Johan 2:1-25
2 A nithumnak ni ah Galili ram, Kana khua ah ṭhitumnak puai a um. Jesuh a nu zong cuka ah a um ve.
2 Jesuh le a zultu pawl zong ṭhitumnak puai ah an sawm hna.
3 Mitsur zu a dih deng tikah Jesuh kha a nu nih “Mitsur zu an ngei ti lo” tiah a ti.
4 Jesuh nih “Mah cu kanmah he zeidah aa pehtlai?* Ka caan a phan rih lo” tiah a ti.
5 Mah tikah a nu nih chungṭuan hna kha “Jesuh nih a chim ning in tuah u” tiah a ti hna.
6 Cuka ah Judah mi hna phung ning in thianhhlimhnak caah lung ralca paruk an chiah. Ralca pakhat ah ti pung 2 asiloah pung 3* hrawng aa tlum.
7 Jesuh nih “Ralca ah ti rawng hna u” tiah a ti tikah khat lakin an rawn.
8 Cu hnuah “Tlawmpal in suak u law puai tlangtlatu kha va pe u” tiah a ti hna i an va pek.
9 Puai tlangtlatu nih mitsur zu ah aa thlengmi ti kha a teh. (Chungṭuan hna nih cun mah mitsur zu hi khoika in dah a rat ti kha an hngalh nain puai tlangtlatu nih cun a hngal lo.) Cun nupi ṭhitu pa kha a auh i,
10 “Midang nih cun mitsur zu a ṭhami kha a hmasa ah an hunh hna i an rit hnu lawng ah a ṭhalo deuhmi kha an hunh tawn hna. Nang tu cu a ṭhami mitsur zu kha atu tiang naa chiah rih” tiah a ti.
11 Jesuh nih Galili ram, Kana khua ah a hmasa bik khuaruahhar thil kha a tuah i a ṭhawnnak a langhter. A zultu hna nih Jesuh kha an hun zumh.
12 Cu hnuah Jesuh cu a nu, a naule le a zultu hna he Kapernaum khua lei ah an ṭum. Asinain cuka ah ni saupi an caam lo.
13 Judah mi hna Lanhtak puai* a naih tikah Jesuh cu Jerusalem khua lei ah a kai.
14 Biakinn ah caw, tuu, laileng a zuarmi pawl le tangka thlengtu pawl an ṭhutmi kha a hmuh hna.
15 Cucaah hrihrual pakhat aa ser i tuu le caw a zuartu hna kha an tuu le an caw he biakinn in a ṭhawl hna. Tangka thlengtu pawl i an tangka kha a thlet i an cabuai kha a leh dih.
16 Laileng zuartu hna kha “Mah thil hna hi hika hmun in chuahpi hna u! Ka Pa inn kha chawdawrnak hmun ah ser hlah u!” tiah a ti hna.
17 Mah tikah “Na inn ca i ka lungthawhnak cu ka lungthin chung ah mei bang in a alh” timi cathiang bia kha a zultu hna nih an hun hngalh ṭhan.
18 Judah mi nih “Hi thil hna tuahnak nawl na ngeih kha langhter awkah khuaruahhar thil pakhat in kan hmuhsak” tiah an ti.
19 Jesuh nih “Mah biakinn hi ṭhet u law nithum chung ah ka sak ṭhan lai” tiah a leh hna.
20 Judah mi nih “Mah biakinn hi kum 46 chung rak sakmi a si, nithum chung ah maw na sak ṭhan lai?” tiah an ti.
21 Asinain Jesuh nih a chimmi biakinn cu amah a pum kha a si.
22 A zultu hna nih Jesuh thihnak in a thawh ṭhan hnu lawng ah cutin atu le atu a rak chimmi kha an hun hngalh ṭhan i cathiang bia le Jesuh chimmi bia kha an zumh.
23 Lanhtak puai chung ah Jesuh cu Jerusalem khua ah a um. A tuahmi khuaruahhar thil hna kha an hmuh tikah mi tampi nih an hun zumh.
24 Asinain Jesuh nih cun an sining kha a hngalh i a zum hna lo.
25 Zeicahtiah minung lungthin kha a hngalh caah minung kong kha ahohmanh nih an chimh a herh lo.
Footnotes
^ A hrampi, “Nangmah le keimah zeidah kan i pehtlaihnak a um?” Alnak a langhtermi bia.
^ A nganmi pung pakhat ah liter 22 hrawng aa tlum.
^ Biafang Fianternak ah zoh.
