Johan 6:1-71
6 Cu hnuah Jesuh cu Tiberias Rili tiah auhmi Galili Rili ral ah a kal.
2 Mizaw a damtermi le khuaruahhar thil a tuahmi kha an hmuh caah mibupi nih a hnu in an zulh.
3 Cucaah Jesuh cu a zultu hna he tlang cung ah an kai i cuka ah an ṭhu.
4 Judah mi hna Lanhtak Puai cu a nai cang.
5 Jesuh nih mibupi a sin an ratmi kha a hmuh tikah Filip kha “Hi mi hna dangh awkah rawl khoika ah dah kan cawk lai?” tiah a hal.
6 Filip kha hneksak duh ah cutin a halmi a si. A tak ti ahcun zeidah ka tuah lai ti kha Jesuh nih a hngalh ko.
7 Filip nih “Denarii* 200 man kan cawk i tlawmte cio in kan pek hna hmanh ah a za lai lo” tiah a leh.
8 A zultu lak i pakhat a simi Simon Peter i a nau Andru nih,
9 “Hika ah barli changreu hlum nga le nga fate pahnih a ngeimi ngakchiapa pakhat a um. Asinain mi hi vialte cu zeitindah a zat hna lai?” tiah a ti.
10 Jesuh nih “Mi pawl kha ṭhutter hna u” tiah a ti. Cuka ah ramhring tampi a um i mah cung ah an ṭhut tikah pa lawngte 5,000 hrawng an si.
11 Jesuh nih changreu kha a lak i Pathian sinah lawmhnak bia a chim hnuah cuka i a ṭhumi kha a phawt hna. Cuticun nga fate zong cu a phawt hna i an duh zat in an ei.
12 Khim tein an ei dih hnuah Jesuh nih “A hleimi kha khawm dih hna u, pakhat hmanh hlolak hlah u” tiah a zultu pawl kha a ti hna.
13 Cucaah barli changreu hlum nga a eimi hna sinin a hleimi kha an khawmh tikah sei 12 a khat.
14 Jesuh tuahmi khuaruahhar thil kha an hmuh tikah mi nih “Hi pa hi vawleicung ah a ra dingmi Profet kha a si hrimhrim” tiah an ti.
15 Mah tikah an ra lai i hramhram in siangpahrang ah an ka ser lai ti kha a hngalh tikah Jesuh cu aa zuk i amah lawng in tlang cung ah a kai ṭhan.
16 Zanlei a hung si tikah a zultu pawl cu rililei ah an kal.
17 Lawng an i cit i tiva ral ah a ummi Kapernaum khua lei ah an kal. Khua a hung mui cang nain Jesuh cu an sinah a phan rih lo.
18 Mah lioah thli fakpi in a hung hrang i tilet a tho.
19 Meng 3, meng 4 hrawng* an zah hnuah Jesuh cu ti cung ah a ke in a kal i an lawng lei ah a ratmi kha zultu pawl nih an hmuh tikah an ṭih tuk.
20 Asinain Jesuh nih “Keimah ka si; ṭih hlah u!” tiah a ti hna.
21 A zultu pawl cu an i lawm tuk i Jesuh kha lawng cung ah an kaiter, cun an kal duhnak hmun kha chikkhat te ah an phan.
22 A thaizing ah rili khattalei ral ah a taangmi hna nih rilikam ah chiahmi lawng hmete a um ti lomi kha an hmuh. Jesuh zultu pawl mah lawng in an kal lioah Jesuh cu aa tel lo.
23 Bawipa Jesuh nih Pathian sin lawmhnak bia a chim i changreu a rak phawt hnanak hmun pawng ah Tiberias in a rami lawng hna cu an rak phan.
24 Mi hna nih Jesuh le a zultu pawl an um ti lomi kha an hngalh tikah Jesuh kawl awkah mah lawng hna kha an i cit i Kapernaum khua ah an kal.
25 Rili khattalei ral ah Jesuh kha an hmuh tikah, “Saya,* zeitik ah dah hika ah hin na phanh?” tiah an hal.
26 Jesuh nih “Biatak kaan chimh hna lai, a hmaan tein kaan chimh hna lai, nan ka kawlmi hi khuaruahhar thil nan hmuh caah a si lo, changreu khim tein nan ei caah a si.
