Lamkaltu 2:1-47
2 Pentekos Puai ni* a phanh tikah zultu hna cu hmunkhat ah an i pum.
2 Mah lioah ruahlopi in thlitu fakpi in a hrangmi thawng bantuk vancung in a rung thang. Cu thawng cu an ṭhutnak innchung ah a thang dih.
3 Cun lei bantuk meizik an hung chuak, meizik cu an i ṭhenṭhek i pakhat cio an lu cung ah a taang.
4 An dihlak in thiang thlarau in an khat i thlarau nih chim khawhnak a pek hna ning in holh dangdang in an holh.
5 Cu caan cu vawleicung khuazakip i Pathian a ṭihzah ngaingaimi, Judah mi hna Jerusalem ah an um lio te a si.
6 Mah thawng kha an theih tikah mibu cu an rak i pum i anmah holh tein an chimmi kha an theih caah an khuaruah a har tuk.
7 An lau tuk i “Zoh hmanh u, atu bia a chimmi dihlak hi Galili mi an si ko lo maw?
8 Cu a si ah zeitindah kanmahle holh cio tein kan theih kun hnga?
9 Kannih cu Parthia mi, Media mi, Elam mi, Mesopotamia ram, Judea ram, Kappadosia ram, Pontas ram le Asia peng ah a ummi,
10 Frizia ram, Pamfilia ram, Izipt ram le Sairin khua pawng i Libia peng ah a ummi, Rom in a rak tlawngmi Judah mi le Judah biaknak ah a lutmi,
11 Krit mi le Arab mi kan si. Asinain Pathian tuahmi khuaruahhar thil kong kha kanmahle holh in pei kan theih ko hna hi” tiah an ti.
12 “Zeitindah a si hnga?” tiah pakhat le pakhat khuaruahhar ngai in an i hal.
13 Asinain cheukhat nih cun “Hi hna hi zu an ri ko hih” tiah an nihsawh hna.
14 Mah tikah Peter cu lamkaltu 11 he a hung dir i aw thangpi in hitin a chim: “Judah mi le Jerusalem khuami vialte hna, ka chimmi hi ṭha tein ngai u.
15 Hi mi hna hi nan ruah bantuk in zu an ritmi a si lo, atu cu zinglei suimilam 9* lawng pei a si rih ko cu.
16 A tak ti ahcun mah hi profet Joel nih a rak chimmi kha a si:
17 ‘Pathian nih “Ni hmanung bik caan ah mi vialte kha ka thlarau ka toih hna lai. Nan fapa hna le nan fanu hna nih profet bia an chim lai, nan tlangval hna nih langhnak an hmuh lai i nan tar hna nih mang an manh lai.
18 Cu caan a phanh tikah ka salpa le ka salnu hna cung hmanh ah ka thlarau ka toih lai i annih nih profet bia an chim lai.
19 Cunglei van ah khuaruahhar thil ka langhter lai. Tanglei vawlei ah thi, mei le meikhu chahchah in hmelchunhnak ka langhter lai.
20 A lianngan i a sunglawimi Jehovah* ni a phanh hlanah nika cu a mui lai i thlapa cu thisen bantuk in a sen lai.
21 Jehovah* min auh in thla a cammi paoh cu khamh an si lai” tiah a ti.’
22 “Israel mi hna, ngai hmanh u: Nazareth khuami Jesuh cu amah thlahmi a si kha Pathian nih a langhter cang. Jesuh hmang in thil lianngan le khuaruahhar thil le hmelchunhnak hna a langhter ti kha nanmah hrimhrim nih nan hngalh.
23 Pathian nih aa tinhmi le a rak hngalh chungmi ning in nan tlaihmi Jesuh cu misual mi hna kut in tung cung ah nan thlai i nan thah.
24 Asinain Pathian nih thihnak ṭemṭawnnak in a luatter i a thawhter ṭhan, zeicahtiah thihnak nih a tlai peng kho lo.
25 Amah kong he aa tlaiin David nih a chimmi cu ‘Jehovah* cu ka hmaiah a um zungzal; ka orhlei kam ah a um caah zeitik hmanh ah ka awlok a chong lai lo.
