Johan 14:1-31
14 “Nan lungrethei tuk hlah u. Pathian kha zum u law keimah zong ka zum u.
2 Ka Pa inn ah umnak hmun tampi a um. Cutin a si lo ahcun hitihin kaan chim hna hnga lo. Nan caah hmun va timh awkah ka kal lai.
3 Ka kal lai i nan caah hmun ka va timh dih in ka rak kir ṭhan lai. Ka umnak hmun ah nannih zong nan um khawh ve nakhnga kaan lak hna lai.
4 Ka kalnak ding hmun zong, a lam zong nan hngalh ko.”
5 Thomas nih “Bawipa, na kalnak ding hmun cu kan hngalh ṭung lo. Zeitindah a lam cu kan hngalh khawh lai?” tiah a hal.
6 Jesuh nih “Keimah hi lam, biatak le nunnak ka si. Keimah sinin dah ti lo cun ahohmanh Pa sinah an phan kho lo.
7 Keimah nan ka hngalh ahcun ka Pa zong nan hngalh ko lai. Atu thawk in ka Pa kha nan hngalh cang i nan hmuh cang” tiah a ti.
8 Filip nih “Bawipa, na Pa cu kan hmuhsak law kan lung a tling ko lai” tiah a ti.
9 Mah tikah Jesuh nih hitin a ti: “Filip, nan sinah saupi ka um cang ko nain na ka hngal rih lo maw? Keimah a ka hmumi cu ka Pa zong a hmumi an si. ‘Na Pa kha kan hmuhsak’ tiah zeicah na ka ti?
10 Kei cu ka Pa he lungthin khat tein ka um i ka Pa zong keimah he lungthin khat tein a um ti kha na zum lo maw? Ka chimmi bia hna cu keimah nawl in ka chimmi a si lo, keimah he lungthin khat tein a ummi Pa Pathian a rianṭuannak a si.
11 Kei cu ka Pa he lungthin khat tein ka um i ka Pa zong keimah he lungthin khat tein a um ti kha zum u; mah kha nan zumh lo hmanh ah ka ṭuanmi rian ruang ah hin zum ko u.
12 Biatak kaan chimh hna lai, a hmaan tein kaan chimh hna lai, keimah a ka zummi nih cun ka ṭuanmi rian kha an ṭuan ve lai. Mah nakin a ngan deuhmi rian hna hmanh kha an ṭuan lai. Zeicahtiah ka Pa sinah ka kal cang lai.
13 Ka min in nan halmi paoh cu kaan tuahpiak hna lai. Cuticun Pa nih Fapa thawng in sunparnak a hmuh lai.
14 Zei thil paoh ka min in nan hal ahcun kaan tuahpiak hna lai.
15 “Nan ka dawt ahcun ka nawlbia kha nan zulh lai.
16 Ka Pa kha ka hal lai i nan sinah a zungzal in a um dingmi bawmtu* dang aan pek hna lai.
17 Mah bawmtu cu biatak a langhtermi thiang thlarau kha a si. Vawlei nih cun thiang thlarau kha a cohlang kho lo, zeicahtiah a hmu lo i a hngal lo. Asinain nannih nih cun nan hngalh, zeicahtiah thiang thlarau cu nan sinah a um i nan chung ah a um.
18 Ngakṭah bantuk in kaan kaltak hna lai lo. Nan sinah ka ra ṭhan lai.
19 A rauhhlan ah vawlei nih a ka hmu ti lai lo. Asinain nannih nih cun nan ka hmuh lai, zeicahtiah keimah ka nun caah nannih zong nan nung ve lai.
20 Kei cu ka Pa he lungthin khat tein ka um i nannih zong keimah he lungthin khat tein nan um bantuk in kei zong nanmah he lungthin khat tein ka um ve ti kha cu ni ah cun nan hngalh lai.
21 Ka nawlbia a cohlang i a zulmi cu keimah a ka dawmi a si. Keimah a ka dawmi cu ka Pa zong nih a dawt lai. Keimah zong nih ka dawt lai i a sinah kaa phuang lai.”
22 Judas Iskariot a si lomi Judas nih “Bawipa, vawlei mi hna sinah si loin kanmah sinah cun zeicah naa phuan lai?” tiah a hal.
23 Jesuh nih “A ka dawmi nih cun ka bia kha an zulh lai. Ka Pa zong nih a dawt lai. Ka Pa le keimah cu a sinah kan ra lai i a sinah kan um lai.
24 A ka daw lomi nih cun ka bia kha an zul lo. Nan theihmi bia cu keimah bia a si lo. A ka thlahtu ka Pa bia a si.
25 “Nan sin ka um lioah mah kong kha kaan chimh hna.
26 Ka Pa nih bawmtu a simi thiang thlarau kha ka min in a rak thlah tikah mah thiang thlarau nih zeizong vialte kha aan cawnpiak hna lai. Ka rak chimmi vialte zong aan hngalhter ṭhan hna lai.
27 Daihnak kha kaan chiahtak hna; keimah daihnak kha kaan pek hna. Kaan pekmi hna daihnak cu vawlei pekmi daihnak he aa lo lo. Cucaah nan lungrethei tuk hlah u, a ṭih zong ṭih hlah u.
28 ‘Ka kal lai i nan sinah ka rak kir ṭhan lai’ tiah ka timi kha nan theih. Nan ka dawt ahcun ka Pa sin i ka kal lai hi nan i lawm lai. Zeicahtiah ka Pa cu keimah nakin a ngan deuh.
29 Cutin a si taktak tikah nan ka zumh khawh nakhnga atu in kaan chimh chung hna.
30 Nan sinah bia tampi ka chim ti lai lo, zeicahtiah hi vawlei uktu cu a ra cang. Asinain ka cung ah nawlngeihnak zeihmanh a ngei lo.
31 Ka Pa ka dawt kha hi vawlei nih a hngalh nakhnga ka Pa nih a ka fial bantuk in ka tuah. Tho u, kal hna u sih.
Footnotes
^ Thiang thlarau kha mi pakhat bantuk in a langhter.