27 A rawk khomi rawl kha si loin zungzal nunnak a pemi rawl kha hmuh awkah i zuam u. Cu rawl cu mi Fapa nih aan pek hna lai. Zeicahtiah Pathian nih a mithmai ṭha a hmumi a si kha langhter awkah a cung ah hmelchunhnak a khenh cang” tiah a leh hna.
28 Cucaah annih nih “Pathian rian kan ṭuan khawh nakhnga zeidah kan tuah lai?” tiah an hal.
29 Jesuh nih “Pathian nih a thlahmi cung ah zumhnak langhter cu Pathian rian ṭuan a si” tiah a leh hna.
30 Mah tikah annih nih “Kan hmuh i kan in zumh khawh nakhnga zei khuaruahhar thil dah na tuah lai? Zei rian dah na ṭuan lai?
31 ‘An ei awkah van in changreu a pek hna’ timi Cathiang bia ning in kan pupa hna nih thetse ram ah Pathian pekmi manna changreu kha an rak ei” tiah an ti.
32 Jesuh nih “Biatak kaan chimh hna lai, a hmaan tein kaan chimh hna lai, Moses nih van in changreu aan pe hna lo, asinain ka Pa nih changreu taktak kha van in aan pek hna.
33 Pathian pekmi mah changreu cu van in a rung ṭum i vawlei hi nunnak a pek” tiah a ti.
34 Mah tikah annih nih “Bawipa, mah changreu cu kan pe zungzal ko” tiah an ti.
35 Jesuh nih “Keimah hi nunnak changreu cu ka si. Ka sinah a rami paoh cu zeitik hmanh ah an rawl a ṭam ti lai lo i a ka zummi paoh cu zeitik hmanh ah an ti a hal ti lai lo.
36 Ka rak chim bantuk in nan ka hmuh ko bu hmanh in nan ka zum lo.
37 Pa nih a ka pekmi vialte cu ka sinah an ra lai i a rami paoh cu zeitik hmanh ah ka ṭhawl hna lai lo.
38 Vancung in ka rung ṭummi cu keimah duhnak tuah awkah a si lo, a ka thlahtu duhnak tuah awkah a si.
39 A ka thlahtu duhnak cu a ka pekmi vialte pakhat hmanh tlau loin ni hmanung bik ni ah anmah kha thawhter ṭhan awkah a si.
40 Zeicahtiah Fapa kha a cohlang i a zummi paoh nih zungzal nunnak hmu hna seh ti kha ka Pa nih a duh. Ni hmanung bik ni ah annih kha ka thawhter ṭhan hna lai” tiah a ti.
41 Jesuh nih “Keimah hi van in a rung ṭummi changreu ka si” tiah a ti caah Judah mi hna cu an phunzai.
42 Cun “Anih cu Josef fapa Jesuh kha a si lo maw? A nu le a pa kha kan hngalh ko hna cu ta. Zeitindah ‘Van in ka rung ṭum’ a ti hnga?” tiah an ti.
43 Cucaah Jesuh nih hitin a leh hna: “Phunzai lengmang hlah u.
44 A ka thlahtu Pa nih a hnuh hna dah ti lo ahcun ahohmanh ka sinah an ra kho lo, a rami cu ni hmanung bik ni ah ka thawhter hna lai.
45 Profet cauk ah ‘An dihlak in Jehovah* nih a cawnpiak hna lai’ tiah aa ṭial. Ka Pa bia a ngai i a cawngmi paoh cu ka sinah an ra.
46 Pathian sinin a rami keimah dah ti lo nih cun ahohmanh nih Pa kha an hmu bal lo. Keimah lawng hi Pa a hmu balmi cu ka si.
47 Biatak kaan chimh hna lai, a hmaan tein kaan chimh hna lai, a zummi paoh cu zungzal nunnak an hmu lai.
48 “Keimah hi nunnak changreu cu ka si.
