Galati 6:1-18
6 Unau hna, mi pakhat cu i hngalh loin lam a pial sual ahcun thlaraulei sining a ngeimi nannih nih mah pa kha nemnak lungthin he lam ding ah nan chiah ṭhan awk a si. Asinain nanmah zong tukforhnak nan ton khawh ve caah ralring tein um zungzal u.
2 Pakhat le pakhat nan thilrit i chawng u, cutin nan tuah ahcun Khrih nawlbia nan zulh a si lai.
3 Pakhatkhat nih zeihmanh si ṭung loin a biapimi ka si tiah aa ruah ahcun amahle amah aa hlen a si ko.
4 Mikip nih anmahle tuahsernak cio kha i dothlat hna seh, midang he i tahchunh hna hlah seh. Cuticun an tuahsernak he aa tlaiin lunglawmhnak an hmu lai.
5 Zeicahtiah mikip nih anmahle an thil cio kha an i phorh awk a si.
6 Mah leng ah Pathian bia cawnpiak a simi nih thilṭha vialte kha a cawnpiaktu cu hrawm ve seh.
7 Ahohmanh i hlenter hna hlah u: Pathian cu cawhdeh khawh a si lo. Zeicahtiah mi nih a tuhmi paoh kha a zun ko lai.
8 Pumsa duhnak ning in a tuhmi nih pumsa duhnak ning in rawhralnak kha a zun lai. Thlarau lamhruainak ning in a tuhmi nih thlarau lamhruainak ning in zungzal nunnak kha a zun lai.
9 Cucaah lungdong loin ṭhatnak kha tuah hna u sih, kan lung a dongh lo ahcun a caan a cut tikah a theipar kha kan zun te ko lai.
10 Cucaah caanṭha kan hmuh fatin mikip cung ah ṭhatnak tuah hna u sih. A hleiin zumtukhat a simi hna cung ah tuah hna u sih.
11 Keimah theng nih nan sinah mah cakuat hi ka rak ṭial, zeitluk in dah cafang an ngan ti kha zoh hmanh u.
12 Cuarpar tan awkah aan hnemi hna cu minung mithmai ṭha hmuh a duhmi an si. Cutin an tuahmi cu Khrih* ruang ah hrem an si nakhnga lo ca men ah a si.
13 Cuarpar aa tanmi hna hmanh nih Nawlbia vialte kha an zulh ṭung lo. Asinain cuarpar tanter an in duhmi hna cu nan pum cung i an tuahmi kong ah an i porhlawt khawh nakhnga caah a si.
14 Kei cu hremnak tung cung ah a thimi kan Bawipa Jesuh Khrih kong ah dah ti lo cun kaa porhlaw bal lai lo. Ka hmuhnak ah vawlei cu Khrih thawng in a thi cang i vawlei hmuhnak zong ah kei cu ka thi cang.
15 Cuarpar tan le tan lo cu a biapi lo, a biapimi cu ser tharmi tu hi a si.
16 Hi phunglam ningcang tein a zulmi vialte, Pathian Israel miphun cung ah daihnak le zaangfahnak um ko seh.
17 Atu thawk in ahohmanh nih hnahnawhnak ka pe ti hlah u, zeicahtiah ka pum cung ah Jesuh sal ka sinak a langhtermi hmelchunhnak khenh ka si cang.
18 Unau hna, ziaza ṭha nan langhter caah Bawipa Jesuh Khrih vel cu nan cung ah um ko seh. Amen.
Footnotes
^ A hrampi, “Khrih hremnak tung.”
