Lamkaltu 18:1-28
18 Mah hnuah Paul cu Athens khua in a chuak i Korin khua ah a kal.
2 Cuka ah Pontas rammi, Judah miphun Akuila le a nupi Prisilla he an i tong. Judah mi vialte kha Rom khua in chuah awkah Klaudias nih nawl a chuah caah Italy ram in naite ah a rak phanmi an si. Paul cu an sinah a va kal,
3 an rian aa khah caah an inn ah a um i anmah he rian an ṭuanṭi. Annih cu puan thlam a ṭhimi an si.
4 Paul cu sabbath ni fatin pumhnak inn ah phung a chim* i Judah mi le Greek mi kha an lung a pem nakhnga a chimh hna.
5 Silas le Timote cu Masidonia ram in an rak phanh tikah Paul nih a caan dihlak kha Pathian bia chimnak ah a hman. Jesuh cu Khrih a si ti kha Judah mi sinah tehte a khaan.
6 Asinain an ralchanh i an volhpamh peng caah Paul nih a puan i leidip kha a thin hnawh hna i “Nan thisen cu nanmah lu cung ah tla ko seh. Kei cu ka thiang cang. Atu thawk in miphun dang sinah ka kal cang lai” tiah a ti hna.
7 Cucaah pumhnak inn ah phung chim ti loin Pathian a biami Titius Justus inn ah a chim. A inn cu pumhnak inn kamte ah a si.
8 Pumhnak inn haotu Krispas le a inn ah a ummi vialte cu Bawipa zumtu an hung si. Korin khua i thawngṭha a theimi mi tampi zong zumtu an hung si i tipil an ing.
9 Zankhat cu Paul nih langhnak a hmuh i mah ah Bawipa nih “Ṭih hlah. Phung kha chim peng ko. Na lung dong hlah.
10 Keimah nih kaan umpi caah ahohmanh nih harnak an in pe kho lai lo. Hi khua ah ka mi tampi an um rih” tiah a ti.
11 Cucaah Paul cu cuka ah kumkhat le thla ruk a um i Pathian bia kha a cawnpiak hna.
12 Gallio cu Akhaia ram i peng uktu a si lioah Judah mi nih Paul kha lungkhat tein an doh i biaceihnak hmun ah an chuahpi.
13 “Hi pa nih phung he aa ralkahmi lam in Pathian biak awkah mi kha a lem hna” tiah an ti.
14 Paul nih biachim aa timh lioah Gallio nih “Judah mi hna, hi pa nih ṭhatlonak le sualnak ngan a tuahmi a si ahcun lungsau tein nan bia kaan ngaihpiak hna awk a si ko.
15 Asinain bia nan i almi le mi kong le nan phung kong nan i almi a si ahcun nanmah tein vaa ceih ko u. Cu bantuk kong ah biaceihtu si ka duh lo” tiah a ti.
16 Cun Judah mi pawl kha biaceihnak hmun in a ṭhawl hna.
17 Cucaah Judah mi nih pumhnak inn haotu Sosthenes kha an tlaih i biaceihnak ṭhutdan hmaiah an tuk. Asinain Gallio cu mah kong ah aa thlak duh lo.
18 Paul cu cuka khua ah ni tlawmpal a caam hnuah unau pawl kha a chawnhbiak hna i Prisilla le Akuila he tilawng in Siria lei ah an kal. Pathian sinah biakamnak a tuah caah Kenkhria khua ah a sam tawi tein aa met.
19 Efesa khua an phanh tikah Prisilla le Akuila kha a kaltak hna. Cun pumhnak inn ah a lut i Judah mi kha a ruahceihpi hna.
20 Sau deuh in caam awkah an nawl len nain a al hna.
21 A chawnhbiak ta hna i “Jehovah* duhnak a si ahcun nan sinah ka rak kir ṭhan ko lai” tiah a ti hna. Mah hnuah Efesa khua in tilawng in aa thawh.
22 Sisaria khua a phanh tikah Jerusalem khua ah a kal i Khrihfabu kha a va chawnhbiak ta hna. Mah hnuah Antiok khualei ah a lan.
23 Paul cu cuka khua ah ni tam nawn a um hnuah aa thawh ṭhan. Galatia le Frizia ram chung ah khua khat hnu khua khat in a tlawng i zultu pawl kha thazaang a pek hna.
24 Alekzandria khuami, Apollo tiah auhmi Judah mi pakhat cu Efesa khua ah a rak phan. Anih cu biachim a thiam ngaimi le Cathiang ṭha tein a hngalmi a si.
25 Jehovah* lam kong a rak cawngmi a si. Thiang thlarau thawng in a lung a tho i Jesuh kong kha hmaan tein a chim, a cawnpiak hna. Asinain Johan nih a rak chimmi tipil innak kong lawng kha a hngalh.
26 Pumhnak inn ah ralṭha tein phung a chim. A chimmi kha Prisilla le Akuila nih an theih tikah an kalpi i Pathian lam kong kha hmaan deuh in a hngalh nakhnga an chimh.
27 Mah leng ah Apollo cu Akhaia ram ah kal a duh caah unau pawl nih zultu hna sinah ca an ṭial i amah kha rak conglawmh ding in an forh hna. A phanh tikah Pathian velngeihnak thawng in zumtu a hung simi hna kha tampi a bawmh hna.
28 Jesuh cu Khrih a si ti kha Cathiang hmang in a langhter i Judah mi pawl cawnpiaknak a palh ti kha zapi hmaiah lungtho tein le ṭha tein a fianter.