49 Nan pupa hna nih thetse ram ah manna changreu kha an rak ei nain an thi.
50 Vancung in a rami changreu a eimi cu an thi lai lo.
51 Keimah hi van in a rami a nungmi changreu cu ka si. Mah changreu a eimi paoh cu zungzal in an nung lai. Hi vawlei i a ummi hna nih nunnak an hmuh nakhnga ka pekmi changreu cu ka sa hi a si.”
52 Mah tikah Judah mi hna cu pakhat le pakhat bia an hun i al i “Zeitindah mah pa nih ei awkah a sa cu a kan pek khawh lai?” tiah an ti.
53 Cucaah Jesuh nih “Biatak kaan chimh hna lai, a hmaan tein kaan chimh hna lai, mi Fapa a sa nan ei lo i a thi nan din lo ahcun nunnak nan hmu lai lo.*
54 Ka sa a ei i ka thi a dingmi cu zungzal nunnak a hmu lai i ni hmanung bik ni ah ka thawhter te lai.
55 Zeicahtiah ka sa cu rawl taktak a si i ka thi cu din awk taktak a si.
56 Ka sa a ei i ka thi a dingmi cu keimah he lungthin khat in kan um zungzal.
57 A nungmi Pa Pathian nih a ka thlah i Pa ruang ah ka nun bantuk in ka sa a eimi cu keimah ruang ah a nung ve lai.
58 Vancung in a rami changreu cu cutin a si. Nan pupa hna nih an rak eimi changreu bantuk a si lo, mah changreu kha an rak ei nain an thi. Asinain hi changreu a eimi tu cu zungzal in an nung lai” tiah a ti.
59 Kapernaum khua, pumhnak inn i a cawnpiak hna lioah mah kong kha Jesuh nih a chim.
60 A zultu tampi nih mah kha an theih tikah “A bia cu cohlan awkah a har tuk; ahodah a ngai kho lai?” tiah an ti.
61 Jesuh nih a zultu pawl cutin an phunzaimi kha a hngalh tikah “Mah nih aan lauter hna maw?
62 Mi Fapa hi hlan i a rak umnak hmun ah a kai ṭhanmi kha hei hmu u law zeitluk in dah nan lau chinchin lai?
63 Nunnak petu cu Pathian thlarau a si; minung nih cutin an tuah kho lo. Kaan chimhmi hna bia cu thiang thlarau thawng in a rami a si caah nunnak aan hmuhter hna lai.
64 Asinain nan lakah a zum lomi cheukhat nan um” tiah a ti. Jesuh nih aho te nih dah an zum lo i aho nih dah a ka rawi te lai ti kha a hramthawk tein a hngalh ko.
65 “Mah ruang ah Pa nih nawl a pek hna lo ahcun ahohmanh ka sinah an ra kho lo tiah ka rak in chimh cang hna” tiah a ti.
66 Mah bia ruang ah zultu tampi cu an kaltak cangmi thil ah khan an i mer ṭhan i Jesuh hnu kha an zul ti lo.
67 Mah tikah Jesuh nih lamkaltu 12 kha “Nannih tah kal nan duh ve maw?” tiah a hal hna.
68 Simon Peter nih “Bawipa, aho sinah dah kan kal lai? Zungzal nunnak a pemi bia cu nangmah sin lawng ah pei a um cu.
69 Nangmah hi Pathian sinin a rami Mithiang na si ti kha kan hngalh i kan zumh” tiah a ti.
70 Jesuh nih “Nannih hleihnih hi keimah nih kaan thim hna lo maw? Asinain nan lakah thangchiattu pakhat a um” tiah a ti.
71 Simon Iskariot fapa Judas kong kha Jesuh nih a chimmi a si. Zeicahtiah anih cu lamkaltu hleihnih lakah aa tel ko nain Jesuh a rawitu ding kha a si.
Footnotes
^ Rom ngun tangka piakhat. Biafang Fianternak ah zoh.
^ Kilometer 5 asiloah 6 hrawng. A hrampi, “stadia 25 asiloah 30 hrawng.” Stadia 1 cu 185 meter hrawng he aa khat.
^ A hrampi, “Rabbi.”
^ Biafang Fianternak ah zoh.
^ A hrampi, “nan chung ah nunnak a um lai lo.”
