Johan 19:1-42
19 Pilat nih Jesuh kha kalpi in hrihrual in tuk awkah nawl a pek hna.
2 Ralkap hna nih hling in bawiluchin an ser i an chinh, puan sendung* an aih.
3 Cun a pawng ah an ra i “Judah mi hna Siangpahrang, i lawm ko!” tiah an cawhdeh i a hmai ah an bengh.
4 Pilat cu leng ah a chuak ṭhan i Judah mi kha “A sualnak zeihmanh ka hmu lo ti kha nan hngalh nakhnga ka rak chuahpi lai” tiah a ti hna.
5 Jesuh cu hling bawiluchin i chinh in le puan sendung i aih buin a rak chuah tikah Pilat nih “Zoh hmanh u! Mah pa hi a si!” tiah a ti hna.
6 Asinain tlangbawi upa hna le biakinn cawngtu hna nih an hmuh tikah “Tung cung ah thlai ko! Tung cung ah thlai ko!” tiah an au. Pilat nih “Nanmah nih kalpi u law that ko u, kei cu a sualnak zeihmanh ka hmu lo” tiah a ti hna.
7 Judah mi hna nih “Phung pakhat kan ngei, amahle amah Pathian fapa ka si tiah aa ti caah mah phung ning in thih awkah aa tlak” tiah an ti.
8 Pilat nih an chimmi bia a theih tikah a ṭih chinchin.
9 Pilat cu uktu bawi innchung ah a lut ṭhan i Jesuh kha “Khuazei in dah na rat?” tiah a hal. Asinain Jesuh nih kaakhat hmanh a let lo.
10 Cucaah Pilat nih “Na ka let lai lo maw? Nangmah luatternak nawl le thahnak nawl ka ngeih hi na hngal lo maw?” tiah a ti.
11 Jesuh nih “Pathian nih nawl aan pek lo ahcun ka cung ah zeihmanh tuahnak nawl na ngei lai lo. Cucaah nangmah sinah a ka chaantu pa hi a sual deuh” tiah a leh.
12 Cucaah Pilat nih Jesuh luatter khawhnak lam kha a kawl, asinain Judah mi hna nih “Mah pa hi na luatter ahcun Sizar hawi na si lo. Siangpahrang ka si tiah amahle amah aa timi paoh cu Sizar a ralchanhtu an si” tiah an au.
13 Pilat nih mah bia a theih tikah Jesuh kha leng ah a rak chuahpi i Lung Phahmi Ṭuang timi hmun i biaceihnak ṭhutdan cung ah a ṭhu. Mah hmun cu Hebru holh in Gab′ba·tha ti a si.
14 Mah ni cu Lanhtak Puai ca Timhtuahnak ni a si i chun suimilam 12* hrawng a si. Pilat nih Judah mi hna kha “Nan Siangpahrang hi zoh hmanh u!” tiah a ti hna.
15 Asinain “That ko! That Ko! Tung cung ah thlai ko!” tiah an au. Pilat nih “Nan siangpahrang cu ka that kun lai maw?” tiah a hal hna tikah tlangbawi upa hna nih “Sizar dah ti lo cu siangpahrang kan ngei lo” tiah an leh.
16 Pilat nih tung cung ah thah ding in an kut ah a pek hna.
Cucaah Jesuh kha an kalpi.
17 Jesuh nih amah an thlainak ding tung* kha aa put i Luruh Hmun ah a kal. Mah hmun cu Hebru holh in Gol′go·tha ti a si.
18 Cuka ah Jesuh kha thingtung cung ah an thlai i thir in an khenh, midang pahnih zong a kehlei ah pakhat, a orhlei ah pakhat an thlai ve hna i Jesuh cu an karlak ah a um.
19 Pilat nih “Judah mi hna Siangpahrang, Nazareth khuami Jesuh” timi ca kha a ṭial i thingtung cung ah a taar.
20 Jesuh an thlainak hmun cu khuapi he aa naih caah Judah mi tampi nih Hebru holh, Latin holh le Greek holh in ṭialmi mah ca kha an rel khawh.
21 Asinain Judah mi tlangbawi upa hna nih “‘Judah mi hna Siangpahrang’ tiin ṭial hlah, ‘Judah mi hna Siangpahrang ka si a titu’ tiin ṭial” tiah an ti.
