Lamkaltu 9:1-43
9 Saul cu Bawipa zultu pawl tlerhkhonh awk le thah awkah a lung a tho tuk i tlangbawi ngan sinah a kal.
2 Cun Damaskas khua i pumhnak inn hna ah cakuat ṭialpiak ding in a nawl. Cucu Bawipa Lam a zulmi nu he, pa he tlaih in Jerusalem khua ah a ratpi khawh hna nakhnga caah a si.
3 Cun a kal i Damaskas khua pawng a phanh tikah ruahlopi in a velchum cu van in ceunak nih a run ceuh.
4 Vawlei ah a tlu i “Saul, Saul, zeicah na ka hrem?” timi aw kha a theih.
5 Saul nih “Bawipa, ahodah na si?” tiah a hal tikah “Keimah cu na hremmi Jesuh ka si.
6 Atu tho law khua chung ah va lut, zeidah na tuah awk a si ti kha an in chimh lai” tiah a ti.
7 Saul he khual a tlawngṭimi hna nih aw cu an theih nain a chimtu kha an hmuh lo caah bia kaakhat hmanh chim kho loin ar ko in an dir.
8 Saul cu vawlei cun a tho i a mit a hun au tikah zeihmanh a hmu kho ti lo. Cucaah a kut in an hruai i Damaskas khua ah an luhpi.
9 Nithum chung khua a hmu kho lo i zeihmanh a ei, a ding lo.
10 Damaskas khua ah Ananias tiah auhmi zultu pakhat a um. Langhnak a hmuhmi ah Bawipa nih “Ananias!” tiah a auh tikah “Ka um ko, Bawipa” tiah a leh.
11 Bawipa nih “Tho law Lam Ding timi lam ah va kal, Tarsas khuami Saul timi pa kha Judas inn ah va kawl. Atu thla a cam lio.
12 Ananias timi pa a ra i a mit khua a hmuh ṭhan nakhnga a cung ah a kut a chuanmi kha langhnak ah a hmuh” tiah a ti.
13 Asinain Ananias nih “Bawipa, hi pa nih Jerusalem khua i na mithiang pawl harnak a pek hnanak kong vialte kha mi tampi sinin ka theih.
14 Cun na min a aumi paoh tlaihnak nawl kha tlangbawi upa hna sinin a hmuh caah hika ah a rak phanhmi a si” tiah a leh.
15 Asinain Bawipa nih “Va kal ko! Amah cu miphun dang hna lawng si loin siangpahrang hna le Israel mi hna sinah ka kong tehte khangtu ding ah ka thimmi a si.
16 Ka min ruang ah zeitluk in dah a temhin lai ti kha fiang tein ka hmuhsak lai” tiah a ti.
17 Cucaah Ananias cu a kal i Saul aa ṭhumhnak inn ah a lut. A cung ah a kut a chuan i “Ka unau Saul, hika na rat lio i lam ah na sinah a langmi Bawipa Jesuh nih a ka thlah. Na mit khua a hmuh ṭhan nakhnga le Thiang Thlarau in na khah nakhnga bawmh awkah a si” tiah a ti.
18 Chikkhat te ah a mit in phokphawher bantuk kha an tla i khua a hmu ṭhan. Cun a tho i tipil a ing.
19 Rawl a ei i a thazaang a um ṭhan.
Damaskas khua ah zultu pawl sinah ni tlawmpal a caam.
20 Pumhnak inn hna ah a kal colh i Jesuh cu Pathian Fapa a si timi kong kha a chim.
21 A bia a theimi paoh cu an khuaruah a har tuk i, “Hi pa hi Jerusalem khua i Jesuh min a aumi paoh fakpi in a hremtu kha a si lo maw? Hika i a ratmi zong hi annih kha tlaih in tlangbawi upa hna sinah kalpi awkah a si lo maw?” tiah an ti.
