Lamkaltu 1:1-26
1 Theofilas, ka ṭialmi a hmasa cauk ah Jesuh nih a tuahmi le a cawnpiakmi kong vialte,
2 a thimmi lamkaltu pawl thiang thlarau in lamhruainak a pek hna hnuah vancung ah lak a si ni tiang a tuahmi le a chimmi vialte aa tel.
3 A thih hnuah a tho ṭhan hrimhrim ti a langhtermi thil tampi kha lamkaltu pawl a hmuhsak hna. Ni 40 chung an sinah voi tampi a lang i Pathian Pennak kong kha a chimh hna.
4 Hmunkhat i an i pumh lioah “Jerusalem in chuak hlah u, ka Pa nih bia aan kamhmi hna kha hngak peng ko u. Mah biakam kong kha ka rak in chimh cang hna.
5 Johan nih ti in tipilnak a pek hna, nannih tu cu a rauhhlan ah thiang thlarau in tipil pek nan si lai” tiah a rak ti hna.
6 Hmunkhat i an i pumh lioah “Bawipa, Israel mi caah pennak kha atu ah maw na dirh ṭhan lai?” tiah an hal.
7 Mah tikah “Ka Pa nih ri a khiahmi ni le caan kong cu hngalhnak nawl nan ngei lo.
8 Asinain thiang thlarau nan cung i a tlun tikah ṭhawnnak nan hmu lai i Jerusalem, Judea ram vialte, Samaria ram le vawleicung pumpi ah ka kong kha tehte nan khaan lai” tiah a ti hna.
9 Cutin a chim dih hnu, an zoh ko lioah cun Bawipa cu van ah lak a si i minmei nih a hun phenh caah an hmu kho ti lo.
10 Cutin vancung a kaimi an zoh lioah puan raang aa aihmi mi pahnih cu an pawng ah ruahlopi in an hung dir.
11 Cun annih nih “Galili mi hna, zeicah van cu nan zoh len ko? Jesuh vancung ah lak a simi cu nan hmuh cang. Hi bantuk te hin a ra ṭhan lai” tiah an ti hna.
12 Mah hnuah Oliv Tlang in Jerusalem ah an kir ṭhan. Mah tlang cu Jerusalem in meng cheu hrawng* aa hlat.
13 An phanh tikah Peter, Johan, Jeim, Andru, Filip, Thomas, Bartholomew, Matthai, Alfias fapa Jeim, a lung a thomi Simon le Jeim fapa Judas cu an i ṭhumhnak inncung dot ah an kai.
14 An dihlak in Jesuh a naule, a nu Mary le a dang nu hna he lungkhat tein thla an camṭi tawn.
15 Cuticun nikhat cu mi 120 hrawng an i pumh lioah Peter cu an laifang ah a hung dir i,
16 “Unau hna, Jesuh a tlaitu pawl lam a hruaitu Judas kong he aa tlaiin David hmang in thiang thlarau nih a chimchungmi cathiang bia cu a tlin hrimhrim awk a si.
17 Judas cu kanmah bantuk in lamkaltu pakhat a rak si ve i hmunkhat ah rian kan ṭuanṭi.
18 (Mah pa nih thil ṭhalo a tuahmi man in lo pakhat a cawk. A biktaling in a tla, a paw a kek i a ril vialte a chuak dih.
19 Mah kong kha Jerusalem khuami vialte nih an hngalh, cucaah mah lo kha an holh in A·kel′da·ma tiah an auh. A sullam cu “Thisen Lo” tinak a si.)
20 Salm cauk chung ah ‘A umnak hmun cu ṭhing ko seh, ahohmanh nih umnak hna hlah seh. Hruaitu a sinak a rian cu midang nih co hna seh’ tiah aa ṭial.
21 Cucaah Bawipa Jesuh kan sin i a um lioah kanmah he aa kommi hna lakin pakhat kha a hmun ah kan airolh a hau.
22 Johan sinah Bawipa tipil a in caan thawk in vancung ah lak a si ni tiang kanmah he aa kommi a si lai. Bawipa a thawh ṭhanmi kha kanmah he a mit in a hmumi zong a si lai” tiah a ti.
23 Cucaah mi pahnih kha an chuahpi hna. Pakhat cu Barsabbas tiah auhmi Josef a si, Justus ti zong in an auh. A dang pakhat cu Matthias a si.
24 Cun thla an cam i “Minung lungthin a hngal dihtu Jehovah,* hi pahnih lakah hin ahodah na thim ti kha kan hmuhsak ko.
25 Amah pumpak lam zulh awkah a rian le lamkaltu sinak a kaltakmi Judas hmun kha airolh awkah a si” tiah an ti.
26 Cun camcawhfung an zuh tikah Matthias cung ah a tla. Cucaah anih cu a dang 11 he lamkaltu sinak nawl a hmu.
Footnotes
^ A hrampi, “sabbath ni ah kalnak nawl an awnhmi lamkal hrawng.”
^ Biafang Fianternak ah zoh.
