Kolose 1:1-29
1 Pathian duhnak in Khrih Jesuh lamkaltu a simi keimah Paul le kan unau Timote nih,
2 Kolose khua i Khrih he lungthin khat tein a ummi mithiang mi le zumhawk tlakmi unau hna sinah cakuat kan rak ṭial:
Kan Pa Pathian vel le daihnak cu nan cung ah um ko seh.
3 Nan ca i thla kan cam tik paoh ah kan Bawipa Jesuh Khrih i a Pa, Pathian sinah lawmhnak bia kan chim zungzal.
4 Zeicahtiah Khrih Jesuh nan zumhnak le mithiang mi dihlak nan dawt hnanak kong kha kan theih.
5 Cutin zumhnak le dawtnak nan ngeihmi cu vancung ah ruahchannak chiahpiak nan si caah a si. Biatak thawngṭha bia nan rak theihka ah mah ruahchannak kong kha nan rak hngalh i,
6 cu bia cu nan sinah a phan. Thawngṭha cu thei a tlai i vawleicung pumpi ah a karh. Pathian vel kong biatak hmaan tein nan theih i nan hngalh ni thawk in nan lak zong ah thei a tlai i a karh ve.
7 Kanmah aiawh in zumhawktlak tein Khrih rian a ṭuanmi, kan salhawi dawtmi Epafras sinin thawngṭha kha nan rak theih.
8 Thlarau nih a chuahtermi nan dawtnak kong zong amah nih a kan chimh.
9 Nan kong kan theih ni thawk in nan caah thlacam kan ngol bal lo. Pathian duhnak he aa tlaimi a hmaanmi hngalhnak nan ngeih nakhnga, fimnak taktak le thlarau thawng in hngalhthiamnak nan ngeih nakhnga thla kan in campiak hna.
10 Mah lawng ah Jehovah* he aa tlakmi nunning in nan nung kho lai i tling tein a lung nan lawmhter khawh lai. Thilṭha nan tuahnak kip ah thei nan tlai lai i Pathian kong a hmaanmi hngalhnak nan ngei chin lai.
11 Pathian i a liannganmi a ṭhawnnak nih thazaang in pe ko hna seh. Cuticun zei thil paoh kha lungsau tein le lunglawm tein nan inkhawh lai.
12 Ceunak chung ah a ummi mithiang mi hna ro kha co ve awkah sining aan tlinhtertu hna Pa Pathian cu lawm ko u.
13 Pathian nih muihnak ṭhawnnak chung in a kan khamh i a dawtmi a Fapa pennak chung ah a kan luhpi.
14 A Fapa tlanhnak thawng in luatnak kan hmu i kan sualnak cu ngaihthiam kan si.
15 Amah cu hmuh khawh lomi Pathian muisam a si, sermi thil vialte lakah fater a si.
16 Amah thawng in Pathian nih vancung ah le vawleicung ah a ummi thil vialte, hmuh khawhmi thil, hmuh khawh lomi thil, bawiṭhutdan, uknak, cozah le nawlngeihnak kha a ser hna. Zeizong vialte cu amah thawng in le amah caah sermi an si.
17 Mah leng ah a dang sermi thil vialte an um hlan in a rak um cang. Amah thawng in thil dang vialte cu an hung ummi a si.
18 Amah cu pum a simi Khrihfabu lu a si. Zeizong vialte ah a hramthawknak a si, thihnak in a tho hmasa bikmi fater a si. Cuticun zeizong vialte ah a hmasa bik a hung si.
19 Zeicahtiah Pathian nih zeizong vialte kha a fapa sinah tlinter a duh.
20 Hremnak tung* cung ah a fapa thletmi thisen thawng in Pathian nih daihnak a ser i vawlei i a ummi thil si hna seh, van i a ummi thil si hna seh, zeizong vialte kha a fapa thawng in amah he a remter hna.
21 A hlanah cun thil ṭhalo kong lawng nan rak ruah caah Pathian he nan i hlat i a ral nan rak si.
22 Atu cu Pathian nih a fapa taksa pum kha a thihternak thawng in amah he aan remter cang hna. Cucaah a hmaiah a thiangmi, soisel awk a um lomi le sualphawt awk a um lomi nan si kho cang.
23 Cucaah zumhnak ah fek tein dir u. Nan rak theihmi thawngṭha he aa tlaimi ruahchannak kha thlau loin zumhnak hram cung ah fek tein dir u. Thawngṭha cu vanraang tang i a ummi mi vialte sinah chim a si cang. Keimah Paul cu hi thawngṭha caah rianṭuantu ka hung si.
24 Nan ca i ka temhinnak ah hin ka tha a nuam ko. Asinain Khrih nih a pum a simi Khrihfabu caah temhnak a in tluk cun ka ing rih lo.
25 Nanmah ṭhatnak caah Pathian bia tling tein chim khawh awk le Pathian pekmi rian ṭuan khawh awkah Khrihfabu rianṭuantu ka hung si.
26 Mah a thiangmi biathli cu hlanlio chan* le hlanlio mi hna sinin thuh a rak si nain atu ah cun mithiang mi hna sinah phuan a si cang.
27 Pathian nih a thiangmi biathli i a sunglawimi a rumnak kha miphun dang hngalhter a duh hna. Mah biathli cu Khrih he lungthin khat tein nan ummi, a sunparnak i hrawm awkah ruahchannak nan ngeihmi kha a si.
28 Khrih kong kan chimmi, mikip ralrin kan pekmi hna le fimnak taktak he kan cawnpiakmi hna cu Khrih he lungthin khat in a ummi vialte kha nutling, patling in Pathian sinah kan pekchanh khawh hna nakhnga caah a si.
29 Cucaah kei cu ka chung ah rian a ṭuanmi a ṭhawnnak thawng in fakpi in, thazaang chuah in rian kaa zuam.
Footnotes
^ Biafang Fianternak ah zoh.
^ Biafang Fianternak ah zoh.
^ Asiloah “a luancia kum hna.” Biafang Fianternak ah zoh.
