Lamkaltu 27:1-44
27 Italy lei ah tilawng in kal ding in bia an kan khiahpiak caah Paul le a dang thongtla hna kha Augustus ralkapbu haotu,* ralbawi Julias kut ah an ap hna.
2 Asia peng rilikam tilawng dinhnak hmun hna pal pah aa timmi Adramittium khua tilawng kha kan i cit i kan kal. Masidonia peng, Thesalonika khuami Aristarkas zong kan sinah a kal ve.
3 A thaizing ah Sidon khua kan phan. Julias cu Paul cung ah a ṭha ngaingai i a hawile sinah kalnak nawl a awnh. Cucaah a hawile nih an bawmh khawh.
4 Cuka cun tilawng in kan i thawh ṭhan tikah kanmahlei hoih in thli a hran caah Saipras tikulh i thli daihnak lei phen in kan kal.
5 Silisia ram le Pamfilia ram hrawn in rili kha kan tan i Lisia peng, Mira khua kan phan.
6 Cuka ah ralbawi pa nih Italy ram ah a kal dingmi, Alekzandria khua in a rami tilawng kha a hmuh i a kan citter.
7 Ni tam nawn duhsah tein kan kal hnuah har lengmang in Naidas khua kha kan phan. Thli cu kanmahlei hoih in a hran caah hmaiah kan kal kho ti lo. Cucaah Krit tikulh i thli daihnak lei, Salmon vawlei fonghlei kam in kan lan.
8 Rilikam in har lengmang in kan kal hnuah Lasia khua pawng i Lawng Dinhnak Hmun Ṭha timi kan phan.
9 Ni tampi a rau cang i Remnak Ni, rawl ulh caan hmanh a luan cang caah ti lam in khual tlawn cu ṭih a hung nung. Cucaah Paul nih,
10 “Ka hawile hna, kan kal lengmang ko ahcun harnak kan tong kho. Lawng he, thil phorhmi he kan sungh leng ah kan nunnak hmanh kan sung kho ti kha ka hngalh” tiah ruahnak a cheuh hna.
11 Asinain ralbawi pa nih Paul bia kha ngaih loin tilawng mawngtu le lawng ngeitu bia kha a ngaih.
12 Cuka lawng dinhnak cu khuasik hman awkah a ṭhat lo caah Finiks lawng dinhnak tiang lan u sih law cuka ah khuasik kan hmang kho hnga maw tiah a tam deuh nih ruahnak an chuahpi. Finiks cu Krit tikulh ah a ummi lawng dinhnak pakhat a si i nichuah chaklei le nichuah thlanglei in luh khawh a si.
13 Thlanglei in thlizil a hun hran siahmah tikah kan i tinh ning in kan kal kho cang lai tiah an ruah i thir cangai kha cunglei ah an hnuh. Cun Krit tikulh i titlang kam tein an kal thluahmah.
14 Asinain a rauhhlan ah nichuah chaklei thli* cu fakpi in a hung hrang.
15 Lawng cu a den ciammam i thli kha kan pah khawh ti lo caah zeihmanh kan tuah ti lo. Thlitu nih cun a kenkip ah a kan vawr len ko.
16 Thli i phenh awkah Kawda timi tikulh hmete lei ah zokzok in kan kal. Lawng hnulei ah a ummi vokkuanglawng kha har lengmang in kan ven.
17 Cun lawng cung ah an hun khin i lawng cu a velchum in hri in fek tein an ṭem. Syrtis thetse tlang ah aa su sual lai ti an phan caah puanzar kha an ṭhumh. Cucaah lawng cu thlitu nih a choih lengmang ko.
18 Thli le tilet nih fak tuk in a kan den caah a thaizing ah lawng a zaan deuh nakhnga lawng phorhmi thil pawl kha an hlonh.
19 A nithumnak ni ah lawng thilri hna kha an hlonh.
20 Ni tampi chung nika le arfi zong kan hmu kho lo i thlichia cu fakpi in a hran peng caah kan dihlak in nun lai hmanh kan i ruah ngam ti lo.
21 Rawl ei loin saupi an um hnuah Paul cu an hmaiah a dir i “Ka hawile hna, ruahnak kaan cheuhmi hna kha rak ngaih in Krit tikulh in rak chuak hlah u sih law atu bantuk in rawhralnak le sunghnak hi kan tong hnga lo.
