Johan 5:1-47
5 Cu hnuah Judah mi hna puai a um caah Jesuh cu Jerusalem khua ah a kal.
2 Jerusalem khua, Tuu Kutka pawng ah Hebru holh in Beth·za′tha tiah auhmi tidil pakhat a um. Mah tidil ah deu panga a um.
3 Mah deu hna ah a zawmi, a mit a cawmi, a ke a beimi le a kutke a zengmi tampi an um.
4 * ——
5 Kum 38 chung a zaw cangmi pa pakhat zong a um.
6 Cuka hmun i a rilh komi kha Jesuh nih a hmuh tikah caan saupi a zaw cangmi a si ti kha a hngalh. Cucaah “Dam na duh maw?” tiah a hal.
7 Anih nih “Saya, ti a cangh tikah ti chung ah a ka paihtu ding ahohmanh an um lo. Ṭum kaa timh fatin midang nih an ka ṭum kanh lengmang” tiah a ti.
8 Jesuh nih “Tho! Na ihphah kha i lak law kal” tiah a ti.
9 Mah pa cu a dam colh, cun a ihphah kha aa lak i a kal.
Mah ni cu Sabbath ni a si.
10 Cucaah Judah mi nih mah pa kha “Nihin cu Sabbath ni a si, ihphah naa putmi hi phung nih a awnh lo” tiah an ti.
11 Mah tikah “A ka damtertu pa nih ‘Na ihphah kha i lak law kal’ a ka ti” tiah a leh hna.
12 Annih nih “‘Na ihphah i lak law kal’ aan titu cu ahodah a si?” tiah an hal.
13 Asinain mah pa nih a ka damtertu cu ahodah a si ti kha a hngal lo. Zeicahtiah Jesuh cu mibu lakin a rak i zuk diam cang.
14 Cu hnuah Jesuh nih mah pa kha biakinn ah a hmuh i “Atu cu na dam cang. Hi nakin a ṭhalo deuhmi thil na ton nakhnga lo sualnak tuah ti hlah” tiah a ti.
15 Mah pa cu a kal i a ka damtertu cu Jesuh a si tiah Judah mi kha a va chimh hna.
16 Jesuh nih Sabbath ni ah mah thil hna kha a tuah caah Judah mi nih an hun ralchanh.
17 Asinain Jesuh nih “Ka Pa cu atu tiang rian a ṭuan rih i kei zong ka ṭuan awk a si” tiah a leh hna.
18 Cucaah Judah mi nih Jesuh kha thah awkah an i zuam chinchin. Zeicahtiah Jesuh nih Sabbath nawlbia kha a buar leng ah Pathian kha ka Pa tiah a auh i amahle amah Pathian tluk ah aa ser tiin an hmuh caah a si.
19 Cucaah Jesuh nih hitin a leh hna: “Biatak kaan chimh hna lai, a hmaan tein kaan chimh hna lai, Fapa nih amah tein zei thil hmanh a tuah lo. Pa nih a tuahmi a hmuhmi lawng kha a tuah hna. Pa nih a tuahmi paoh cu Fapa zong nih a tuah ve hna.
20 Pa nih a Fapa kha a dawt caah a tuahmi vialte kha a hmuhsak. Hi nakin a ngan deuhmi thil* zong a hmuhsak rih lai. Mah tikah nan khuaruah a har te lai.
21 Pa nih mithi a thawhter hna bantuk in Fapa zong nih a duhmi paoh kha a nunter ve hna lai.
22 Pa nih ahohmanh bia a ceih hna lo, biaceihnak nawl kha Fapa sinah a pek dih.
23 Mah lawng ah mi vialte nih Pa an thangṭhat bantuk in Fapa zong kha an thangṭhat ve lai. Fapa a thangṭhat lomi cu Fapa a thlahtu Pa Pathian a thangṭhat lomi an si.
24 Biatak kaan chimh hna lai, a hmaan tein kaan chimh hna lai, ka bia kha a thei i a ka thlahtu Pa a zummi paoh cu zungzal nunnak an hmu lai. Biaceih an si lai lo i thihnak in nunnak ah an lan lai.
