Johan 21:1-25
21 Cu hnuah Jesuh cu Tiberias Rili ah a zultu hna sinah a lang ṭhan. A langh ning cu hitihin a si.
2 Simon Peter, Faphir tiah auhmi Thomas, Galili peng Kana khuami Nathanael, Zebedi fapa hna le a dang zultu pahnih cu hmunkhat ah an um.
3 Simon Peter nih “Kei cu nga ka va tlai lai” tiah a ti hna. Mah tikah “Kannih zong na sinah kan kal ve lai” tiah an ti. Cucaah lawng in an kal, asinain cu zan ah pakhat hmanh an tlai lo.
4 Khuadeika te ah Jesuh cu rilikam ah a dir, asinain Jesuh a si ti kha a zultu pawl nih an hngal lo.
5 Jesuh nih “Ka fale, ei awk pakhatkhat* nan ngei maw?” tiah a hal hna tikah “Kan ngei lo!” tiah an leh.
6 Jesuh nih “Lawng orhlei ah khan nan sur kha hei chep u law nga tlawmpal cu nan tlaih ko lai” tiah a ti hna. Cucaah an sur cu an hei cheh, nga tam tuk an tlaih caah an sur cu a hnuh hmanh an hnuk kho lo.
7 Mah tikah Jesuh dawtmi zultu nih Peter kha “Bawipa a si!” tiah a ti. Mah kha a theih tikah Simon Peter cu a angki leng aa hruk i rili chung ah a zuang.
8 Asinain a dang zultu hna cu nga in a khatmi an sur kha hnuh pah buin lawng hmete in an ra, an umnak cu rilikam in aa hlat tuk lonak pe 300* hrawng ah a si.
9 Tikam an phanh tikah meihol cung ah emmi nga le changreu kha an hmuh.
10 Jesuh nih “Nan tlaihmi nga kha tlawmpal in rak pu u” tiah a ti hna.
11 Cucaah Simon Peter cu lawng ah a kai i nga nganpipi 153 in a khatmi sur kha tikam ah a hun hnuh. Cu tluk in nga cu an tam ko nain an sur cu a tlek lo.
12 Jesuh nih “Ra u law thaithawh rak ei u” tiah a ti hna. Bawipa a si kha an hngalh caah a zultu ahohmanh nih “Ahodah na si?” tiah an hal ngam lo.
13 Jesuh nih changreu kha a lak i a zultu kha a pek hna, nga zong a pek hna.
14 Cucu Jesuh thihnak in a thawh ṭhan hnuah a zultu hna sinah a voithumnak a langh a si.
15 Thaithawh an ei hnuah Jesuh nih “Johan fapa Simon, hi hna nakin na ka daw deuh maw?” tiah a hal. Simon Peter nih “Kaan dawt ko, Bawipa, kaan dawt cu na hngalh ko cu ta” tiah a leh tikah “Ka tuufa tete kha cawm hna” tiah a ti.
16 Jesuh nih “Johan fapa Simon, na ka daw maw?” tiah a voihnihnak a hal ṭhan. Anih nih “Kaan dawt ko, Bawipa, kaan dawt cu na hngalh ko cu ta” tiah a leh tikah “Ka tuufa tete kha khal hna” tiah a ti.
17 Mah hnuah Jesuh nih “Johan fapa Simon, na ka daw maw?” tiah a voithumnak a hal ṭhan. “Na ka daw maw?” tiah voithum tiang a hal caah Peter cu a ngaih a chia i “Bawipa, zeizong vialte na hngalh dih ko; kaan dawt cu na hngalh ko cu ta” tiah a leh. Mah tikah Jesuh nih “Ka tuufa tete kha cawm hna.
18 Biatak kaan chimh lai, a hmaan tein kaan chimh lai, na no lioah cun nangmah tein thil naa hruk i na kal duhnak hmun ah na kal tawn. Na tar tikah cun na kut na samh lai i midang nih thil an in hruk lai, na duh lonak hmun ah an in kalpi lai” tiah a ti.
19 Cutin a chimmi cu zei bantuk in dah Peter cu a thih lai i Pathian sunparnak a langhter lai ti kha a hmuhsakmi a si. Mah hnuah Peter kha “Ka hnu rak ka zul peng” tiah a ti.
20 Peter cu a hun i mer tikah Jesuh nih a dawtmi zultu a ratmi kha a hmuh, mah zultu cu zanriah an ei lioah Jesuh ṭang kha i hngauh in “Bawipa, nangmah aan rawitu ding cu ahodah a si?” tiah a haltu kha a si.
21 Peter nih a hmuh tikah Jesuh kha “Bawipa, hi pa hi tah zeitindah a si lai?” tiah a hal.
22 Jesuh nih “Ka rat tiang amah cu nunter ka duh zong ah mah kong cu zeicah hngalh na duh? Ka hnu kha rak ka zul peng ko” tiah a ti.
23 Cucaah mah zultu cu a thi lai lo timi bia cu zultu hna lakah a thang. A tak ti ahcun a thi lai lo tiah Jesuh nih a chimmi a si lo. “Ka rat tiang amah cu nunter ka duh zong ah mah kong cu zeicah hngalh na duh?” tiah a timi tu a si.
24 Hi thil vialte kong tehte a khang i a ṭialtu cu mah zultu kha a si. A tehte khaannak cu a hmaan ti kha kan hngalh.
25 A tak ti ahcun Jesuh nih a tuahmi thil tampi a um rih, mah vialte kha a dikthliar in ṭial si seh law an ṭialnak cazual cu vawlei hmanh nih a tlum hnga lo tiah ka ruah.
Footnotes
^ Asiloah “nga tlawmpal tal.”
^ A hrampi, “dong 200 hrawng.” Meter 90 hrawng. Thlaihhlei B14 ah zoh.
