Johan 12:1-50
12 Lanhtak Puai hlan niruk ah Jesuh cu Lazaruh a umnak Bethani khua ah a rak phan. Lazaruh cu Jesuh nih thihnak in a thawhtermi kha a si.
2 Cuka ah Jesuh caah zanriah kha an timhpiak i Martha nih a bultawl hna. Lazaruh cu Jesuh he hmunkhat ah a ei ve.
3 Mah lioah Mary nih a man a fakmi nard* zihmui taktak pound khat* kha a rak i ken i Jesuh ke ah a toih, cun a sam in a hnawh i a roter. Mah tikah innchung cu zihmui rim in a khat.
4 Jesuh a rawitu ding zultu Judas Iskariot nih,
5 “Mah zihmui hi denarii* 300 ah zuar in misifak pawl pek ah a ṭha deuh lo maw?” tiah a ti.
6 Cutin a chimmi cu misifak pawl an zawn a ruah hna caah a si lo, anih cu tangka kuang tlaitu a si i a chung i an sanhmi tangka kha a fir tawn caah a si.
7 Jesuh nih Mary kong he aa tlaiin “Amah kha hnahnawhnak pe hlah u. Keimah vuinak ni caah timhtuahnak in cutin a tuahmi a si.
8 Misifak cu nan sinah an um zungzal ko lai, asinain kei cu ka um zungzal lai lo” tiah a ti hna.
9 Cuka ah Jesuh a um ti kha an theih caah Judah mi tampi cu an rak phan. Jesuh hmuh an duh ca lawng ah si loin thihnak in a thawhter ṭhanmi Lazaruh zong hmuh an duh caah a si.
10 Tlangbawi upa hna nih Lazaruh kha thah awkah a thli tein khua an khan.
11 Zeicahtiah Lazaruh ruang ah Judah mi tampi cu cuka ah an ra i Jesuh kha an zumh caah a si.
12 A thaizing ah puai i a rami mibupi nih Jerusalem khua ah Jesuh a ra ti thawng kha an theih.
13 Cucaah tum hnah kha an i put i amah don awkah an kal, cun “Pathian, amah hi khamh hram ko! Jehovah* min in a rami, Israel Siangpahrang cu thluachuah hmu ko seh!” tiah an au.
14 Jesuh nih laa fate kha a hmuh i aa cit. Cathiang ah,
15 “Zion fanu, ṭih hlah. Zoh hmanh! Na Siangpahrang cu laa fate i cit in a ra lio” tiah aa ṭial bantuk te khan a si.
16 Mah kong kha a zultu hna nih a hmasa ahcun an hngalthiam lo, asinain Jesuh nih sunparnak a hmuh tik lawng ah mah bia hna cu Jesuh kong ṭialmi a si ti le mah ning in an rak tuahpiakmi a si ti kha an hun hngalhthiam.
17 Lazaruh kha thlan in rak chuak tiah a auh i thihnak in a thawhter lioah a sinah a rak ummi mi tampi nih Jesuh kong kha tehte an khaan.
18 Mah khuaruahhar thil a tuahmi kong kha an theih caah mi tampi nih Jesuh kha an va don.
19 Cucaah Farasi mi hna nih “Nan hmu maw? Kan i timhmi vialte pakhat hmanh a hlawh a tling lo. Vawleicung mi vialte nih a hnu an zulh cang” tiah anmahle anmah an i ceih.
20 Puai caan chung ah Pathian biak ding in a rami hna lakah Greek mi tlawmpal zong an i tel.
21 Annih cu Galili peng, Bethsaida khuami Filip sinah an ra i, “Saya, Jesuh kha hmuh kan duh ko” tiah an nawl.
22 Filip nih Andru kha a va chimh. Cun Andru le Filip cu an ra i Jesuh kha an chimh.
23 Jesuh nih “Mi Fapa sunparnak a hmuh lai caan cu a phan cang.
24 Biatak kaan chimh hna lai, a hmaan tein kaan chimh hna lai, changvut fang pakhat cu vawlei ah a tlak i a rawh lo ahcun changvut fang pakhat lawng a si peng lai. Asinain a rawh ahcun a fang tampi a vui lai.
25 A nunnak a dawmi cu a nunnak a sung lai. Hi vawlei ah a nunnak a huami cu zungzal nunnak hmuh awkah a nunnak a kilvenmi a si.
26 Ka sal si a duhmi cu ka hnu an ka zulh lai i ka umnak hmun ah an um ve lai. Ka sal si a duhmi cu ka Pa nih thluachuah a pek hna lai.