22 Pilat nih “Ka ṭial cangmi cu ka ṭial ning in um ko seh” tiah a ti hna.
23 Ralkap hna nih Jesuh kha tung cung ah thir in an khenh hnuah a hnipuan kha ṭhen li ah an ṭhen i pakhat cio an i lak. Cun a angki chung zong kha an i lak, a angki chung cu hliah ngei loin a cung in a tang tiang tahmi a si.
24 “Mah hi cu thlek hlah u sih, aho nih dah a co lai ti kha camcawhfung tu in zuk u sih” tiah pakhat le pakhat an i ti. Cucaah “Ka hnipuan cu an i ṭhen i ka angki cu camcawhfung in an zuh” timi cathiang bia cu a hung tling. Ralkap pawl nih cutin an tuah taktak.
25 Jesuh an thlainak tung pawng ah Jesuh a nu Mary le a nu nau; Klopas nupi Mary le Mary Magdalin kha an dir.
26 Jesuh nih a nu le a dawtmi zultu a pawng i an dirmi kha a hmuh tikah a nu kha “Ka nu, atu thawk in amah cu na fapa a si cang!” tiah a ti.
27 A zultu zong kha “Atu thawk in amah cu na nu a si cang!” tiah a ti. Cucaah a zultu nih Mary kha a inn ah a umter.
28 Cu hnuah Jesuh nih ka Pa nih a ka fialmi rian vialte ka liim dih cang ti a hngalh tikah “Ka ti a hal” tiah a ti. Cutin a chimmi cu cathiang bia a tlin nakhnga caah a si.
29 Cuka ah mitsur zuthor khat lakin rawnmi um pakhat a um. Annih nih puanchia kha mitsur zuthor ah an hnim, hyssop* kung par ah an ṭem i Jesuh kaa ah an tuh.
30 Mitsur zuthor kha a teh hnuah Jesuh nih “Aa liim cang!” tiah a ti. Cun a lu a khun i a thaw a cat.
31 Mah ni cu Timhtuahnak ni a si i a thaizing cu a hleikhunmi Sabbath ni a si caah Judah mi hna nih ruak kha thingtung cung ah Sabbath ni tiang umter an duh lo. Cucaah an ke khiah in an ruak kalpi awkah Pilat kha an va nawl.
32 Cun ralkap pawl an ra i Jesuh kam ah an thlaimi, mi pahnih i an ke kha an khiah hna.
33 Asinain Jesuh sin an phanh tikah a rak thih cangmi kha an hmuh, cucaah a ke an khiak ti lo.
34 Ralkap pakhat nih Jesuh a hnak ah fei in a chunh tikah thi le ti a hung chuak colh.
35 Mah thil a hmumi pakhat nih tehte a khaan, a tehte khaannak cu a hmaan, a chimmi a hmaan ti kha a hngalh. Nannih zong zumhter aan duh hna caah cutin a chimmi a si.
36 Cu thil a canmi cu “A ruh pakhat hmanh a kiak lai lo” timi cathiang bia a tlin nakhnga caah a si.
37 Cun “Annih nih an chunhmi pa cu an zoh lai” timi a dang cathiang bia zong a um.
38 Mah hnuah Judah mi pawl ṭih ruang ah a thli tein Jesuh zultu a rak simi Arimathea khuami Josef cu Pilat sinah a ra i Jesuh ruak lak awkah a hal. Pilat nih nawl a awnh caah Jesuh ruak kha a lak i a kalpi.
39 A hlan i zan ah Jesuh sin a rak rami Nikodemu zong a ra ve. Mura le aloe zihmui cawhmi a rak i put, mah cu pound* 100 hrawng a si.
40 Annih nih Jesuh ruak kha an lak, Judah mi hna ruak vuinak phungphai ning in khiangraang puan ah zihmui an toih i mah in an zual.
41 Jesuh tung cung i thah a sinak hmun ah dum pakhat a um, cuka dum ah ahohmanh vui bal rih lonak thlan thar pakhat a um.
42 Mah ni cu Judah mi hna Timhtuahnak ni a si leng ah cu thlan he zong aa naih caah Jesuh ruak cu cuka ah an vui.
Footnotes
^ A hrampi, “maimaw.”
^ A hrampi, “nichuah hnu suimilam 6.”
^ Biafang Fianternak i “Hremnak tung” ah zoh.
^ Biafang Fianternak ah zoh.
^ Mah cu Rom mi hna hmanmi pound a si. Thlaihhlei B14 ah zoh.
