Lamkaltu 21:1-40
21 Anmah he i sian lo tuk buin kan i ṭhen hnuah tilawng in kan lan thluahmah i Kos khua kan phan, a thaizing ah Rhodes tikulh kan phan i cuka in Patara khualei ah kan lan.
2 Foinisia ram ah a kal dingmi tilawng kha kan hmuh tikah kan i cit i kan kal.
3 Kehlei zoh tikah Saipras tikulh a langhnak zawn kan phan, mah tikulh kam cun kan lan i Siria ram ah kan kal. Tair khua ah kan ṭum i cuka ah lawng nih a phorhmi thil kha an ṭhumh.
4 Mah khua ah zultu pawl kha kan kawl hna i kan hmuh hna tikah an sinah nisarih kan caam. Zultu hna nih thiang thlarau lamhruainak in Paul kha Jerusalem khua ah kal lo ding in atu le atu an thlauh.
5 Nisarih kan caam hnuah kan i thawh ṭhan. An dihlak in an nupile le an fale he khua leng tiang an kan thlah. Cun rilikam ah khukbil in thla kan cam.
6 Mah hnuah an kut kan tlaih hna i lawng cung ah kan kai, annih zong innlei ah an ṭin ve.
7 Tair khua in tilawng in kan kal lengmang i Ptolemai khua kan phan, cuka ah unau pawl kha kan chawnhbiak hna i an sinah nikhat kan caam.
8 A thaizing ah kan i thawh i Sisaria khua kan phanh tikah thawngṭha chimtu Filip inn ah kan i ṭhum. Anih cu Jerusalem khua ah lamkaltu hna nih an rak thimmi pa pasarih lak i pakhat a si.
9 Amah nih cun va a ngei lomi fanu pali a ngeih hna i annih nih profet bia kha an chim.
10 Cuka ah ni tlawmpal kan caam hnuah Agabas tiah auhmi profet pakhat cu Judea ram in a rak phan.
11 Kan sinah a ra i Paul taisawm kha a lak, cun a kut le a ke ah aa ṭem i, “‘Hi taisawm ngeitu hi Jerusalem khua ah Judah mi nih hitin an ṭem lai i miphun dang hna kut ah an chanh lai’ tiah thiang thlarau nih a chim” tiah a ti.
12 Mah bia kha kan theih tikah kanmah he, cuka i a ummi hna he Paul kha Jerusalem ah kal lo ding in kan nawl.
13 Paul nih “Zeicah nan ṭah i ka lung nan ka kuaiter? Bawipa Jesuh min caah cun Jerusalem khua ah tlaihkhihnak lawng si loin thihnak tiang hmanh in awkah timhcia ka si” tiah a ti.
14 Kan thlauh khawh ti lo caah zeihmanh chim ti loin “Jehovah* duhnak ning tu in si ko seh” tiah kan ti.
15 Mah hnuah kan i tim i Jerusalem khualei ah kan i thawh.
16 Sisaria khua i zultu cheukhat zong kan sinah an kal ve i kan tlunnak ding Saipras mi Mnason inn ah an kan kalpi. Anih cu hlanlio tein zultu a rak si cangmi a si.
17 Jerusalem khua kan phanh tikah unau pawl nih lunglawm tein an kan don.
18 A thaizing ah Paul cu Jeim va ton awkah kanmah he a kal ve i Khrihfa upa vialte zong an rak um.
19 Paul nih a chawnhbiak hna hnuah a phungchim rianṭuannak in miphun dang hna sinah Pathian nih a tuahmi kong kha a dikthliar in a chimh hna.
20 Mah kha an theih tikah Pathian kha an thangṭhat, cun Paul kha “Unaupa, Judah mi hna lakah zumtu thong tampi an um cang ti cu na hngalh ko, annih cu an dihlak in Nawlbia a ṭanh ngaingaimi an si.
21 Asinain nangmah kong he aa tlaiin biachawkvai an theihmi a um, ‘Paul nih miphun dang hna lakah a ummi Judah mi vialte kha Moses Nawlbia hlawt awkah a cawnpiak hna. Cun an fale zong cuarpar tan a hau lo i phungphai zong zulh a hau lo a ti’ tiah an in ti.
