Lamkaltu 16:1-40
16 Paul cu Derbe khua, cun Listra khua ah a rak phan. Cuka ah Timote timi zultu pakhat a um, a nu cu zumtu Judah mi a si i a pa cu Greek mi a si.
2 Timote cu Listra le Ikonium khua i unau pawl nih an chimthiam ngaimi a si.
3 Paul nih Timote i kalpi a duhnak kong kha a chim. Timote a pa cu Greek mi a si kha cuka hmun i Judah mi vialte nih an hngalh caah Paul nih a auh i a cuarpar a tan.
4 Khua khat hnu khua khat an tlawn pah in Jerusalem ah a ummi lamkaltu le upa hna nih zulh awk in biachahnak an tuahmi kong kha an chimh hna.
5 Cucaah Khrihfabu hna cu an zumhnak a fek chin lengmang i nikhat hnu nikhat in an karh chin.
6 Asia peng ah Pathian bia chim lo ding in thiang thlarau nih a thlauh hna caah Frizia le Galatia ram chung ah an tlawng.
7 Misia ram an phan i Bithinia ram lei ah kal an i zuam nain thiang thlarau hmang in Jesuh nih a awnh hna lo.
8 Cucaah Misia ram kha an tan i Troas khua an phan.
9 Zan ah Paul nih langhnak pakhat a hmuh. Masidonia mipa pakhat cu a hmaiah a dir i “Masidonia ram ah ra law rak kan bawm” tiah a nawl.
10 Mah langhnak a hmuhle cangka Masidonia ram lei kal awkah kan i tim colh. Zeicahtiah cuka mi hna sin thawngṭha chim awkah Pathian nih a kan fial ti kha kan hun hngalh caah a si.
11 Troas in Samothra tikulh lei ah tilawng in kan lan thluahmah i a thaizing ah Neapolis khua kan phan.
12 Cuka in kan i thawh i Filipi khua kan phan. Mah khua cu Rom kut tang ah a ummi khua a si i Masidonia ram khualipi a si. Cuka ah ni tlawmpal kan caam.
13 Sabbath ni ah thlacamnak hmun a um ṭheo lai tiah khua leng i tiva kam ah kan kal. Cuka ah kan ṭhu i hmunkhat ah a rak i pummi nu hna kha phung kan chimh hna.
14 Maimaw puan a zuarmi, Tiatira khuami Lidia timi nu nih kan bia kha a ngaih. Anih cu Pathian a biami a si i Paul nih a chimmi kha ṭha tein ngaih awkah Jehovah* nih a lungthin kha kaupi in a hunpiak.
15 Cucaah amah le a inn i a ummi dihlak cu tipil an ing. Cun “Jehovah* cung ah zumhfek tein a ummi in nan ka ruah ahcun ka inn ah rak ka tlung u” tiah a kan ti i a kan sawm chih.
16 Nikhat cu thlacamnak hmun i kan kal lioah hmailei kong a chim khomi, khuavang a ngeimi salnu te he kan i tong. Hmailei kong a chim khawhnak nih cun a bawile kha a ṭhathnemh ngai hna.
17 Mah nute nih Paul le kanmah hnu kha a kan zulh peng i “Hi hna hi Cung Nung Bik Pathian salle an si, khamhnak hmuh khawhnak lam kha an in chimh hna” tiah a au.
18 Cutin ni tampi a au lengmang caah Paul nih a ing kho ti lo. Cucaah aa mer i khuavang kha “Jesuh Khrih min in nawl kaan pek, a chung in chuak tuah” tiah a ti. Cu cangka cun khuavang nih a chuahtak colh.
19 A bawile nih an tangka hmuhnak lam a pit cang ti kha an hngalh tikah Paul le Silas kha an tlaih hna i nawlngeitu pawl an umnak chawdawrnak hmun* ah an hnuh hna.
