Lamkaltu 23:1-35
23 Paul nih Judah Biaceihnak Zungpi chungtel hna kha ṭha tein a zoh hna i “Unau hna, nihin tiang palhnak zeihmanh ka tuah lo ti kha Pathian hmaiah lungthiang tein ka chim khawh” tiah a ti.
2 Mah tikah tlangbawi ngan Ananias nih a kaa ah vun beng u tiah a pawng i a dirmi kha a ti hna.
3 Paul nih “Siiraang thuhmi vanpang, nangmah tu Pathian nih aan bengh lai. Nawlbia ning in biaceih awkah na ṭhu ko nain maw Nawlbia buar in keimah bengh awkah nawl na pek hna?” tiah a ti.
4 Mah tikah a pawng ah a dirmi hna nih “Pathian tlangbawi ngan maw na serhsat?” tiah an ti.
5 Paul nih “Unau hna, amah cu tlangbawi ngan a si kha ka hngalh lo caah a si. Cathiang ah ‘Na miphun uktu cung ah serhsatnak bia na chim lai lo’ tiah aa ṭial” tiin a ti.
6 Judah Biaceihnak Zungpi chungtel hna lakah a cheu cu Sadusi mi an si i a cheu cu Farasi mi an si ti kha Paul nih a hngalh tikah “Unau hna, kei cu Farasi mi pakhat ka si, Farasi mi hna tefa zong ka si. Mithi an tho ṭhan lai timi ruahchannak ka ngeih caah atu bantuk in biaceih ka simi hi a si” tiah aw thangpi in a chim.
7 Cutin a chim caah Farasi mi le Sadusi mi lakah lung i khah lonak a chuak i an i ṭhen.
8 Sadusi mi nih thawhṭhannak siseh, vancungmi siseh, thlarau siseh a um lo tiah an ti. Farasi mi nih cun mah vialte kha a um tiah an cohlan.
9 Cuticun an hun i tuai-ur i Farasi mi chung in phungbia cawnpiaktu cheukhat cu an dir. Cun “Hi pa sinah zei palhnak hmanh kan hmu lo. Thlarau asiloah vancungmi nih a chawnhmi a si ah tah zeitin?” tiah fakpi in an al hna.
10 An lung an i khah lonak cu a zual chin caah ralkapbu haotu nih Paul kha an thleh, an baoh dih sual lai ti a phang. Cucaah ralkap a thlah hna i Paul kha an lakin chuahpi zok awk le ralkap pawl umnak hmun ah kalpi awkah nawl a pek hna.
11 A thaizing zan ah Bawipa cu Paul pawng ah a hung dir i “Ralṭha tein um ko! Jerusalem khua ah ka kong felfai tein tehte na khaan bantuk in Rom khua zong ah tehte na khaan lai” tiah a ti.
12 Khua a dei tikah Judah mi cu Paul thah awkah a thli tein khua an khang. Paul kan thah hlan paoh cu kan ei, kan ding lai lo tiah chiatserh in bia an i kam.
13 Cutin chiatserh in a thli tein khua a khangmi cu 40 leng an si.
14 Annih cu tlangbawi upa hna le Judah mi hruaitu hna sinah an kal i, “Paul kan thah hlan paoh cu zeihmanh kan ei lai lo tiah chiatserh in bia kan i kam.
15 Cucaah nanmah le Judah Biaceihnak Zungpi chungtel hna nih Paul kha ratpi ding in ralkapbu haotu sinah thawng thanh u. Paul kong ah bia fiang deuh in hngalh a duhmi bantuk in i umter u. Kannih nih a phanh hlanah thah ding in timhcia tein kan rak hngah lai” tiah an ti.
16 Paul a far fapa nih lam in rak bawh in thah an timhnak kong kha a theih tikah ralkap pawl umnak hmun ah a lut i Paul kha a va chimh.
17 Mah tikah Paul nih ralbawi pakhat kha a auh i “Hi tlangval pa hi ralkapbu haotu sinah va kalpi, thawngpang chimh awk a ngei” tiah a ti.
18 Ralbawi pa nih mah tlangval pa cu ralkapbu haotu sinah a kalpi i “Thongtla Paul nih a ka auh i hi tlangval pa nih chimh ding aan ngeih caah na sinah va kalpi a ka ti” tiah a ti.
19 Ralkapbu haotu nih tlangval pa kha a kut in a hruai i amah lawng in a kalpi. Cun “Zeidah chimh awk na ka ngeih?” tiah a hal.
20 Anih nih “Thaizing ah Judah mi cu Paul kong ah bia fiang deuh hngalh a duhmi phun in Judah Biaceihnak Zungpi i Paul chuahpi awkah nangmah nawl ding in khua an khang.
21 Asinain an in halmi kha tuahpiak hna hlah, zeicahtiah mi 40 leng nih Paul kha thah awkah an bawh ko. Paul kan thah hlan paoh cu kan ei, kan ding lai lo tiah chiatserh in bia an i kam. Atu timhcia an si cang. Nangmah bia kha an hngak ko” tiah a ti.
22 Ralkapbu haotu nih “Na ka chimhmi kong hi ahohmanh chim hna hlah” tiah nawl a pek i tlangval pa kha a ṭinter ṭhan.
23 Mah hnuah ralbawi pahnih kha a auh hna i “Tuzan suimilam 9* ah Sisaria khua kal ding in ralkap 200, rang cung ralkap 70 le feipu ralkap 200 kha va tim hna u.
24 Paul caah rang hna zong va tim u. Cun uktu bawi Felix sinah him tein va kalpi u” tiah nawl a pek hna.
25 Cun hitin ca a ṭial:
26 “Keimah Klaudias Lisias nih a Liannganmi Uktu Bawi Felix, na sinah chawnhbiaknak ca ka rak ṭial.
27 Judah mi nih hi pa hi an tlaih i thah an timh. Asinain anih cu Rom rammi a si ti kha ka hngalh caah ka ralkap hna he khulrang in kan va kal i kan va khamh.
28 Sual an puhnak a ruang kha hngalh ka duh caah Judah Biaceihnak Zungpi ah ka kalpi.
29 Thih awk tlak asiloah thongthlak awk tlak sualnak ruang ah si loin anmah phung he aa tlaimi kong ah sual an puhmi a si ti kha ka hun hngalh.
30 Amah thah awkah a thli tein khua an khanmi kha ka hngalh caah na sinah ka rak kuat colh i sual a puhtu hna kha mah kong hi nangmah sinah chuahpi ding in ka fial hna.”
31 Ralkap pawl zong nih nawl pek an si ning in Paul kha zan ah Antipatris khua ah an kalpi.
32 A thaizing ah rang cung ralkap hna cu Paul he an lan i a dang ralkap tu cu ralkap pawl umnak hmun ah an rak kir ṭhan.
33 Rang cung ralkap hna cu Sisaria khua an phanh tikah ralkapbu haotu ca kha uktu bawi cu an pek i Paul kha a sinah an chanh.
34 Uktu bawi nih ca kha a rel dih hnuah Paul kha khua zei pengmi dah na si tiah a hal. Silisia in a si kha a hngalh tikah,
35 “Sual aan puhtu hna an phanh tikah na kong kha ṭha tein kaan ngaihpiak te lai” tiah a ti. Paul kha Herod siangpahrang inn ah chiah in cawngh awkah nawl a pek hna.
Footnotes
^ A hrampi, “nitlak hnu suimilam 3.”
