Lamkaltu 26:1-32
26 Agrippa nih “Runvennak bia na chim khawh cang” tiah a ti tikah Paul nih a kut a samh i hitin a ti:
2 “Siangpahrang Agrippa, Judah mi nih sual an ka puhnak kong he aa tlaiin atu bantuk in na hmaiah runvennak bia chimnak nawl ka hmuh caah kaa lawm tuk.
3 Nang cu Judah mi hna phungphai le an i al tawnmi kong hna ṭha tein a hngalmi na si caah kaa lawm khun. Cucaah ka bia kha lungsau tein ngaihpiak awkah kaan nawl.
4 “Ka no lio tein ka miphun lakah siseh, Jerusalem khua ah siseh zeitindah ka nuncan a si ti kha Judah mi vialte nih an hngalh ko.
5 An ka hngalhnak cu a saupi cang. Kei cu Farasi bu chungtel ka rak si kha an duh ahcun tehte an khaan khawh ko. Mah bu cu a dang Judah mi hna nakin kan biaknak phungphai a hleihluat in aa tlaihmi an si ti kha na hngalh ko.
6 Asinain Pathian nih kan pupa hna sinah a rak pekmi biakam kha kaa ruahchan caah atu bantuk in biaceih ka simi hi a si.
7 Mah biakam cu kan miphun phun 12 nih chun he, zan he Pathian biak awkah an i zuamnak thawng in an rak i ruahchanmi kha a si. Maw Siangpahrang, mah ruahchannak ruang ah Judah mi nih taza an ka cuaimi hi a si.
8 “Pathian nih mithi a thawhter ti cu zumh khawh a si lo tiah zeicah nan ruah?
9 A tak ti ahcun Nazareth khuami Jesuh min ralchanh awkah zei paoh ka tuah awk a si tiah keimah hrimhrim nih ka rak ruah bal.
10 Cutin Jerusalem khua ah ka rak tuah. Tlangbawi upa hna pekmi nawlngeihnak in mithiang mi kha thong ah ka rak thlak hna. Thah an si tik zong ah ka hna a rak tla ve.
11 Pumhnak inn kip ah atu le atu ka rak hrem hna, an zumhnak kha hlawt awkah ka rak hnek hna. An cung ah ka thin a hun tuk caah khua dang tiang hmanh ka va kal i ka hrem hna.
12 “Tlangbawi upa hna pekmi nawlngeihnak le rian peknak in cutin tuah awkah Damaskas khua ah ka kal.
13 Maw Siangpahrang, lam cung kan um lio, chun laicer ah ni nakin a ceu deuhmi ceunak nih keimah le ka sin i a kalmi hna kan velchum kha van in a run ceuh.
14 Kan dihlak in vawlei ah kan tlu i Hebru holh in aw pakhat nih ‘Saul, Saul, zeicah na ka hrem? Fung zum chuih cu nangmah caah dakaw a fah’ tiah a ka timi kha ka theih.
15 Cun kei nih ‘Bawipa, ahodah na si?’ tiah ka hal tikah Bawipa nih ‘Keimah cu na hremmi Jesuh ka si.
16 Atu tho law dir tuah. Na sin i ka langhnak a ruang cu keimah he aa tlaiin na hmuhmi thil le kaan hmuhsak laimi thil kong tehte a khangtu ding ka sal in thim awkah a si.
17 Kaan thlah lainak Judah miphun le miphun dang hna sinin kaan khamh lai.
18 Muihnak in ceunak ah le Satan nawlngeihnak in Pathian nawlngeihnak tang ah an i mer khawh nakhnga an mit na auter hna lai. An ka zumhnak thawng in sual ngaihthiam an si lai i thianter a simi hna he ro an coṭi lai’ tiah a ti.
19 “Cucaah Siangpahrang Agrippa, vancung in ka hmuhmi langhnak kha zul loin ka um lo.
20 I ngaichih u law Pathian sinah i mer u, nan i ngaihchihnak kha tuahsernak in langhter u timi bia kha Damaskas khua ah a hmasa bik ka chim. Mah hnuah Jerusalem khua le Judea ram pumpi ah ka chim i miphun dang hna sin zong ah ka chim.
21 Cucaah Judah mi nih biakinn ah an ka tlaih i thah an ka timh.
22 Asinain Pathian sinin bawmhnak ka hmuh caah mi lianngan sinah siseh, mi sawhsawh sinah siseh nihin ni tiang tehte ka khaan. Profet hna le Moses nih an rak ṭialmi, a cang dingmi kong lawng kha ka chim.
23 Mah ah Khrih nih fahnak a in lainak kong, thihnak in a tho ṭhanmi lakah hmasa bik a si lainak kong, Judah mi le miphun dang sinah phung a chim lai i ceunak a pek hna lainak kong aa tel.”
24 Cutin runvennak bia a chim tikah Festas nih “Paul, na hrut cang! Na thiamsannak nih aan hruhter cang!” tiah aw thangpi in a ti.
25 Mah tikah Paul nih “A Liannganmi Festas, ka hrut lo. A hmaanmi bia le zumhtlakmi bia lawng ka chim.
26 Mah kong hna cu siangpahrang nih ṭha tein a hngalh ko. Cucaah atu bantuk in zalong tein ka chim ngammi a si. Mah thil hna cu a thlithup in tuahmi an si lo caah a hngalh dih lai tiah ka zumh hrimhrim ko.
27 Siangpahrang Agrippa, Profet kha na zum hna maw? Na zumh hna ti kha ka hngalh” tiah a ti.
28 Agrippa nih Paul kha “Caan tawite chung ah pei Khrihfa si ding in na ka lem khawh cang lai hi” tiah a ti.
29 Mah tikah Paul nih “Nangmah lawng si loin atu ka bia a ngaimi vialte zong caan tawite chung ah siseh, caan saupi hnuah siseh keimah bantuk nan si nakhnga Pathian sinah thla ka cam. Tlaihkhihnak bel cu tonter kaan duh hna lo” tiah a ti.
30 Mah hnuah siangpahrang cu a tho i peng uktu Festas, Bernis le an sin i a ṭhumi hna zong an tho ve.
31 An chuah pah in “Hi pa nih thih awk tlak asiloah thongthlak awk tlak zei sualnak hmanh a tuah lo” tiah pakhat le pakhat an i ti.
32 Agrippa nih Festas kha “Sizar* sinah a zu rak khang hlah seh law hi pa hi thlah khawh a si ko hnga” tiah a ti.
Footnotes
^ Asiloah “Rom Siangpahrang.”
