Lamkaltu 7:1-60
7 Mah tikah tlangbawi ngan nih “An chimmi cu a hmaan maw?” tiah a hal.
2 Steven nih hitin a ti: “Unau hna le pale hna, ka bia hi ngai tuah u. Kan pupa Abraham cu Haran khua i a um hlan, Mesopotamia i a um lioah sunparnak in a khatmi Pathian cu a sinah a lang i,
3 ‘Na ram le na rualchan pawl kha kaltak hna law kaan hmuhsak laimi ram ah va kal’ tiah a ti.
4 Abraham cu Khaldia ram in a chuak i Haran ah khua a sa. A pa a thih hnuah Pathian nih atu nan umnak, hi ram ah hin a ṭhialter.
5 Cu lioah hi ram ah zei ro hmanh a rak pe lo, a ke chiahnak caah aa tlum dingmi hmun hmanh a rak pe lo. Fa zong a ngei rih lo nain nangmah le na tefa kha hi ram hi kaan pek hna lai tiah Pathian nih bia a rak kamh.
6 Mah leng ah na tefa hna cu miphun dang ram ah ramdang mi in an um lai, cuka ah kum 400 chung sal an si lai i hrem an si lai tiah Pathian nih a ti.
7 ‘Anmah sal ah a sertu hna miphun kha bia ka ceih hna lai. Mah hnuah cuka ram cun an chuak lai i hi hmun ah an ka biak lai’ ti zong in a ti.
8 “Pathian nih Abraham sinah cuarpar tannak he aa tlaimi biakamnak zong a ser. Abraham nih a fapa Isak a chuah hnu a niriatnak ni ah a cuarpar a tan. Isak cu Jakob pa a hung si.* Jakob cu kan pupa 12 i an pa a hung si.
9 Pupa hna nih Josef kha an nahchuah i Izipt ram ah an zuar. Asinain Pathian cu a sinah a um.
10 Harnak a inmi dihlak chung in a khamh. Izipt siangpahrang Faraoh hmaiah mithmai ṭha a hmuhter i fimnak a pek caah Faraoh nih Josef kha Izipt ram le a inn uktu ah a ser.
11 Asinain Izipt ram le Kanaan ram pumpi ah mangṭam a tlung i harnak fakpi in an tong. Pupa hna cu ei awk zeihmanh an ngei ti lo.
12 Jakob nih Izipt ram ah rawl a um ti thawng a theih tikah kan pupa hna kha a voikhatnak a rak thlah hna.
13 A voihnihnak an kal tikah Josef nih a unau hna sinah aho a si kha aa hngalhter. Faraoh zong nih Josef chungkhar kong cu a hun hngalh.
14 Cucaah Josef nih a pa Jakob le a chungkhar vialte kha Izipt ram ah rat ding in bia a cah hna. An dihlak ah 75 an si.
15 Cuticun Jakob cu Izipt ram ah a kal i cuka ah a thi. Kan pupa hna zong cuka ah an thi ve.
16 An ruh cu Shekhem khua ah an kalpi. Cuka khua ah Abraham nih Hamor fapale sinah ngun tangka in a rak cawkmi thlan ah an vui hna.
17 “Abraham sinah a sermi Pathian biakam a tlin caan a naih tikah Izipt ram ah Israel mi cu an karh chin lengmang.
18 A hnuah Josef a hngal lomi siangpahrang dang pakhat nih Izipt ram cu a hun uk.
19 Kan miphun pawl kha zer ngai in a uk hna. Kan pupa hna kha a hrem hna i a chuakkami an fale an thih nakhnga hramhram in a hlonhter hna.
20 Cu lio caan ah Moses cu a rak chuak i anih cu fa dawh ngai* a si. A pa inn ah thla thum chung an zohkhenh.
21 Asinain an hlonh tikah Faraoh fanu nih a char i amah fa in aa cawm.
22 Moses cu Izipt fimthiamnak vialte cawnpiak a si caah biachim a thiam ngaimi le thil a ti kho ngaimi a hung si.
23 “Moses cu kum 40 a si tikah a phunhawi Israel mi sin va len ding in a lung ah a chuak.
24 Israel mi pakhat kha Izipt mi nih a hremmi a hmuh tikah a va bawmh. Mah Izipt mipa kha a thah i teirul a cham.
25 Pathian nih anmah luatter awkah keimah a ka hman lai ti kha a miphun pawl nih an hngalh lai tiah a ruah nain an hngal lo.
26 A thaizing an sin i a va kal tikah mi pahnih an i velhmi kha a hmuh i an kar ah remnak ser awkah aa zuam. Cun ‘Nannih cu unau pei nan si cu. Zeicah pakhat le pakhat nan i velh?’ tiah a ti hna.
27 Asinain a palh deuhmi pa nih Moses cu a nam i ‘Aho nih dah kanmah uktu le biaceihtu ah rian aan pek?
28 Nizan i Izipt mipa na thah bantuk in maw keimah zong thah na ka duh?’ tiah a ti.
29 Mah bia a theih tikah Moses cu a zam i Midian ram ah ramdang mi in a va um. Cuka ah fapa pahnih a ngei.
30 “Kum 40 a rauh hnuah Sinai Tlang pawng ramcar ah vancungmi pakhat cu burbuk a kangmi meizik bantuk in a lang.
31 Mah kha a hmuh tikah Moses cu a khuaruah a har tuk i naih tein zoh awkah a pawng ah a va kal. Mah tikah Jehovah* nih,
32 ‘Kei cu nan pupa hna Pathian, Abraham Pathian, Isak Pathian, Jakob Pathian ka si’ tiah a timi kha a theih. Moses cu a ṭih tuknak ah a ther in a ther i a va naih ngam ti lo.
