Galati 3:1-29
3 Maw Galati mi mihrut hna! Aho nih dah aan molhter hna? Jesuh Khrih tung cung ah khenh chih a sinak kong kha fiang tein kan in hngalhter cang ko ṭung hna.
2 Hal kaan duhmi hna pakhat cu, thiang thlarau nan hmuhmi hi nawlbia nan zulhnak thawng in maw a si, asiloah nan theihmi nan zumhnak thawng in dah?
3 Mah tluk cun maw nan hruh ko? Thiang thlarau duhnak ning in nun hram nan i thawk hnuah pumsa duhnak ning in maw nan dongh ṭhan ko lai?
4 Sifah harnak tampi nan inmi cu pakpalawng ah maw nan canter lai? Cutin a si lai lo tiah ka zumh.
5 Thiang thlarau aan petu hna le nan lakah khuaruahhar thil a tuahtu nih nawlbia nan zulh ruang ah maw cutin a tuah? Asiloah nan theihmi nan zumh ruang ah dah?
6 Abraham cu “Jehovah* a zumh caah miding ah rel a si,” a si ko lo maw?
7 Zumhnak ning in a nungmi cu Abraham fale an si ti kha nan hngalh ko.
8 Pathian nih miphun dang hna kha zumhnak thawng in miding ah a rel hna lai tiah cathiang nih a chimchung. “Nangmah thawng in miphun vialte nih thluachuah an hmuh lai” timi thawngṭha kha Abraham sinah a rak chim.
9 Cucaah zumhnak ning in a nungmi hna cu zumhnak a ngeimi Abraham bantuk in thluachuah an hmu ve.
10 Nawlbia zulhnak lawng aa bochanmi cu chiatserh an si. Zeicahtiah “Nawlbia cazual i aa ṭialmi vialte a zul zungzal lomi cu chiatserh si ko hna seh” tiah cathiang ah aa ṭial.
11 Mah leng ah “Miding mi cu zumhnak thawng in an nung lai” ti zong in aa ṭial caah nawlbia thawng in Pathian hmaiah ahohmanh miding tiah ti khawh an si lo ti cu a fiang.
12 Nawlbia cu zumhnak cung ah hram aa bunh lo. Mah canah “Nawlbia a zulmi paoh cu mah a zulhnak thawng in a nung lai” tiah aa ṭial.
13 “Thingtung cung ah thlaimi paoh cu chiatserhmi an si” ti zong in aa ṭial. Khrih nih kanmah canah chiatserhnak a innak thawng in Nawlbia chiatserhnak in a kan luatter. Cuticun a kan cawk.
14 Mah cu Abraham sin kamhmi thluachuah kha Khrih Jesuh thawng in miphun dang nih an hmuh khawh nakhnga le kannih zong kan zumhnak thawng in Pathian kamhmi thiang thlarau kha kan hmuh khawh nakhnga caah a si.
15 Unau hna, minung tonmi kong kha hmang in tahchunhnak ka chim lai: Minung tuahmi biakamnak hmanh fehter a si hnuah cun ahohmanh nih hrawh khawh, chap khawh a si ti lo.
16 Abraham le a tefa nih Pathian biakam kha an hmuh. Mah biakam ah “na tefa hna” tiah mi tam ca in a hmang lo. Mah canah “na tefa” tiah mi pakhat ca in a hman i mah cu Khrih kha a si.
17 Ka chim duhmi cu hihi a si: Kum 430 hnuah a hung ummi Nawlbia nih a hmasa ah Pathian nih a rak sermi biakamnak kha a hrawk kho lo i Abraham sin i Pathian biakam zong pakpalawng ah a canter kho lo.
18 Nawlbia zulhnak thawng in ro co a si ahcun biakammi thawng in hmuhmi a si ti hnga lo. Asinain Pathian nih Abraham kha a biakam thawng in mah ro kha a pek.
19 Cu a si ah Nawlbia cu zeicah pek a si? Biakammi tefa a rat hlan tiang mi pawl i an sualnak langhternak caah a si. Mah Nawlbia kha vancungmi hna nih remnak sertu hmang in mi kha an pek hna.
20 Biakamnak ser tikah aa telmi cu pakhat lawng a si ahcun remnak sertu a hau lo. Pathian nih mah biakamnak a ser lioah aa telmi cu amah pakhat lawng a si.
21 Cu a si ah Nawlbia cu Pathian biakam he aa ralchanh maw? Ralchanh hrimhrim hlah! Zeicahtiah nunnak a pe khomi nawlbia pek rak si seh law nawlbia thawng in miding ah rel kan si cang hnga.
22 Asinain Cathiang nih zeizong vialte kha sualnak tang ah a chiah. Mah cu Jesuh Khrih a zummi hna nih an zumhnak thawng in biakammi kha an hmuh khawh nakhnga caah a si.
23 Zumhnak a phanh hlanah cun nawlbia tang ah kan um i nawlbia nih a kan ven. Cun phuan a si dingmi zumhnak kha kan hngak.
24 Cucaah zumhnak thawng in miding tiah ti kan si khawh nakhnga Nawlbia cu Khrih sinah a kan hruaitu zohkhenhtu* a hung si.
25 Asinain atu cu zumhnak a phanh cang caah zohkhenhtu* tang ah kan um ti lo.
26 Nan dihlak in Khrih Jesuh nan zumhnak thawng in Pathian fale nan si cang.
27 Khrih chung ah tipil a ingmi nan dihlak in Khrih kha nan i hruk cang.
28 Judah mi le Greek mi, sal le miluat, nu le pa tiin a um ti lo. Nan dihlak in Khrih Jesuh he lungthin khat in nan umnak thawng in pakhat nan si cang.
29 Mah leng ah Khrih ta nan si ahcun Abraham tefa taktak, biakammi ning in rocotu nan si.
