Johan 18:1-40
-
Judas nih Jesuh a rawi (1-9)
-
Peter nih nam a hman (10, 11)
-
Jesuh cu Annas sinah an kalpi (12-14)
-
Peter nih a voikhatnak a hlawt (15-18)
-
Jesuh cu Annas hmaiah chuahpi a si (19-24)
-
Peter nih a voihnihnak le a voithumnak a hlawt (25-27)
-
Jesuh cu Pilat hmaiah chuahpi a si (28-40)
-
“Ka Pennak cu hi vawlei he aa pehtlai lo” (36)
-
18 Cutin thla a cam dih hnuah Jesuh cu a zultu hna he Kidron horkuang kha tan in dum chung ah an lut.
2 A zultu hna he cuka ah an kal lengmang caah rawitu Judas zong nih mah hmun cu a hngalh.
3 Judas nih ralkap phu pakhat, tlangbawi upa hna le Farasi mi hna nih an thlahmi biakinn cawngtu hna kha cuka ah a ratpi hna. Annih nih meitom, meiinn le hriamnam an i put.
4 Jesuh nih a cung i a tlung dingmi vialte kha a hngalh caah hmaiah a va chuak i “Ahodah nan kawl?” tiah a ti hna.
5 Annih nih “Nazareth khuami Jesuh” tiah an ti tikah Jesuh nih “Keimah hi ka si” tiah a ti hna. Rawitu Judas zong an lakah a dir ve.
6 Jesuh nih “Keimah hi ka si” tiah a ti hna tikah annih cu hnulei ah an i thawn i vawlei ah an tlu.
7 “Ahodah nan kawl?” tiah a hal ṭhan hna tikah “Nazareth khuami Jesuh” tiah an leh.
8 Jesuh nih “Keimah hi ka si tiah kaan ti cang ko hna cu ta. Keimah nan ka kawlmi a si ahcun annih hi cu kalter ko hna u” tiah a ti hna.
9 Mah cu “Na ka pekmi pakhat hmanh ka thlau hna lo” tiah a rak chimmi bia a tlin nakhnga caah a si.
10 Simon Peter nih aa putmi nam kha a zuh i tlangbawi ngan sal kha a tuk tikah a orhlei hnakhaw a pet. Mah salpa min cu Malkhas a si.
11 Jesuh nih “Nam cu a kawng ah sawh ṭhan ko, ka Pa nih a ka pekmi hrai* cu din loin maw ka um hnga?” tiah Peter cu a ti.
12 Mah tikah ralbawi pa le a ralkap pawl, Judah mi hna thlahmi biakinn cawngtu hna nih Jesuh kha an tlaih i an khih.
13 A hmasa bik ah Annas sinah an kalpi. Annas cu mah kum i tlangbawi ngan a simi Kaiafas a nupi pa a si.
14 Kaiafas cu mi tampi caah mi pakhat thih cu a ṭha deuh tiah Judah mi pawl ruahnak a rak cheutu kha a si.
15 Simon Peter le a dang zultu pakhat nih Jesuh cu an zulh. Mah zultu cu tlangbawi ngan he aa theihngalmi a si caah tlangbawi ngan inntual tiang Jesuh cu a hei zulh.
16 Peter cu kutka leng ah a dir rih ko. Cucaah tlangbawi ngan he aa theihngalmi zultu cu leng ah a va chuak, cun kutka hngaktu kha a chimh i Peter cu a luhpi.
17 Kutka hngaktu a simi sinum nu nih Peter cu “Nang zong mah pa zultu kha na si ve ko lo maw?” tiah a ti. Peter nih “Ka si lo” tiah a leh.
18 Khua a sih caah sinum hna le biakinn cawngtu hna nih meihol kha an tih i an to. Peter zong an pawng ah a dir i mei a to ve.
19 Tlangbawi upa nih Jesuh kha a zultu hna kong le a cawnpiaknak kong kha a hal.
20 Mah tikah Jesuh nih “Mizapi hmaiah phung ka chim. Judah mi vialte an ratnak pumhnak inn le biakinn ah ka cawnpiak zungzal hna, a thlithup in zeihmanh ka chim lo.