33 Jehovah* nih ‘Na dirnak hmun cu hmun thiang a si caah na phanat kha i phoih.
34 Izipt ram ah ka mi hna an temhinnak kha fiang tein ka hmuh. An aihramnak kha ka theih i anmah khamh awkah ka rung ṭum cang. Atu Izipt ram ah kaan thlah lai’ tiah a ti.
35 Mah Moses cu ‘Aho nih dah uktu le biaceihtu ah rian aan pek?’ tiah an ti i an rak hlawtmi kha a si. Pathian nih burbuk ah a langmi vancungmi hmang in Moses kha hruaitu le khamhtu ah a rak thlah.
36 Moses nih kan pupa hna kha Izipt ram in a chuahpi hna. Izipt ram, Rili Sen le ramcar ah kum 40 chung khuaruahhar thil le hmelchunhnak hna a rak tuah.
37 “‘Pathian nih nan lak in keimah bantuk profet pakhat a chuahter lai’ tiah Israel mi sinah a rak chimtu cu mah Moses kha a si.
38 Amah cu ramcar ah Israel mi hna he a rak ummi kha a si. Sinai Tlang cung i a sinah bia a rak chimtu vancungmi le kan pupa hna sinah a rak ummi kha a si. Amah cu Pathian bia zungzal in a hmunmi kha kanmah pek awkah a cohlangtu kha a si.
39 Kan pupa hna nih a bia kha an rak ngai lo, an rak hlawt i Izipt ram tu ah kir ṭhan an duh.
40 Aaron kha ‘A kan hruaitu ding pathian hna kan serpiak tuah. Izipt ram in a kan chuahpitu Moses cu zei a can kan hngal ti lo’ tiah an ti.
41 Cun cawfa mui in siasal pakhat an ser i raithawinak an pek. Anmah kut lila in an sermi kha conglawmh awkah puai an tuah.
42 Cucaah Pathian nih annih cu a hlawt hna i vancung arfi pawl biak awkah a awnh hna. Profet cauk ah ‘Israel mi hna, ramcar chung ah kum 40 chung nan vaih lioah raithawinak le laksawng hna nan ka pe maw?
43 Nan i phorhmi Molok puan thlam le Refan arfi pathian sinah pei nan pek ko cu. Mah hna cu nanmah nih biak awkah nan serchommi siasal an si. Cucaah Babilon nakin a hlat deuhnak hmun ah kaan ṭhawl hna lai’ tiah aa ṭial ning in khan a si.
44 “Ramcar i an um lioah kan pupa hna nih Pathian kan sinah a um ti langhternak puan thlam an rak ngei. Pathian nih a hmuhsakmi ning in mah thlam kha sak awkah Moses kha nawl a pek.
45 A hnuah pupa hna i an fale nih mah thlam kha an lak i miphun dang hna ram ah Joshua he an luh tikah an i phorh. Mah miphun dang hna cu Pathian nih pupa hna hmai in a rak ṭhawl hna. Mah thlam cu David chan tiang a rak um.
46 David cu Pathian hmaiah mithmai ṭha a hmumi a si i Jakob Pathian caah umnak hmun pakhat saknak nawl a rak hal.
47 Asinain innsaknak nawl a hmumi cu Solomon tu a si.
48 A tak ti ahcun Cung Nung Bik Pathian cu minung sakmi inn ah a um lo. Profet pakhat nih hitin a ti:
49 ‘Jehovah* nih vancung cu ka bawiṭhutdan a si. Vawlei cu ka ke chiahnak a si. Ka caah zei bantuk inn dah na ka sakpiak lai? Khoika ah dah ka umnak hmun cu a si?
50 Hi thil vialte hi keimah nih ka sermi an si ko lo maw? tiah a ti.’
51 “Mi lungkhong hna, lungthin le hna a phitmi hna,* nan pupa hna bantuk in thiang thlarau kha nan ralchanh zungzal.
52 Nan pupa hna nih an hrem lomi profet aho tal an um maw? A dingmi pa a rat lainak kong a chimchungmi kha an rak thah hna. Atu zong ah nannih nih mah a dingmi pa kha nan rawi i nan thah cang.
53 Vancungmi hna sinin nan hmuhmi Nawlbia kha nan zul lo.”
54 Mah kha an theih tikah an thin a khenh tuk hna i Steven kha an hacang an rial hnawh.
55 Thiang thlarau in a khatmi Steven nih van kha a zoh tikah Pathian sunparnak le Pathian orhlei kam ah a dirmi Jesuh kha a hmuh.
56 “Zoh hmanh u! Vancung aa hunmi le Pathian orhlei kam ah Mi Fapa a dirmi kha ka hmuh” tiah a ti.
57 Mah tikah an hna an i phih, fakpi in an au i Steven kha an zuan hnawh.
58 Khua leng ah an chuah i lung in an cheh. Lih a chimmi tehte hna nih an angki leng kha an phoih i Saul tiah auhmi tlangval pa kehram ah an chiah.
59 Lung in an cheh lioah Steven nih “Bawipa Jesuh, ka nunnak* hi cohlang ko” tiah a nawl.
60 Cun a khuk aa bil i “Jehovah* Pathian, hi an sualnak ruang ah hin dantat hna hlah” tiah fakpi in a au hnuah thihnak ah aa hngilh.
Footnotes
^ “Isak nih Jakob kha a cuarpar a tan” ti zong a si kho.
^ Asiloah “Pathian hmaiah aa dawh tukmi.”
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ A hrampi, “lungthin le hna cuarpar a tan lomi hna.”
^ Asiloah “thaw.” A hrampi, “thlarau.”
^ Biafang Fianternak ah zoh.