Lamkaltu 3:1-26
3 Peter le Johan cu thlacam caan a simi zanlei suimilam 3* ah biakinn ah an kal.
2 Mah lioah a chuahka in a ke a beimi pa pakhat cu mi nih an rak zawnh. Kutka Dawh tiah auhmi biakinn kutka pawng ah nifatin an rak chiah. Mah cu biakinn chung a lutmi hna kha thil a hal khawh hna nakhnga caah a si.
3 Biakinn chung ah luh aa timmi Peter le Johan kha a hmuh hna tikah thil a hal hna.
4 Asinain Peter le Johan nih mit ṭhep loin an zoh i Peter nih “Rak kan zoh” tiah a ti.
5 Mah tikah an sinin pakhatkhat ka hmuh lai tiah aa ruahchan i ṭha tein a zoh hna.
6 Peter nih “Sui le ngun cu ka ngei lo. Asinain ka ngeihmi kha kaan pek lai. Nazareth khuami Jesuh Khrih min in tho law kal!” tiah a ti.
7 Mah hnuah a orhlei kut in a tlaih i a thawh tikah a ke le a fengbeo hna cu an hung ṭhawng colh.
8 Cun a hun i hlok i lam a hun kal. A kal pah, aa hlawh pah in Pathian a thangṭhat i anmah he biakinn chung ah a lut.
9 Pathian thangṭhat buin a kalmi kha cuka i a ummi hna nih an hmuh.
10 Kutka Dawh tiah auhmi biakinn kutka pawng ah ṭhu in thil a hal tawnmi a si kha an hun hngalh. A cung i a cangmi thil kong ah an khuaruah a har tuk i an zum kho lo.
11 Mah pa nih Peter le Johan an kut a tlaih ko hna lioah an umnak Solomon Deu tiah auhmi hmun ah mizapi cu an rak tli i an khuaruah a har tuk.
12 Mah kha a hmuh tikah Peter nih hitin a ti hna: “Israel mi hna, zeicah khuaruahhar in nan kan zoh? Kanmah pumpak ṭhawnnak ruang le lungthin dihlak in Pathian kan biak ruang ah hi pa hi lam a kal khawhmi a si tiin maw nan ruah?
13 Kan pupa hna Pathian, Abraham Pathian, Isak Pathian, Jakob Pathian nih a Sal Jesuh kha sunparnak a pek cang. Asinain nannih nih cun thah awkah nan chanh. Pilat nih thlah a timh ko nain a hmaiah nan hlawt.
14 A thianghlim i a dingmi pa kha cu nan hlawt i lainawng pa tu kha thlahpiak ding in nan hal.
15 Cuticun nunnak lam ah mi a Hruaitu cu nan thah. Asinain Pathian nih thihnak in a thawhter ṭhan i kannih cu a hmutu tehte kan si.
16 Jesuh min in le a min kan zumhnak thawng in nan hngalhmi le nan hmuh balmi mah pa hi a hun ṭhawn ṭhanmi a si. Jesuh kan zumhnak thawng in nan dihlak hmaiah hi pa nih damnak tling a hmuhmi a si.
17 Unau hna, nan hruaitu hna bantuk in nan hngalh lo ruang ah nan rak tuahmi a si ti kha ka hngalh ko.
18 Asinain Khrih cu harnak a ing lai tiah profet hna sinin a chimchungmi bia a tlin nakhnga Pathian nih hi thil hi a awnhmi a si.
19 “Cucaah nan sualnak hnawhpiak nan si nakhnga i ngaichih u law Pathian sinah i mer u. Cuticun Jehovah* sinin hrimhnak caan nan hmu lai.
20 Cun nan caah thim a simi Khrih kha a thlah lai. Anih cu Jesuh a si.
21 Hlanlio i a thiangmi profet hna sinin Pathian nih a chim bantuk in zeizong vialte a thar in ser ṭhan caan a phanh hlan tiang Jesuh cu van ah a um awk a si ko.
22 A tak ti ahcun Moses nih ‘Jehovah* nan Pathian nih nan lakin keimah bantuk profet pakhat a chuahter lai. A chimmi paoh kha ngai u.
23 Mah Profet bia a ngai lomi paoh cu Pathian miphun hna sinin hrawh dih cikcek an si lai’ tiah a ti.
24 Cun Samuel thawk in profet vialte nih mah caan kong kha fiang tein an rak chim.
25 Nannih cu profet fale nan si i nan pupa hna he Pathian nih a tuahmi biakamnak in ṭhatnak a hmu hnga dingmi nan si. Mah biakamnak ah Pathian nih Abraham kha ‘Vawleicung mi vialte cu na tefa thawng in thluachuah an hmu lai’ tiah a rak ti.
26 Nan sualnak in i mer hna seh law thluachuah hmu hna seh ti aan duh hna caah a Sal Jesuh kha a thim i nan sinah a hmasa bik a rak thlah.”
Footnotes
^ A hrampi, “nichuah hnu suimilam 9.”
^ Biafang Fianternak ah zoh.
^ Biafang Fianternak ah zoh.