27 Atu hi ka lungre a thei, zeitindah ka chim lai? Ka Pa, hi lungretheihnak caan hin ka khamh ko. Asinain hi caan cu ka cung ah a tlun hrimhrim awk a si. Mah caah pei ka rat cu.
28 Ka Pa, na min cu sunparnak pe ko” tiah a ti. Mah tikah van in aw pakhat a ra i “Sunparnak cu ka pek cang i ka pek rih ko lai” tiah a ti.
29 Cuka ah a dirmi mibu nih mah aw kha an theih tikah khuari thawng a si tiah an ti. A cheu nih cun “Vancungmi nih a chawnh” tiah an ti.
30 Jesuh nih “Mah aw a ratmi cu keimah caah a si lo, nanmah caah a si.
31 Pathian nih hi vawlei hi bia a ceih cang i hi vawlei uktu kha a ṭhawl cang lai.
32 Asinain kei tu cu vawlei in thlir ka si tikah mi vialte kha ka sinah ka hnuh hna lai” tiah a ti hna.
33 Cutin a chimmi cu zei bantuk thihnak phun in dah a thih lai ti kha a langhtermi a si.
34 Mah tikah mibu nih “Khrih cu zungzal in a hmun lai tiah Nawlbia ning in kan hngalh. A si ahcun mi Fapa cu thlir a si lai tiah zeicah na chim? Mah mi Fapa cu ahodah a si?” tiah an ti.
35 Cucaah Jesuh nih “Ceunak cu nan sinah chikkhat lawng a um cang lai. Muihnak nih aan khuh hna nakhnga lo ceunak a um lioah i chawk u; mui lakah aa chawkmi nih cun khuazei ah dah ka kal ti kha a hngal lo.
36 Ceunak a um lioah ceunak fale nan si khawh nakhnga ceunak kha zum u” tiah a ti.
Cutin a chim dih in a kaltak hna i an sinin aa thup.
37 An hmaiah khuaruahhar thil tampi a tuah ko nain an zum lo.
38 Cucaah “Jehovah,* kan chimmi bia kha aho nih dah a zumh? Aho sinah dah Jehovah* ban ṭhawnnak cu langhter a si?” timi profet Isaiah chimmi bia cu a hung tling.
39 An zumh lonak a ruang kha Isaiah nih,
40 “An mit a cawtmi le an lung a khonmi kha nawl ka awnh. Cucaah khua an hmu kho lo i a sullam kha an hngalthiam lo. Keimah sin an i mer lo caah kei zong nih an dam ṭhan nakhnga ka thlop kho ve hna lo” tiah a ti.
41 Isaiah nih Khrih sunparnak kha a hmuh caah Khrih kong he aa tlaiin cutin a chimmi a si.
42 Mah tikah Judah mi hruaitu tampi hmanh nih an zumh ko nain Farasi mi kha an ṭih hna caah Jesuh kha an cohlang lo, pumhnak inn in ṭhawl an si lai kha an phang.
43 Annih nih Pathian mithmai ṭha* hmuh nakin minung mithmai ṭha* hmuh kha an duh deuh.
44 Jesuh nih “Keimah a ka zummi cu keimah lawng si loin a ka thlahtu zong a zummi a si.
45 Keimah a ka hmumi cu a ka thlahtu zong a hmumi a si.
46 Hi vawleicung ah ceunak in ka ra, cucaah keimah a ka zummi paoh cu muihnak ah an um peng lai lo.
47 Ka bia a thei ko nain a zul lomi kha bia ka ceih hna lai lo. Hi vawlei biaceih awkah ka ra lo, hi vawlei khamh awk tu ah ka ra.
48 Ka bia zei a rel lomi le ka bia a cohlang duh lomi hna bia a ceihtu ding a um. Ka rak chimmi bia cu ni hmanung bik ni ah an caah biaceihtu a si te lai.
49 Keimah nawl in ka chimmi a si lo, a ka thlahtu ka Pa nih zeidah chim ding, zeidah cawnpiak ding ti kha nawl a ka pek.
50 Cun a nawlbia cu zungzal nunnak petu a si ti kha ka hngalh. Cucaah ka chimmi vialte cu ka Pa nih a ka chimhmi lawng te an si” tiah a ti.
Footnotes
^ Biafang Fianternak ah zoh.
^ Mah cu Rom mi hna hmanmi pound a si. 327g hrawng. Thlaihhlei B14 ah zoh.
^ Denarii pakhat cu nikhat rian ṭuan man a si; denarii 300 cu kumkhat chung hrawng rian ṭuan man a si.
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ A hrampi, “sunparnak.”
^ A hrampi, “sunparnak.”
