he lungthin khat tein kan um ruang ah kan hmuhmi zalonnak kha ngiat in hrawh awkah Khrihfabu chung ah a thli tein a rak lutmi an si. Annih nih nawlbia sal ah canter ṭhan an kan duh.
5 Asinain thawngṭha biatak chung ah nan hmunh peng khawh nakhnga chikkhat* te hmanh an nawl kan ngai hna lo.
6 A biapi tiah ruahmi, hmaizah ngaimi unaupa hna nih ruahnak thar an ka pekmi a um lo. Annih cu zei bantuk mi an si hmanh ah ka caah an i thleidannak zeihmanh a um hlei lo. Zeicahtiah Pathian nih cun lenglang a zoh lo.
7 Peter nih cuarpar tanmi hna sinah thawngṭha chimnak rian a hmuh bantuk in kei zong cuarpar tan lomi hna sinah thawngṭha chimnak rian ka hmuhmi kha an hngalh.
8 Zeicahtiah Peter kha cuarpar tanmi hna caah lamkaltu in rian a petu Pathian nih kei zong miphun dang hna caah lamkaltu in rian a ka pek ve.
9 Velngeihnak ka hmuhmi kha an hngalh tikah Khrihfabu tungpi in ruahmi Jeim, Sefas* le Johan nih Barnabas le keimah kha rianṭuanṭi hawi in kan kut an kan tlaih. Kannih cu miphun dang hna sinah kan kal lai i annih tu cu cuarpar tanmi hna sinah an kal lai.
10 Annih nih an kan cahtakmi cu misifak pawl philh lo ding lawng kha a si ko, kei zong cutin tuah awkah fakpi in kaa zuam ve.
11 Asinain Sefas* cu Antiok khua a rak phanh tikah a tuahsernak cu a palh caah hlangfang tein ka mawhchiat.
12 Zeicahtiah Jeim thlahmi mi cheukhat an phanh hlan ahcun miphun dang hna he rawl a eiṭi tawn. Asinain an phanh hnu ahcun cuarpar aa tanmi kha a ṭih hna caah anmah he a ei ti lo i aa kom ti lo.
13 A dang Judah mi hna zong amah bantuk in an hun i umter ve, Barnabas hmanh anmah bantuk in aa umter ve.
14 Thawngṭha biatak ning in an nun lomi kha ka hmuh tikah Sefas* kha an dihlak hmaiah hitin ka ti: “Nang cu Judah mi na si ko nain Judah mi bantuk si loin miphun dang bantuk in na nun ahcun miphun dang kha Judah phung zulh awkah zeitindah na forh khawh hna lai?”
15 Kannih cu Judah mi in hrin kan si i sualnak a tuahmi miphun dang bantuk kan si lo.
16 Nawlbia zulhnak thawng in si loin Jesuh Khrih zumhnak thawng lawng in miding tiah ti khawh a si ti kha kan hngalh. Cucaah nawlbia zulhnak thawng in si loin Khrih zumhnak thawng in miding tiah ti kan si nakhnga Khrih Jesuh kha kan zumh. Zeicahtiah nawlbia zulhnak thawng in ahohmanh miding tiah ti an si lo.
17 Khrih thawng in miding tiah ti kan si nakhnga kan i zuam buin misual kan si rih ko ahcun Khrih cu sualnak tuah awkah a kan forhtu a si tinak maw a si? A si hrimhrim lo!
18 Ka ṭheh cangmi kha ka sak ṭhan ahcun nawlbuartu ka si kha keimah lila nih ka langhtermi a si hnga.
19 Pathian caah ka nun khawh nakhnga nawlbia thawng in nawlbia ah ka thi cang.
20 Kei cu Khrih he tung cung ah khenh chih ka si cang. Atu i a nungmi cu keimah ka si ti lo, ka chung ah a nungmi Khrih a si. A tak ti ahcun a ka daw i ka caah a nunnak a pemi Pathian Fapa zumhnak thawng in hi pum* in ka nunmi a si.
21 Pathian velngeihnak kha ka hlaw lo. Nawlbia zulhnak thawng in miding tiah ti khawh a si ahcun Khrih a thihmi cu pakpalawng a si ko hnga.