26 Cu ruang ah cun ka lungthin cu aa nuam i ka bia cu lawmhnak in a khat. Ruahchannak in ka nung lai;
27 zeicahtiah Thlan* ah na ka kaltak lai lo, zumhawktlak in a ummi cu thutnak na hmuhter lai lo.
28 Nangmah thawng in nunnak lam kha ka hun hngalh; na hmaiah na ka umter i lunglawmhnak in ka khat.’
29 “Unau hna, kan pupa David kong kha hlangfang tein kaan chimh hna lai, anih cu a thi i vui a rak si. A thlan cu atu tiang hika khua ah a um ko.
30 Anih cu profet a si caah na tefa pakhat kha na bawiṭhutdan ah ka ṭhutter lai tiin Pathian nih chiatserh in bia aa kammi kha a hngalh.
31 Khrih a thawh ṭhan lainak kong kha a hngalh chung caah Khrih cu Thlan* ah kaltak a si lai lo i a taksa cu thutnak a hmu lai lo tiah a rak chim.
32 Cu Jesuh cu Pathian nih a thawhter cang i kan dihlak in a hmutu tehte kan si.
33 Anih cu Pathian orhlei kam ah hlorh a si i a Pa nih bia a kamhmi thiang thlarau kha a hmuh. Cucaah atu i nan hmuhmi le nan theihmi ning in mah thiang thlarau kha a kan toih.
34 A tak ti ahcun David cu van ah a kai lo. Amah hrimhrim nih hitin a rak chim: ‘Jehovah* nih,
35 “Na ral pawl kha na ke tang ah ka chiah dih hna hlan tiang ka orhlei kam ah hin ṭhu” tiah ka Bawipa kha a ti.’
36 Cucaah tung cung i nan thlaimi Jesuh cu Pathian nih Bawipa ah le Khrih ah a ser cang ti kha Israel mi vialte nih hngal hna seh.”
37 Cu bia an theih tikah an lungre a thei i Peter le a dang lamkaltu pawl kha “Unau hna, zeidah kan tuah kun lai?” tiah an hal hna.
38 Mah tikah Peter nih “I ngaichih u law Jesuh Khrih min in tipil ing u, cutin nan tuah ahcun sual ngaihthiam nan si lai i thiang thlarau laksawng kha nan hmuh lai.
39 Mah biakam cu nanmah le nan tefa hna he aa pehtlai, Jehovah* Pathian nih a thim dingmi lam hlatpi i a ummi dihlak he zong aa pehtlai” tiah a ti hna.
40 Cun bia dang tampi zong a chimh hna i “Hrawh nan si nakhnga lo hi chan ṭhalo mi hna sinin chuak tuah u” tiah a forh hna.
41 Peter bia lunglawm tein a cohlangmi hna cu tipil an ing i cu ni ah cun mi 3,000 hrawng an i chap.
42 Lamkaltu hna cawnpiaknak kha an ngai, an ngeihmi vialte an i hrawm, an eiṭi i thla an cam zungzal.
43 Lamkaltu hna tuahmi khuaruahhar thil le hmelchunhnak hna kha an hmuh caah mi cu ṭihnak an hun ngei.
44 Zumtu a hung simi vialte cu hmunkhat ah khua an sa hna i an ngeihmi thil vialte kha an i hrawm hna.
45 An thilri le an ngeihmi kha an zuar hna i pakhat cio nih an herhmi ning in an i phaw hna.
46 Nifatin biakinn ah lungrual tein an i pumṭi i an inn cio ah lungthiang te le lunglawm tein rawl an i hrawng hna.
47 Pathian kha an thangṭhat i mi vialte sinin mithmai ṭha an hmu. Khamh a si hnga dingmi hna kha Jehovah* nih nifatin a karhter hna.
Footnotes
^ Biafang Fianternak ah zoh.
^ A hrampi, “nichuah hnu suimilam 3.”
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