22 Asinain nan lung dong hlah u tiah forh kaan duh hna. Pakhat hmanh nan thi lai lo, lawng bel hi a rawk lai.
23 Ka biakmi le a ka ngeitu Pathian vancungmi cu zahan ka sinah a lang i,
24 ‘Paul, ṭih hlah. Sizar* hmaiah na dir ko lai. Pathian nih nangmah le na khualtlawn hawi vialte kha aan khamh ko hna lai’ tiah a ka ti.
25 Cucaah ka hawile hna, nan lung dong hlah u. A ka chimh ning in a si hrimhrim lai ti kha Pathian cung ah zumhnak ka ngei.
26 Asinain lawng cu a rawk lai i tikulh pakhatkhat ah kan taap te ko lai” tiah a ti hna.
27 A zan 14nak, Adria Rili i thli nih a kan choih lengmang lio, zanṭim ah tilawng mawngtu hna nih tikam pakhatkhat ah kan naih rua tiah an ruah.
28 Ti kha an tah tikah pe 120 hrawng a thuk. Tlawmpal kan kal hnuah an tah ṭhan i pe 90 a si.
29 Lung kan i su sual lai ti an phan caah lawng hnulei in thir cangai pali kha an thlak i khuadei lai lawng kan hngak ko.
30 Lawng mawngtu hna cu zaam an i timh caah lawng hmailei in thir cangai a thla lai bantuk in vokkuanglawng kha rili ah an ṭhumh.
31 Mah tikah Paul nih ralbawi pa le ralkap hna kha “Mah lawng mawngtu hna hi tilawng cung ah an um peng lo ahcun nan luat kho lai lo” tiah a ti hna.
32 Cucaah ralkap pawl nih hri kha an chah i vokkuanglawng cu rili ah a tla.
33 Khua a dei lai ah Paul nih an dihlak in rawl ei a fial hna i “Awlokchong in nan hngahnak hi ni 14 a si cang, hi chung vialte zeihmanh nan ei lo.
34 Cucaah rawl ei ding in kaan nawl hna; nanmah ṭhatnak caah ka chimmi a si. Ahohmanh nan lu cung samfa fakhat hmanh a lolak lai lo” tiah a ti hna.
35 Mah bia a chim hnuah changreu kha aa lak i zapi hmaiah Pathian sinah lawmhnak bia a chim. Cun changreu kha a cheu i a ei.
36 Mah tikah midang zong an lung a hung ṭhawng i an ei cio.
37 Lawng cung ah a ummi cu kan dihlak ah mi* 276 kan si.
38 Khim tein an ei dih hnuah lawng a zaan deuh nakhnga changvut kha rili ah an hlonh.
39 Khua a hun dei tikah khoika ah dah kan phanh ti kha ṭha tein an hngal lo, asinain thetse a langmi ti fonghlei pakhat kha an hmuh caah a si khawh ahcun cuka ah lawng dinhter ding in bia an khiah.
40 Cucaah thir cangai hri kha an chah hna i rili chung ah an kaltak. Cun lawng zahnak fung ṭemmi hri hna kha an phoih, a hmailei puanzar kha thli hoihnak lei ah an zam i tikam lei ah an panh.
41 Ti puanhnak lei kan phanh tikah lawng cu thetse tlang ah aa suk caah a hmailei cu thetse lakah a taap i a cawl kho ti lo. Lawng a hnulei cu tilet nih a den i a kuai dih.
42 Mah tikah ralkap pawl nih thongtla pawl cu ti an i lio lai i an zam lai ti an phan caah thah dih ding in bia an khiah.
43 Asinain ralbawi pa nih Paul kha khamh a duh caah a thlauh hna. Tilio a thiammi paoh zuang u law tikam lei ah i lio hmasa u tiah nawl a pek hna.
44 A taangmi tu cu thingphel le lawng a kuaimi pelpawi kha i tlaih in kal ve awkah a fial hna. Cuticun kan dihlak in tikam ah him tein kan phan.
Footnotes
^ Ralkap 100 haotu.
^ Greek, “Eu·ro·aq′ui·lo.”
^ Asiloah “Rom Siangpahrang.”
^ Biafang Fianternak i “Nunnak” timi ah zoh.