21 Zeicah keimah cu na ka hal? Ka bia a theimi kha ta na hal ko hna. Ka chimmi cu an hngalh dih ko” tiah a leh.
22 Cutin a chim tikah a pawng i a dirmi biakinn cawngtu pakhat nih Jesuh cu a hmai ah a bengh i “Ziah tlangbawi upa cu cuticun na leh?” tiah a ti.
23 Jesuh nih “Ka chimmi ah a palhnak a um ahcun rak ka chim ngat, asinain a hmaanmi ka chim ko ahcun zeicah na ka bengh?” tiah a ti.
24 Mah hnuah Annas nih Jesuh kha an khih buin tlangbawi ngan Kaiafas sinah a kuat.
25 Simon Peter cu a dir buin mei a to rih ko. “Nang zong mah pa zultu kha na si ve ko lo maw?” tiah an ti tikah “Ka si lo” tiah aa pheh.
26 Tlangbawi ngan salpa pakhat nih “Dum chung ah mah pa he khan kaan hmuh ko, a si ko lo maw?” tiah a ti. Mah sal cu Peter nih a hnakhaw pet lakin a tukmi pa he chungkhat an si.
27 Asinain Peter nih aa pheh ṭhan, cu caan te ah cun arkhuan thawng kha a theih.
28 Zingka te ah Jesuh kha Kaiafas sinin uktu bawi inn ah an kalpi. Asinain anmah tu cu innchung ah an lut lo. Zeicahtiah Lanhtak rawl an ei khawh nakhnga i thurhhnawmh kha an duh lo caah a si.
29 Cucaah Pilat cu leng ah a chuak i “Hi pa nih zei thil ṭhalo dah a tuah?” tiah a hal hna.
30 Mah tikah “Hi pa nih sualnak a tuah lo ahcun na kut ah kan in chaan lai lo” tiah an ti.
31 Pilat nih cun “I kalpi u law nan phung ning in bia va ceih ko u” tiah a ti hna. Judah mi hna nih “Kan phung ning in ahohmanh thahnak nawl kan ngei lo” tiah an ti.
32 Mah cu zei bantuk thihnak phun in dah ka thih lai tiah Jesuh nih a rak chimmi bia a tlin nakhnga caah a si.
33 Pilat cu uktu bawi innchung ah a lut ṭhan, cun Jesuh kha a auh i “Judah mi hna Siangpahrang cu na si maw?” tiah a hal.
34 Mah tikah Jesuh nih “Hngalh na duh taktak ruang ah maw na ka hal, asiloah mi nih ka kong an chimmi na theih ruang ah dah?” tiah a leh.
35 Pilat nih “Keimah cu Judah mi ka si ṭung lo, na miphun le tlangbawi upa hna nih pei ka kut ah an in chanh ko cu. Na tuahmi cu zeidah a si?” tiah a ti.
36 Jesuh nih “Ka Pennak cu hi vawlei he aa pehtlai lo. Ka Pennak cu hi vawlei he i pehtlai seh law cu Judah mi hna kut chung ah chanh ka si nakhnga lo ka zultu hna nih an doh ve ko hnga. Asinain ka chim cang bantuk in ka Pennak cu hi vawlei in a rami a si lo” tiah a leh.
37 Mah tikah Pilat nih “Cu a si ah siangpahrang cu na si kun maw?” tiah a hal. Jesuh nih “Na chim ning in siangpahrang cu ka si ko, hi vawlei ah ka chuah chan le ka rat chan cu biatak kong tehte khaan awkah a si. Biataklei ah a ṭangmi paoh nih ka bia kha an ngaih” tiah a leh.
38 Pilat nih “Biatak cu zeidah a si?” tiah a ti.
Mah bia a chim dih hnuah Judah mi hna sinah khan a chuak i “Hi pa hi a sualnak zeihmanh ka hmu lo.
39 Nan phung ning in Lanhtak Puai fatin thongtla pakhat kha kaan chuahpiak tawn hna. Judah mi hna Siangpahrang kha chuahpiak nan duh maw?” tiah a hal hna.
40 Mah tikah “Amah cu kan duh lo, Barabbas kha rak kan chuahpiak!” tiah an au. Barabbas cu damiah a si.
Footnotes
^ Pathian serhsattu in sualphawtnak he Jesuh a thih ding Pathian nih nawl a awnhmi kha a chim duhmi a si.