22 Saul a phungchimnak cu hmual a ngeih chin leng ah Jesuh cu Khrih a si ti kha fiang tein a langhter caah Damaskas khua i Judah mi cu an khuaruah a har tuk.
23 Ni tam nawn a rauh hnuah Judah mi hna cu Saul thah awkah a thli tein khua an khang.
24 Asinain an khuakhannak kha Saul nih a hun hngalh. Judah mi nih Saul thah awkah khua kutka in chun he, zan he an bawh.
25 Cucaah zan ah a zultu hna nih Saul kha bawm ah an khumh i khua kulhnak vanpang thlalang awng in an ṭhumh.
26 Saul cu Jerusalem a phanh tikah zultu hna sinah i tel ding in aa zuam nain Jesuh zultu a si ve cang ti kha an zumh lo caah an ṭih.
27 Cucaah Barnabas nih a bawmh i lamkaltu hna sinah a kalpi. Lampi ah Saul nih Bawipa a hmuhnak kong, Bawipa nih a chawnhnak kong le Damaskas khua ah Jesuh min in ralṭha tein phung a chimnak kong kha a dikthliar in a chimh hna.
28 Saul cu lamkaltu hna sinah a um, Jerusalem khua kha a cul dih i Bawipa min in ralṭha tein phung a chim.
29 Greek holh a hmangmi Judah mi hna he bia an i ruah i a al zong an i al, cucaah annih nih thah an timh.
30 Mah kong kha unau pawl nih an theih tikah Sisaria khua ah an kalpi i Tarsas khua ah an thlah.
31 Mah lio caan ah Judea ram le Galili ram le Samaria ram i Khrihfabu dihlak cu daihnak an hmu i an zumhnak a fek chin. Jehovah* kha an ṭih i Thiang Thlarau pekmi hnemhnak ning in an nun caah an karh chin lengmang.
32 Peter cu khuazakip ah khual a tlawn pah in Lidda khua ah a ummi mithiang mi hna sinah a rak phan.
33 Cuka ah Ainias timi pa kha a va hmuh, anih cu a zengmi a si i ihnak cung i a rilhnak hi kum 8 a si cang.
34 Peter nih “Ainias, Jesuh Khrih nih aan damter cang. Tho law na ihnak kha fim” tiah a ti tikah a tho colh.
35 Lidda khua le Sharon Nelrawn i a ummi vialte nih Ainias kha an hmuh tikah Bawipa kha an hun zumh.
36 Joppa khua ah Tabitha timi zultu pakhat a um, Greek holh in cun “Dorkas”* ti a si. Anih cu thilṭha tampi a tuah i misifak bawmh a hmang ngaimi a si.
37 Cu caan ah Dorkas cu a zaw i a thi. Zultu hna nih a ruak kha ti an kholh i cungdot khaan ah an suan.
38 Lidda khua cu Joppa he aa naih i cuka khua ah Peter a um ti kha zultu pawl nih an theih tikah mi pahnih an hei thlah hna i, “Khulrang in kan sinah rak ra” tiah an ti.
39 Peter cu a tho i an sinah a kal. A phanh tikah cungdot khaan ah an kaipi. A ṭapmi nuhmei pawl cu Peter sinah an ra i Dorkas nih a nun lioah a ṭhitpiakmi hna angki le puan hna kha an hmuhsak.
40 Peter nih an dihlak in leng ah a chuahter hna, a khuk aa bil i thla a cam. Cun a ruak lei ah aa mer i, “Tabitha, tho tuah!” tiah a ti. A mit kha a hun au i Peter kha a hmuh tikah a hung ṭhu.
41 Peter nih a kut a chanh i a thawh. Cun mithiang mi le nuhmei hna kha a auh hna i a nung ṭhanmi Tabitha kha a hmuhsak hna.
42 Cu thawng cu Joppa khua dihlak ah a thang i mi tampi nih Bawipa kha an hun zumh.
43 Peter cu Joppa khua i saphaw sertu Simon sinah sau nawn a caam.
