Lamkaltu 28:1-31
28 Tikam ah him tein kan phanh hnuah mah tikulh cu Malta tikulh a si kha kan hun hngalh.
2 Ramdang holh a hmangmi hna* cu kan cung ah an ṭha ngaingai. Ruah a sur i khua a sih caah meiphu an kan tihpiak i lunglawm tein an kan conglawmh.
3 Paul nih thinghreu kha a khawmh i mei ah a paih tikah a linh caah limcawm a hung chuak. Paul kha a kut ah a cuk i rul cu aa thlai ko.
4 Ramdang holh a hmangmi mah mi hna nih Paul kut ah siivai a ngeimi rul aa thlai komi kha an hmuh tikah “Hi pa hi lainawng a si hrimhrim ko. Rili in cun a luat ko nain Dinnak* nih nun awkah a awnh lo hi ta” tiah pakhat le pakhat an i ceih.
5 Asinain Paul nih rul cu mei chung ah tla lakin a thin i amah cu a zeihmanh a ti lo.
6 Paul cu a phing dih lai asiloah ruahlopi in a tlu lai i a thi lai tiah an ruah. Asinain saupi an ngan hnuah a zeihmanh a ti lomi kha an hmuh tikah an lung aa thleng i hi pa hi pathian a si tiah an ti.
7 Cuka pawng ah tikulh uktu bawi Publius ngeihmi lo pawl a um. Amah nih a kan conglawmh i nithum chung khual dawtnak he a kan zohkhenh.
8 Publius a pa cu raifanh le thisen chungtlik in a zaw i ihnak cung ah a ril ko. Paul cu a sinah a kal i thla a campiak. Cun a cung ah a kut a chuan i a damter.
9 Mah kha an theih tikah tikulh ah a ummi a dang mizaw vialte zong a sinah an ra i an dam dih.
10 Annih zong nih laksawng tampi an kan pek i kan i thawh ṭhan tikah kan herhmi vialte kha tilawng cung ah an kan chiahpiak.
11 Thla thum hnuah “Zeus Faphir” zuk a cuangmi tilawng in kan i thawh. Mah tilawng cu Alexandria khua in a rami a si i mah tikulh ah khuasik chung a caammi a si.
12 Sirakus khua ah tilawng aa din i cuka ah nithum kan caam.
13 Cuka in kan i thawh ṭhan i Rekium khua kan phan. A thaizing ah thlanglei in thli a hran caah a nihnihnak ni ah Puteoli khua kan phan.
14 Cuka khua ah unau pawl kha kan ton hna i nisarih chung caam ding in an kan nawl. An sin kan caam hnuah Rom lei ah kan i thawh ṭhan.
15 Rom khua i unau pawl nih kan thawng kha an theih tikah Appius Chawdawrnak hmun le Khualbuk Pathum tiang an rak kan don. Paul nih a hmuh hna tikah Pathian kha a lawmh i a thazaang a tlung.
16 A donghnak ah Rom khua kan phan. Paul cu a cawngtu ralkap pakhat he amah tein umnak nawl an awnh.
17 Nithum hnuah Paul nih Judah mi hruaitu kha a auh hna i an rak phanh tikah hitin a ti hna: “Unau hna, kan miphun siseh, kan pupa hna phungphai siseh ralchanh in zeihmanh ka tuah lo nain Jerusalem khua ah thong an ka thlak i Rom mi hna kut ah an ka chanh.
18 Rom mi nih an ka kherhhlai tikah thah awk tlak sualnak ka tuahmi zeihmanh an hmuh lo caah thlah an ka duh.
19 Asinain Judah mi nih an duh lo caah Sizar* sinah a zu ka khaannak hi a si. Ka miphun cung ah sualphawt awk ka ngeih ruang ah a si lo.
20 Cucaah nanmah he biaruah ka duh i kaan auhmi hna hi a si. Israel mi nih an rak i ruahchanmi ruang ah atu bantuk in thir cikcin in khih ka simi hi a si.”
21 Mah tikah annih nih “Nangmah kong he aa tlaiin Judea ram in zei ca hmanh kan hmu lo. Cuka ram in a rami unau pawl zong nih na kong he aa tlaiin a chiatnak zeihmanh an chim lo.
22 Asinain mah phu cu khuazakip ah an soisel ngai ti kha kan hngalh. Cucaah na ruahnak kha theih kan duh” tiah an ti.
23 Cun Paul he i ton awkah ni an khiah. Mah ni a phanh tikah mi tampi cu Paul a umnak inn ah an ra. Zinglei in zanlei tiang Pathian Pennak kong kha an sinah felfai tein tehte a khaan. Moses Nawlbia le Profet cauk hmang in Jesuh kong kha an lung a pem i an zumh khawh nakhnga aa zuam.
24 Paul chimmi kha a cheu nih an zumh, a cheu nih cun an zum lo.
25 Mah tikah pakhat le pakhat an lung aa khah ti lo caah an chuak, cucaah Paul nih hitin a ti hna:
“Profet Isaiah hmang in nan pupa hna sinah thiang thlarau nih a chimmi hi a hmaan taktak,
26 ‘Mah miphun sinah va kal law hitin va ti hna: “Nan theih ko nain nan hngal hlei lai lo, nan zoh ko nain nan hmu hlei lai lo.
27 Hi mi hna nih an lung innka kha an khar, an theih ko nain an zul lo, zeihmanh an theih lo nakhnga an hna kha an i phih, zeihmanh an hmuh lo nakhnga an mit an i chinh. Cucaah a sullam kha an i fiang lo. Keimah sin an i mer lo caah kei zong nih an dam ṭhan nakhnga ka thlop kho ve hna lo”’ tiah a rak ti.
28 Cucaah Pathian khamhnak bia cu miphun dang hna sinah thanh a si cang ti kha hngal ko u. Annih nih cun an ngaih hrimhrim lai.”
29 * ——
30 Paul cu a hlanmi inn ah kumhnih chung a um i a sinah a rami paoh kha lunglawm tein a cohlan hna.
31 Pathian Pennak kong le Bawipa Jesuh Khrih kong kha dawnkhantu um loin ralṭha tein a chim* i a cawnpiak hna.
Footnotes
^ Asiloah “Tikulh mi hna.”
^ Greek Di′ke, dinnak caah phuhlamtu khuazingnu kha a chim duhmi a si kho men.
^ Asiloah “Rom Siangpahrang.”
^ Mah cacaang hi Baibal lehnak cheukhat ah a um nain hlanlio kut in ṭialmi, zumhawk a tlakmi Greek Baibal hna ah a um lo.
^ Biafang Fianternak ah zoh.
