Kolose 3:1-25
3 Nannih cu Khrih he thawhter cangmi nan si ahcun cunglei thil kha kawl peng ko u. Cuka cu Pathian orhlei kam i Khrih a ṭhutnak hmun kha a si.
2 Nan lungthin cu vawlei thil ah si loin cunglei thil ah chia zungzal u.
3 Zeicahtiah nannih cu nan thi cang i nan nunnak cu Khrih he thuh a si cang. Mah cu Pathian duhnak ning in a si.
4 Nunnak a kan hmuhtertu Khrih a langh tikah nannih zong amah he sunparnak in nan lang ve lai.
5 Cucaah nupa sualnak,* thurhnawmhnak, ningzak a simi hornak, thil ṭhalo tuah duhnak le siasal biak a simi hakkauhnak hna a chuahtertu nan pum ṭengnge* kha thihter hna u.
6 Cu bantuk thil a tuahmi hna cung ah Pathian thinhunnak a tlung lai.
7 Nannih zong a hlanah cu bantuk thil hna kha nan rak tuah.
8 Asinain atu cu thinlinhnak, thinhunnak, ṭhatlonak, volhpamhnak hna kha hlaw dih u law a thurhnawmmi bia kha nan kaa in chuahter hlah u.
9 Pakhat le pakhat i hleng hlah u. Nan mihlun kha a tuah tawnmi ziaza he khan i phoih u law,
10 Pathian pekmi mithar kha i hruk u. Mithar cu a hmaanmi hngalhnak thawng in Pathian he i lawh chin awkah tharchuah chin lengmangmi kha a si.
11 Mithar kan i hruk ahcun Greek mi le Judah mi, cuarpar tanmi le tan lomi, ramdang mi, Sitian mi,* sal le miluat tiin a um ti lo. Khrih cu kan caah zeizong vialte a hung si i kannih cu a kut tang ah kan um.
12 Pathian thimmi, mithiang mi le dawtmi nan si bantuk in zawnruahnak, zaangfahnak, toidornak, nemnak le lungsaunak kha i hruk u.
13 Pakhat le pakhat cung ah lungsi lonak nan ngeih hmanh ah i ing u law lungtak tein i ngaithiam peng u. Jehovah* nih lungtak tein aan ngaihthiam hna bantuk in nannih zong cuticun i ngaithiam ve u.
14 Cu thil vialte leng ah dawtnak kha i hruk u. Zeicahtiah dawtnak cu mi vialte lungrual tein a funtomtu a si.
15 Cun Khrih daihnak nih nan lungthin cu uk ko seh. Zeicahtiah pumkhat si awk le mah daihnak kha hmuh awkah Pathian nih aan auh hna. Cun lawmh a hngalmi si u.
16 Khrih bia cu nan lungthin chung ah khat seh law mifim ah in ser ko hna seh. Salm hla, Pathian thangṭhatnak hla le lunglawmhnak in sakmi thlaraulei hla in pakhat le pakhat i cawnpiak u law thazaang i pe zungzal u. Lungthin tak tein Jehovah* sinah hla sa u.
17 Nan bia in siseh, nan tuahsernak in siseh, nan tuahmi paoh kha Bawipa Jesuh min in tuah ko u. Amah thawng in Pa Pathian kha lawm ko u.
18 Nupile hna, nan vale tang ah i dor u. Bawipa zultu a simi nih cun cutin an tuah awk a si.
19 Vale hna, nan nupile kha daw peng hna u law an cung ah a luan tuk in nan thinhung hlah u.*
20 Fale hna, zeizong kip ah nan nu le nan pa bia kha ngai hna u, mah cu Bawipa duhmi a si.
21 Pale hna, nan fale kha an thinhunter tuk hna hlah u, an lung a dong sual lai.
22 Salle hna, nan bawile kha zeizong kip ah an nawl ngai hna u. An lungton duh ruang men ah an hmuhnak lawng ah si loin* lungthin tak tein le Jehovah* ṭihnak he an nawl ngai hna u.
23 Zei thil nan tuah paoh ah minung caah si loin Jehovah* caah ka tuah timi lungput he lungthin dihlak in tuah ko u.
24 Zeicahtiah laksawng caah Jehovah* sinin ro nan hmuh lai kha nan hngalh ko. Bawipa Khrih caah sal si u.
25 Thil ṭhalo a tuahtu nih cun a tuahmi ṭhatlonak man kha a hmuh ko lai. Pathian cu thleidannak a ngei lo.
Footnotes
^ Greek, por·nei′a. Biafang Fianternak ah zoh.
^ A hrampi, “vawlei in sermi pum ṭengnge.”
^ An tuahsernak le an phungphai ruang ah mi nih zohchukmi hna kha a chim duhmi a si.
^ Biafang Fianternak ah zoh.
^ Biafang Fianternak ah zoh.
^ Asiloah “puarhrang hlah u.”
^ A hrampi, “Mi lungton a duhmi hna bantuk in mit hmuhnak lawng ah si loin.”
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