22 Cucaah zeitin tuah ah dah a ṭhat lai? Hika ah na phan ti cu an theih te ko lai.
23 Cucaah kan chimmi ning hin tuah ko: Biakamnak tang ah a um rihmi pa pali kan ngei hna.
24 Anmah he cun va kal law Moses Nawlbia ning in thianhnak phungphai kha va tuah u. An sam an i meh khawh nakhnga a man kha va liampiak hna. Cutin na tuah ahcun nangmah kong he aa tlaiin an theihmi cu biachawkvai a si ti le nang cu ding tein khua a sa i Nawlbia a zulmi na si ti kha mikip nih an hngalh lai.
25 Zumtu miphun dang hna tu cu siasal pekchanhmi rawl, thi, hngawng dih sa* le nupa sualnak* kha nan hrial awk a si timi kan biakhiahnak kha ca in kan kuat cang hna” tiah an ti.
26 A thaizing ah Paul nih mah pa hna kha aa kalpi hna i Moses Nawlbia ning in thianhnak a tuahpi hna. Mah hnuah an i thianhnak caan cu zeitik ah dah a dih lai ti le pakhat cio caah zeitik ah dah raithawinak pek ding a si lai ti kha biakinn ah a lut i a va chimh hna.
27 Nisarih a tlin lai ah Asia peng in a rami Judah mi hna nih Paul kha biakinn chung ah an hmuh caah mibu kha an thin a hun nakhnga an forh hna i Paul kha an tlaih.
28 Cun “Israel mi hna, kan bawm tuah u! Hi pa nih hmunkip ah a ummi vialte kha kan miphun, kan Nawlbia le kan hmunthiang ralchanh in a cawnpiak hna. Mah leng ah Greek mi hmanh kha biakinn ah a ratpi hna i hi hmunthiang hi a thurter” tiah an au.
29 Zeicahtiah Efesa khuami Trofimas kha khua chung ah Paul he an hmuh bal caah a si. Amah kha Paul nih biakinn chung ah a luhpi rua tiah an ruah.
30 Cuticun an khuapi ning in an i tuai-ur dih i mi pawl cu biakinn ah an va tli. Paul kha an tlaih i a leng ah an hnuh, cun innka kha an khar colh.
31 Thah an timh lioah ralkapbu haotu nih Jerusalem khua cu a ningpi in aa tuai-ur dih cang ti thawng kha a theih.
32 Cucaah ralkap pawl le ralbawi pawl kha a auh colh hna i an sinah cun an va tli. Ralkapbu haotu le ralkap pawl kha an hmuh hna tikah Paul an tukmi kha an ngol.
33 Mah tikah ralkapbu haotu cu an pawng ah a ra, Paul kha a tlaih i thir cikcin pahnih in khih awkah nawl a pek hna. Mah hnuah Paul cu ahodah a si, a tuahmi cu zeidah a si ti kha a hal hna.
34 Asinain mibu lak i cheukhat nih bia pakhat kha an aupi, a cheu nih bia dang kha an aupi. Cutin an i tuai tuk caah ralkapbu haotu nih zei a cang ti awk a hngal lo. Cucaah Paul kha ralkap pawl umnak hmun ah kalpi ding in nawl a pek hna.
35 Hleika pawng an phanh tikah ralkap pawl nih Paul kha a cawi in an cawi. Zeicahtiah mibu nih Paul kha fahnak pek an duh i,
36 “Mah pa kha that u!” tiah an au caah a si.
37 Ralkap pawl umnak hmun i luhpi an timh lioah Paul nih ralkapbu haotu kha “Na sinah bia tlawmpal ka chim kho lai maw?” tiah a hal. Anih nih “Greek holh ma na thiam?
38 Cu a si ah nang cu kan hnulei deuh ah ral a thawhter i hriamtlaimi 4,000 he ramlak ah a kalmi Izipt mipa kha na si lo tih?” tiah a hal.
39 Paul nih “Kei cu Judah mi ka si, Silisia ram i khuapi minthang a simi Tarsas khuami ka si. Zaangfahnak in hi mi hna sinah biachimnak nawl rak ka pe” tiah a ti.
40 Ralkapbu haotu nih nawl a awnh tikah Paul cu hleika cung ah a dir i mibu kha a kut a zaoh hna. Mibu cu an daih dih tikah Paul nih Hebru holh in hitin bia a chim:
Footnotes
^ Biafang Fianternak ah zoh.
^ Asiloah “a thi chuahter loin thahmi.”
^ Greek, por·nei′a. Biafang Fianternak ah zoh.
