Galati 5:1-26
5 Cu bantuk luatnak hmuh awkah Khrih nih a kan luatter cang. Cucaah fek tein dir u law sal hngawngkual kha i khinh ṭhan ti hlah u.
2 Keimah Paul nih hihi kaan chimh hna lai, cuarpar nan i tan ahcun Khrih nih a tuahmi cu nan caah ṭhathnemhnak zeihmanh a um lai lo.
3 Cuarpar aa tanmi paoh cu Nawlbia kha a dihlak in zulh awkah rian an ngei ti kha hngalhter ṭhan kaan duh hna.
4 Nawlbia zulhnak thawng in miding si awkah nan i zuam ahcun Khrih he nan i ṭhen cang. Khrih velngeihnak he nan i hlat cang.
5 Kannih tu cu zumhnak thawng in miding tiah ti kan si lai kha kan i ruahchan i thiang thlarau thawng in lungtho tein kan hngah.
6 Khrih Jesuh he lungthin khat tein a ummi caah cun cuarpar tan le tan lo cu a biapi lo, dawtnak in rian a ṭuanmi zumhnak lawng hi a biapimi a si.
7 A hlanah cun biatak lam ah ṭha tein nan rak tli ko. Biatak zulh ti lo awkah aho nih dah aan kham hna?
8 Cutin tuah awkah aho nih dah aan lemsoi hna? Nanmah aan autu hna Pathian cu a si lo.
9 Thilnu tlawmte nih chang hlum kha a ningpi in a thawhter.
10 Bawipa he lungthin khat tein a ummi nannih cu ruahnak dang nan ngei lai lo tiah ka zumh. Asinain aho an si hmanh ah hnahnawhnak aan pemi hna cu aa tlakmi biaceihnak an tong lai.
11 Unau hna, cuarpar tannak kong hi ka chim ko rih ahcun hrem ka si hnga lo. Cun tung cung i Khrih a thihnak kong ka cawnpiaknak cu tlukrilhtertu a si hnga lo.
12 Nanmah hnahnawhnak aan petu hna cu an til i dit lawlaw hna seh ti ka duh.*
13 Unau hna, luatnak hmuh awkah auh nan si. Mah luatnak kha pumsa duhnak zulhnak caanṭha ah hmang hlah u, dawtnak he pakhat le pakhat sal bantuk in nan rian i ṭuanpiak u.
14 Nawlbia vialte cu “Na minunghawi kha nangmah naa dawt bantuk in na dawt lai” timi nawlbia pakhat ah a tling dih.*
15 Pakhat le pakhat nan i seh, nan i kaoh ahcun pakhat le pakhat nan i hlohmi a si lai caah i ralring u.
16 Kaan chimh hna lai, thlarau lamhruainak ning in zul peng u law pumsa duhnak kha nan zul hrimhrim ti lai lo.
17 Pumsa duhnak cu thlarau he aa ralchan i thlarau zong pumsa duhnak he aa ralchan. Mah hna cu pakhat le pakhat aa ralchanmi an si caah tuah nan duhmi kha nan tuah kho lo.
18 Mah leng ah thlarau lamhruainak nan zulh ahcun nawlbia tang ah nan um ti lo.
19 Pumsa duhnak nih a tuah tawnmi thil hna cu fiang tein hmuh khawh an si ko. Cu hna cu nupa sualnak,* thurhnawmhnak, zah hngal loin thil tuahnak,*
20 siasal biaknak, khuachia thiamnak,* i dohnak, i siknak, nahchuahnak, thinhunnak, lung i khah lonak, ṭhencheunak, bu i ṭhennak,
21 ziarngeihnak, rihai in umnak, aukhuang cercur in puai tuahnak le cu bantuk thil dangdang hna kha an si. Hi kong he aa tlaiin ralrin kaan pek cang hna bantuk in kaan pek ṭhan hna lai, cu bantuk thil a tuahmi cu Pathian Pennak an co lai lo.
22 Asinain thlarau nih a chuahtermi ziaza* hna cu dawtnak, lawmhnak, daihnak, lungsaunak, zaangfahnak, ṭhatnak, zumhnak,
23 nemnak, mahle mah i uk khawhnak hna hi an si. Cu hna a ralchanhtu nawlbia zeihmanh a um lo.
24 Mah leng ah Khrih Jesuh ta a simi hna nih an pum kha an pumsa sinak nih a tlaihchanmi le a duhmi thil hna he tung cung ah an khenh chih cang.
25 Thlarau lamhruainak ning in a nungmi kan si ahcun thlarau lamhruainak ning in ningcang tein kal peng hna u sih.
26 Ruamkai in um hna hlah u sih. Pakhat le pakhat i zuam hna hlah u sih law ziar i ngeih hna hlah u sih.
Footnotes
^ Mah cu tilditmi an hung si tinak a si. Cucaah an cohlanmi nawlbia kha zulh awkah sining an tlinh ti lo. De 23:1 zoh.
^ Asiloah “an i funtom dih” ti zong a si kho.
^ Greek, por·nei′a. Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ A hrampi, “theitlai.”
