Johan 13:1-38
13 Lanhtak Puai hlan in Jesuh nih hi vawlei kha kaltak in a Pa sinah a kir lai caan a phan cang ti kha a hngalh. Hi vawlei ah a ummi a zultu kha a dawt hna i a dongh tiang in a dawt hna.
2 Zanriah an ei lioah Satan nih Simon fapa Judas Iskariot lungthin chung ah Jesuh rawi duhnak lungput ngeih ding in a rak tuah cang.
3 Jesuh nih zeizong vialte kha ka kut chung ah ka Pa nih a ka pek dih, Pathian sinin a rami ka si i Pathian sinah ka kir ṭhan lai ti kha a hngalh.
4 Cucaah cabuai in a tho i a angki leng kha aa phoih. Cun ṭaval kha aa lak i a tai ah aa menh.
5 Khengpi chung ah ti a thlet i a zultu pawl ke kha a ṭawl. Mah hnuah a tai ah aa menhmi ṭaval in a hnawhpiak hna.
6 Simon Peter sin a phanh tikah “Bawipa, ka ke maw na ka ṭawl lai?” tiah a ti.
7 Jesuh nih “Zeidah ka tuah ti kha atu ahcun na hngalthiam lo, asinain a hnuah na hngalh te ko lai” tiah a leh.
8 Peter nih “Ka ke cu rak ka ṭawl hrimhrim hlah” tiah a ti. Jesuh nih “Na ke kaan ṭawl lo ahcun keimah he zeihmanh pehtlaihnak na ngei lai lo” tiah a ti.
9 Mah tikah Simon Peter nih “Bawipa, ka ke lawng si loin ka kut he, ka lu he rak ka ṭawl kun” tiah a ti.
10 Jesuh nih “Aa kholh cangmi cu a pumpaluk in a thiang cang i a ke dah ti lo cu ṭawl a hau lo, nannih cu nan thiang dih cang. Asinain nan dihlak in cun a si lo” tiah a ti.
11 Zeicahtiah aho nih dah a ka rawi lai ti kha a hngalh. Cucaah Jesuh nih “Nan dihlak in cun nan thiang lo” tiah a tinak a si.
12 Jesuh nih a zultu pawl an ke a ṭawl dih hna hnuah a angki leng kha aa hruk i cabuai ah a ṭhu ṭhan. Cun “Zeicah nan ke kaan ṭawl hna ti hi nan hngalthiam maw?
13 ‘Saya’ le ‘Bawipa’ tiah nan ka auh, cutin ka si taktak caah nan ka auhmi cu a hmaan ko.
14 Bawipa le Saya a simi keimah hmanh nih nan ke kaan ṭawlpiak hna ahcun nannih zong pakhat le pakhat nan ke nan i ṭawlpiak ve awk a si.
15 Nan caah zohchunh awk kaan chiahpiak hna, keimah nih ka tuah bantuk in nannih zong nan tuah ve awk a si.
16 Biatak kaan chimh hna lai, a hmaan tein kaan chimh hna lai, sal cu a bawipa nakin a ngan deuh lo, thlahmi zong thlahtu nakin a ngan deuh lo.
17 Mah thil hna hi nan hngalh cang caah mah ning in nan tuah ahcun lunglawmmi nan si lai.
18 Nan dihlak in kaan timi hna a si lo, ka thimmi cu ka hngalh ko hna. ‘Asinain keimah he rawl a eiṭimi cu ka ral a hung si’ timi cathiang bia a tlin nakhnga caah a si.
19 Mah ning in a hung si tikah keimah cu amah kha ka si ti nan zumh nakhnga atu in kaan chimh chung hna.
20 Biatak kaan chimh hna lai, a hmaan tein kaan chimh hna lai, ka thlahmi a cohlangmi cu keimah a ka cohlangmi an si, keimah a ka cohlangmi cu a ka thlahtu a cohlangmi an si” tiah a ti.
21 Cutin a chim dih hnuah Jesuh cu lung sivang ngai in a um, cucaah “Biatak kaan chimh hna lai, a hmaan tein kaan chimh hna lai, nanmah lakin pakhat nih nan ka rawi lai” tiah hlangfang tein a ti hna.
22 Ahodah a chim hnawhmi a si hnga ti kha an hngalh lo caah zultu pawl cu pakhat le pakhat an i zoh.
23 Jesuh nih a dawtmi zultu cu Jesuh pawng ah a ṭhu.
24 Simon Peter nih a kut a hei zaoh i “Ahodah a si ti kha rak kan chim” tiah a halter.
25 Mah zultu nih Jesuh ṭang kha aa hngauh i “Bawipa, mah cu ahodah a si?” tiah a hal.
26 Jesuh nih “Hi changreu hi ka hnim lai i ka pekmi kha a si lai” tiah a ti. Cun changreu kha a hnim i Simon Iskariot fapa Judas kha a pek.
27 Judas nih changreu kha a lak hnuah Satan cu a lungthin chung ah a lut. Jesuh nih “Judas, na tuah dingmi kha khulrang in tuah ko” tiah a ti.
28 Asinain Jesuh nih zeicah cutin a chim ti kha cabuai ah a ṭhumi hna lakin ahohmanh nih an hngal lo.
29 Judas cu tangka kuang tlaitu a si caah puai caah a herhmi cawk awk asiloah misifak pawl thil ṭhenh awkah Jesuh nih a fial rua tiah a cheu nih an ruah.
30 Judas nih changreu kha a lak hnuah a chuak colh. Cu caan cu zan a si.
31 Judas a chuah hnuah Jesuh nih “Atu cu mi Fapa hi sunparnak pek a si cang, mi Fapa thawng in Pathian zong nih sunparnak a hmuh cang.
32 Pathian theng nih mi Fapa kha sunparnak a pek lai, atu ah sunparnak a pek colh lai.
33 Ka fale hna, nan sinah sau ka um ti lai lo. Nannih nih nan ka kawl lai. Cun ‘Ka kalnak ding hmun ah cun nan ra kho lai lo’ tiah Judah mi pawl ka ti hna bantuk khan atu nannih zong kaan ti ve hna.
34 Nawlbia thar kaan pek hna, pakhat le pakhat i daw u, keimah nih kaan dawt hna bantuk in nannih zong pakhat le pakhat i daw u.
35 Pakhat le pakhat nan i dawt ahcun ka zultu nan si kha mi vialte nih an in hngalh hna lai” tiah a ti.
36 Simon Peter nih “Bawipa, khoika ah na kal lai?” tiah a hal. Jesuh nih “Ka kalnak ding hmun ah atu ah cun nan ka zul kho lai lo, a hnuah nan ka zulh te lai” tiah a leh.
37 Peter nih “Bawipa, zeicah atu ah cun kan in zulh khawh lai lo? Nangmah caah cun ka nunnak hmanh ka pek ko lai” tiah a ti.
38 Jesuh nih “Ka caah na nunnak cu na pe taktak lai maw? Biatak kaan chimh lai, a hmaan tein kaan chimh lai, ar a khuan hlanah ka hngal lo tiah voithum tiang na ka hlawt lai” tiah a ti.