25 “Biatak kaan chimh hna lai, a hmaan tein kaan chimh hna lai, mithi nih Pathian Fapa aw an theih lai caan a phan cang lai i atu hi a phan cang. Mah aw a ngai i a zulmi hna cu an nung lai.
26 Pa nih nunnak pek khawhnak ṭhawnnak a ngeih bantuk in Fapa zong mah ṭhawnnak kha a pek.
27 Amah cu mi Fapa* a si caah Pathian nih biaceihnak nawl kha a pek.
28 Hi kong ah hin nan khuaruahhar hlah u. Thlan chung ah a ummi vialte nih Pathian Fapa aw an theih caan cu a phan cang lai.
29 An thlan khan an chuak lai i ṭhatnak a tuahmi cu nunnak hmuh awkah an tho lai, ṭhatlonak a tuahmi cu biaceih awkah an tho lai.
30 Keimah tein zei thil hmanh ka tuah lo. Keimah duhnak ning in si loin a ka thlahtu duhnak ning in ka tuah. Pa nih a chimmi ning in bia ka ceih, cucaah ka biaceihnak cu a ding.
31 “Ka kong kha keimah lawng nih tehte ka khaan ahcun ka bia cu a hmaan lai lo.
32 Keimah kong tehte a khangtu a dang pakhat a um rih. A bia cu a hmaan ti kha ka hngalh.
33 Johan sinah mi nan thlah hna i anih nih biatak kha tehte a rak khaan.
34 Minung sinin tehte khaannak kha ka herh lo. Asinain khamh nan si nakhnga hi thil hna hi kaan chimh hna.
35 Johan cu a alh i a ceumi meiinn bantuk a si. A ceunak chung ah caan tawite i nuamh kha nan duh.
36 A tak ti ahcun Johan nakin a ngan deuhmi tehte khaannak ka ngei. Ka Pa nih liim awkah rian a ka pek i ka ṭuan liomi hi rian hna nih Pa thlahmi ka si kha tehte a khaan.
37 A ka thlahtu ka Pa hrimhrim nih keimah kong kha tehte a khaan. A aw kha nan thei bal lo i a hmai zong nan hmu bal lo.
38 Pa nih a thlahmi kha nan zumh lo caah Pathian bia cu nan lungthin chung ah a caam lo.
39 “Zungzal nunnak hmuh ding timi timhnak he Cathiang kha nan hlathlai. Mah Cathiang nih tehte a khaanmi cu keimah kong kha a si.
40 Asinain nunnak nan hmuh nakhnga ka sinah nan ra duh lo.
41 Minung sinin thangṭhatnak hmuh kha ka duh lo.
42 Nan lungthin chung ah Pathian dawtnak nan ngei lo ti kha ṭha tein ka hngalh ko.
43 Ka Pa min in a rami keimah cu nan ka cohlang lo. Asinain mi pakhat cu amah min in hei ra seh law nan cohlan ko hnga.
44 Minung sinin thangṭhatnak* hmuh kha nan duh ko nain pakhat lawng a simi Pathian sinin thangṭhatnak hmuh kha nan duh lo caah zeitindah nan ka zumh khawh lai?
45 Ka Pa sinah sual a kan phawt lai tiah ruat hlah u. Sual aan phawtu hna ding a um, anih cu nan i bochanmi Moses kha a si.
46 Moses kha rak zum u law keimah zong nan ka zumh ve ko hnga. Zeicahtiah Moses nih keimah kong kha a rak ṭial.
47 A ṭialmi kha nan zumh lo ahcun ka chimmi bia cu zeitindah nan zumh khawh lai?”
Footnotes
^ Mah cacaang hi Baibal lehnak cheukhat ah a um nain hlanlio kut in ṭialmi, zumhawk a tlakmi Greek Baibal hna ah a um lo.
^ A hrampi, “rian.”
^ Biafang Fianternak ah zoh.
^ A hrampi, “sunparnak.”