20 Khua uktu pawl sinah an kalpi hna i “Hi Judah mi hna nih kan khua hi hnahnawhnak an kan pek tuk.
21 Kannih Rom mi nih kan cohlan awk le kan zulh awk a si lomi phungphai hna kha mi an cawnpiak hna” tiah an ti.
22 Mibu zong nih thinhung ngai in an au hnawh hna. Khua uktu hna nih Paul le Silas kha an puan phoih awk le fung in tuk awkah nawl an pek hna.
23 Voi tampi an tuk hna hnuah thong ah an thlak hna i ṭha tein cawngh awkah thongbawi kha nawl an pek.
24 Cutin nawl pek a si caah thongbawi nih annih kha thonginn chung chin khaan ah a chiah hna i an ke kha hreng a khenh hna.
25 Zanṭim hrawng ah Paul le Silas cu thla an cam i Pathian thangṭhatnak hla an sa. Thongtla dang nih an ngaih hna.
26 Ruahlopi in li fakpi in aa hnin i thonginn cu a hram tiang a hninh dih. Thonginn kutka vialte cu aa hung dih i thongtla pawl i an thir cikcin le hreng an khenhmi hna zong a poih dih.
27 Thongbawi cu a hun i hlau i thonginn kutka pawl aa hun dihmi kha a hmuh tikah thongtla vialte an tli dih cang tiah a ruah caah a vainam kha aa zuh i amahle amah thah aa tim.
28 Mah tikah Paul nih “Nangmahle nangmah fahnak i pe hlah, kan dihlak in kan um ko hih!” tiah aw thangpi in a hei ti.
29 Thongbawi nih meiinn rak pu u tiah a ti hna i a chung ah khulrang in a lut. Cun Paul le Silas kehram ah ther lengmang in a bawk.
30 Mah hnuah leng ah a chuahpi hna i, “Ka bawile hna, khamhnak ka hmuh nakhnga zeidah ka tuah lai?” tiah a hal hna.
31 Mah tikah “Bawipa Jesuh kha zum. Nan zumh ahcun nangmah he, na inn i a ummi dihlak he khamhnak nan hmu lai” tiah an leh.
32 Cun thongbawi le a inn i a ummi dihlak kha Jehovah* bia kong an chimh hna.
33 Cu zan hrimhrim ah cun thongbawi nih a kalpi hna i an hma kha a ṭawlpiak hna. Cun thongbawi le a inn i a ummi dihlak cu tipil an ing colh.
34 Paul le Silas kha inn ah a ṭinpi hna i rawl a dangh hna. Pathian kha a hun zumh caah aa lawm tuk, a inn i a ummi dihlak zong an i lawm tuk.
35 Khua a dei tikah khua uktu hna nih palik bawi kha thongbawi sinah an thlah hna i “Mah mi hna kha rak thlah hna” tiah an ti.
36 Thongbawi nih Paul kha “Khua uktu pawl nih nanmah pahnih kha thlah awkah nawl an ka pek. Cucaah atu chuak u law dai tein va kal cang u” tiah a ti.
37 Mah tikah Paul nih “Rom rammi a simi kannih kha biaceih hmasa loin zapi hmaiah fung in an kan tuk i thong an kan thlak hnuah atu a thli tein maw thlah an kan timh? A si kho lo. Anmah theng ra hna seh law rak kan chuah hna seh” tiah a ti.
38 Palik bawi hna nih mah bia kha khua uktu pawl an chimh ṭhan hna. Annih cu Rom rammi an si ti kha an theih tikah an thin a phang tuk.
39 Cucaah an ra i Paul le Silas kha ngaihthiam an hal hna. Thong chung in an chuah hna hnuah an khua kha chuahtak ding in an nawl hna.
40 Asinain thong in an chuah hnuah Lidia inn ah an va kal. Unau pawl kha an hmuh hna tikah thazaang an pek hna i an kal.
Footnotes
^ Biafang Fianternak ah zoh.
^ Biafang Fianternak ah zoh.
^ “Zapi tonnak hmun.”
^ Biafang Fianternak ah zoh.
