Lamkaltu 22:1-30
22 “U le nau le pale hna, atu runvennak bia ka chimmi hi ngai hmanh u.”
2 Hebru holh in a chimmi kha an theih tikah an dai chinchin. Cun Paul nih hitin a ti:
3 “Kei cu Silisia ram, Tarsas khua ah a chuakmi Judah mi ka si. Hika khua i Gamaliel sinah ca ka cawng i kan pupa hna nih an rak zulhmi Nawlbia kha felfai tein zulh awkah cawnpiakmi ka si. Nanmah bantuk tein Pathian caah a lung a tho tukmi ka si.
4 Bawipa Lam a zulmi nu he, pa he ka tlaih hna i thong ah ka thlak hna, thi lakin ka rak hrem hna.
5 Mah kha tlangbawi ngan le khawngsil upa dihlak nih tehte an khaan khawh ko. Damaskas khua i Judah mi hruaitu hna sin pek awk ca kha an sinin ka lak, cun Bawipa Lam a zulmi hna kha tlaih awk le Jerusalem ah ratpi in dantat awkah Damaskas khua ah kaa thawh.
6 “Damaskas khualei ka kal i ka phak deng ah khin, chun laicer hrawng ah ruahlopi in van in a ceu ngaimi ceunak nih ka velchum cu a run ceuh.
7 Vawlei ah ka tlu i, ‘Saul, Saul, zeicah na ka hrem?’ timi aw kha ka theih.
8 ‘Bawipa, ahodah na si?’ tiah ka hal tikah ‘Keimah cu na hremmi, Nazareth khuami Jesuh ka si’ tiah a ka leh.
9 Ka pawng i a ummi hna nih ceunak cu an hmuh nain ka sinah chimmi bia kha cu an theithiam lo.
10 ‘Bawipa, zeidah ka tuah lai?’ tiah ka hal tikah Bawipa nih ‘Tho law Damaskas khua chung ah va lut, cuka ah na tuah awk a simi vialte kha an in chimh lai’ tiah a ka leh.
11 Mah ceunak cu a ceu tuk caah ka mit a caw. Ka pawng i a ummi hna nih ka kut in an ka hruai i Damaskas khua cu ka phan.
12 “Cuka khua ah Pathian a ṭihzah i Nawlbia a zulmi, Judah mi vialte nih an chimthiam ngaimi Ananias timi pa pakhat a um.
13 Amah cu ka sinah a ra, ka pawng ah a dir i ‘Unau Saul, na mit khua hmu ṭhan cang!’ tiah a ka ti. Cu cangka cun ka mit cu khua a hmu ṭhan i amah kha ka hmuh.
14 Cun hitin a ka ti: ‘Kan pupa hna Pathian nih a duhnak hngalh awk, a dingmi Jesuh hmuh awk le a aw theih awkah nangmah kha aan thim cang.
15 Zeicahtiah na hmuhmi le na theihmi kha mi vialte sin i a chimtu ding amah tehte cu na si lai.
16 Cucaah zeidah na hngah? Tho law tipil ing, Jesuh min na auhnak thawng in Pathian nih na sualnak kha aan ngaihthiam lai.’
17 “Asinain Jerusalem ah ka kir ṭhan i biakinn i thla ka cam lioah langhnak pakhat ka hmuh.
18 Langhnak ah cun Bawipa nih ‘Jerusalem khua hin khulrang in chuak tuah, zeicahtiah ka kong tehte na khaanmi hi an cohlang lai lo’ tiah a ka ti.
19 Mah tikah ‘Bawipa, pumhnak inn pakhat hnu pakhat ah ka kal i nangmah aan zummi kha thong ka thlak tawn hna, ka tuk tawn hna ti kha annih nih ṭha tein an hngalh ko.
20 Na tehte a simi Steven thah a si lioah an pawng ah ka dir i ka hna a tla ve, a thattu hna an angki leng kha ka rak hngahpiak hna’ tiah ka ti.
21 Asinain Bawipa nih ‘Va kal ko, lam hlatpi i a ummi miphun dang hna sinah kaan thlah lai’ tiah a ka ti.”
22 Mi nih mah bia a chim tiang kha cu an ngaih. Cun “Hi bantuk mi hi that ko u, nun awkah aa tlak lo!” tiah fakpi in an au.
23 Mi cu an au i an angki leng kha an hlonh, leidip kha van ah an vorh.
24 Mi nih zeicah cutin an au hnawh ti kha ralkapbu haotu nih fiang tein hngalh a duh. Cucaah Paul kha ralkap pawl umnak hmun ah kalpi awk le tuk in kherhhlai awkah nawl a pek hna.
25 Tuk ding in an ṭem lioah Paul nih a pawng ah a dirmi ralbawi pa kha “Rom rammi pakhat kha biaceih hmasa loin tuk cu a phung a si maw?” tiah a hal.
26 Mah bia a theih tikah ralbawi pa cu ralkapbu haotu sinah a va kal i “Zeitindah na tuah lai? Hi pa hi Rom rammi dakaw a si” tiah thawng a va thanh.
27 Mah tikah ralkapbu haotu cu Paul sinah a va kal i “Ka chim tuah, Rom rammi maw na si?” tiah a hal. Paul nih cun “Ka si ko” tiah a leh.
28 Ralkapbu haotu nih “Rom rammi sinak kha tangka tampi in ka cawk” tiah a ti tikah Paul nih “Kei cu Rom rammi in hrin ka si” tiah a ti.
29 Mah tikah Paul kha hrem in kherhhlai aa timmi ralkap hna cu an i let ṭhan colh. Ralkapbu haotu zong nih Paul cu Rom rammi a si kha a hngalh tikah thir cikcin in a rak khih caah a thin a phang.
30 Judah mi nih Paul kha zei ruang set ah dah sual an puh ti kha ralkapbu haotu nih hngalh a duh. Cucaah a thaizing ah Paul kha a thir cikcin a phoih i tlangbawi upa hna le Judah Biaceihnak Zungpi chungtel vialte kha i pumh awkah nawl a pek hna. Cun Paul kha a chuahpi i an hmaiah a dirter.
