Kolose 2:1-23
2 Nanmah caah siseh, Laodisia mi hna caah siseh, a ka hmu bal lomi hna caah siseh zeitluk in dah rian kaa zuam ti kha hngalhter kaan duh hna.
2 Mah cu hnemhnak nan hmuh khawh nakhnga le dawtnak in ningcang tein nan i funtom khawh nakhnga caah a si. Cuticun Pathian i a thiangmi biathli a simi Khrih kong a hmaanmi hngalhnak le hngalhthiamnak in nan rum lai.
3 Fimnak ro le hngalhnak ro vialte cu Khrih ah ṭha tein thuh a si.
4 Cutin ka chimmi cu ahohmanh nih lemsoinak bia in an in hlen hna nakhnga lo caah a si.
5 Ka mipum cu nan sinah a um lo nain ka lungthin cu nan sinah a um. Ningcang tein nan ummi le Khrih nan zumhnak a fehmi kha ka hngalh caah kaa lawm.
6 Cucaah Bawipa Khrih Jesuh kha nan rak cohlan cang bantuk in amah he lungthin khat tein kal zungzal ko u.
7 Cawnpiak nan si bantuk in Khrih ah thukpi in nan hram thla u law amah cung ah i sa u. Cun nan zumhnak ah fek tein dir u law Pathian sinah lawmhnak bia chim zungzal u.
8 Minung ruahnak le pakpalawng a simi hlennak in foih aan timtu hna kha i ralring hna u. An ruahnak cu Khrih cawnpiaknak ah si loin minung phunglam le vawlei i a hrampi phunglam cung ah hram aa bunh.
9 Pathian sining vialte cu Khrih ah a tling dih.
10 Cucaah cozah le nawlngeihnak vialte lu a simi Khrih thawng in nan herhmi vialte tling tein nan ngei dih.
11 Khrih zultu in cuarpar tan nan si cang. Kut in cuarpar tannak cu a si lo, a sualmi nan pumsa duhnak nan hlohmi kha a si. Khrih ta a simi nih cun cutin cuarpar an i tan awk a si.
12 Khrih inmi tipilnak kha nan in caah amah he vuiṭi nan rak si. Nannih cu a zultu nan si ca le thihnak in a thawhtertu Pathian ṭhawnnak kha nan zumh caah amah he thawhter nan si.
13 Mah leng ah nan nawl buarnak ruang le taksa in cuarpar nan i tan lo ruang ah a thimi bantuk nan rak si nain Pathian nih Khrih he aan nunter cang hna. Kan sualnak vialte kha Pathian nih lungtak tein a kan ngaihthiam i,
14 kan sualnak a langhtertu, kut in ṭialmi Nawlbia kha a hnawh dih cang. Hremnak tung* cung ah a khenh chihnak thawng in a hrawh dih cang.
15 Pathian nih hremnak tung thawng in* cozah le nawlngeitu kha a tei hna. Teinak lamzawhnak ah sal tlaihmi bantuk in a hruai hna i zapi hmaiah a hmuhsak hna.
16 Cucaah ei le din kong ah siseh, puai tuahnak, thla thar le sabbath ulhnak kong ah siseh ahohmanh bia i ceihter hna hlah u.
17 Cu thil hna cu a ra laimi thil muithlam an si. A taktak cu Khrih kha a si.
18 I titer in aa toidormi le vancungmi a biami* kha i ralring hna u. Zeicahtiah annih nih laksawng hmuh lo awkah an in kham khawh hna. Cu bantuk mi hna nih cun an hmuhmi thil lawng kha fek tein an i tlaih i pakpalawng a simi an ruahnak ah an i porhlaw.
19 Cun Lu lamhruainak kha an zul lo. Lu thawng in pum nih a herhmi kha a hmuh i pum cu hliahcaang le tha thawng in hmunkhat te ah ningcang tein an i pehtonh dih. Pathian nih Lu thawng in pum cu a ningpi in a ṭhanter.
20 Vawlei i a hrampi phunglam hna kha nan hlawt i Khrih he nan thihṭi cang ahcun zeicah vawlei ta a simi bantuk in nan nun rih?
21 “Tlai hlah, tep hlah, tawng hlah” timi nawlbia hna kha zeicah nan zulh rih kun?
22 Cu nawlbia hna cu minung nawl peknak le cawnpiaknak an si caah hman an si hnuah cun an lo dih ko.
23 Cu nawlbia hna cu fimnak a pemi an lo nain mi kha an pumsa duhnak dohnak ah a bawm kho hna lo. Zeicahtiah annih nih anmah duh ning in Pathian kha an biak, aa toidormi an i lawhter i an pum kha fakpi in an hrem caah a si.
Footnotes
^ Biafang Fianternak ah zoh.
^ Asiloah “Khrih thawng in” ti zong a si kho.
^ Asiloah “vancungmi nih an biak bantuk in a biami.”
