Kolose 4:1-18
4 Bawile hna, nan salle kha ding tein le thleidannak um loin pehtlai hna u. Nannih zong vancung ah Bawi nan ngei ve ti kha hngal u.
2 Ngol loin thlacam u, cutin tuah awkah hliphlau tein um u law lunglawmhnak bia chim u.
3 Kanmah ca zong ah thla rak kan campiak u. Pathian nih a bia le Khrih kong a thiangmi biathli chim awkah kutka a kan hunpiak nakhnga thla kan campiak u. Mah biathli ruang ah thong ka tlakmi a si.
4 Ka chim awk a si ning in fiang tein ka chim khawh nakhnga zong ka campiak u.
5 Bu leng i a ummi hna he nan i pehtlaih tikah fimnak ngei u, a caan kha a ṭha bik in hmang u.*
6 Cite phulhmi rawl cu a thawt bantuk in nan bia cu a thlum-almi a si nakhnga ngaih a nuammi siter zungzal ko u. Cuticun mikip kha zeitindah bia kan leh hna awk a si ti nan hngalh lai.
7 Dawtmi unau, zumhfekmi rianṭuantu le Bawipa ah ka salhawi a simi Taikhikas nih ka kong kha a dihlak in aan chimh hna lai.
8 Kan sining kha nan hngalh nakhnga le nan lungthin aan hnemh hna nakhnga nan sinah ka rak thlahmi a si.
9 A sinah zumhawk a tlakmi le ka dawtmi unau Onesimas zong a ra ve lai, anih cu nan lakah a rak um balmi a si. Annih nih hika i a cangmi thil vialte kha an in chimh hna lai.
10 Ka sinah thong a tla vemi Aristarkas zong nih nan kut aan tlaih hna, Barnabas i dankhat a nau Marka zong nih nan kut aan tlaih hna. (Marka a rat ahcun rak cohlang u timi lamhruainak nan hmuh cang.)
11 Justus timi Jesuh zong nih nan kut aan tlaih hna, annih cu cuarpar tanmi an si. Anmah lawnglawng hi Pathian Pennak caah ka rianṭuanṭi hawi an si i ka caah hnemtu* taktak an si.
12 Nanmah lak i pakhat a simi Khrih Jesuh sal Epafras zong nih nan kut aan tlaih hna. Anih cu nan caah fakpi in thla a cam zungzal. Mah cu Pathian duhnak he aa tlaimi kong vialte kha fek tein nan zumh nakhnga le nutling patling in nan dir khawh zungzal nakhnga caah a si.
13 Anih cu nanmah caah siseh, Laodisia khua le Heirapolis khua i a ummi hna caah siseh fakpi in rian a ṭuanmi a si ti kha ka chim ngam.
14 Dawtmi siibawi Luka le Demas zong nih nan kut an in tlaih hna.
15 Laodisia khua i unau pawl le unaunu Nimfa le a inn ah aa pummi Khrihfabu kha an kut ka tlaihpiak hna u.
16 Mah cakuat hi nan rel dih hnuah Laodisia Khrihfabu zong nih an rel khawh ve nakhnga rak kua hna u. Laodisia khua i ka cakuat zong nan sinah rel ve ding in rak hal hna u.
17 Cun Arkhipas kha “Bawipa sinin na hmuhmi rian kha liim awkah fakpi in i zuam peng” tiah rak chim u.
18 Hi chawnhbiaknak hi keimah Paul nih keimah kut tein ka ṭialmi a si. Thong ka tlakmi hi rak philh hlah u. Pathian vel cu nan cung ah um ko seh.
